بالصور.. أطرف مواقف الولادة.. مروة: جالي الطلق وشعري منكوش.. لالا: لبست روب كابوتونيه.. فوفا: سألتهم ركبتوا عينين للبيبي.. روجي: الدكتور ربط عيني بشاش.. وأحمد: واحدة قالتلي بصوت عشان يحسوا بيا

تعد عملية الوضع أو الولادة من أصعب اللحظات التي تمر على النساء، ففيها يفصل الطبيب روحين عن بعضهما البعض، وعلى الرغم من صعوبة تلك اللحظات إلا أنها لا تخلو أحيانا من المواقف الطريفة، وهي ما روتها النساء عبر صفحة "الكومنت الفصيل" على موقع فيس بوك مجيبين عن سؤال أغرب مواقف الولادة وأطرفها.
- لبست روب كابوتنيه بفرو
قالت لالا: "وأنا بولد بنتي الكبيرة راحت لابسة روب بينك كابوتونيه وفرو من على اللياقة وفرو على الأكمام دخل عليا الدكتور قالي بقولك إيه يا مدام رجاء الجداوي ياريت تقلعي روب ليالي الأنس في فيينا ده خلينا نشوف شغلنا".
- جالي الطلق وشعري منكوش
وأضافت مروة: "طيب أنتي كنتي لابسة ومتألقة أنا جالي الطلق جوزي خدني بجلابية بنص كم وشبشب البيت وشعري منكوش وطلع يجري علشان يجيب ماما ونروح للدكتور، ولما الدكتور قال لسه شوية علشان البكرية بتطول بس خلوها تمشي كتير وتاكل كويس علشان تقدر على الولادة أخدوني بنفس المنظر العرة وجابولي فراخ وكفتة وفضلوا ماشين بيا في الشارع على أساس بيمشوني نمشي شوية ويدفسوا الأكل في بؤي شوية وكل اللي يشوفني في الشارع يقولي يا عيني يا بنتي".
- تركيب عينين "للبيبي"
وقالت فوفا: "مرة أختي كانت بتولد المهم كانت لسه متبنجة بعد الولادة فسألت الدكتور قالتلوا هو البيبي ليه عنيين ولا هنركبله".
- بصوت عشان اللي بره يحسوا إني بتعب
وأضاف أحمد: "بولد واحدة في مستشفى خاص بعد ما أخدت البنج، وبفتح الجلد بالمشرط قالتلي أنت بدأت يا دكتور قولتلها أه قعدت تصوت تصوت فيه ايه يا مدام انتي واخدة بنج مش حاسة بحاجة قالتلي ما أنا عارفة بس أنا دافعة فلوس لازم أعمل بيهم شوية اكشن اومال أولد كده سكيتي خليهم برة يحسوا إن أنا بتعب أد إيه".
- الدكتور ربط عيني بشاش
وقالت روجى: "أنا بقي وأنا بولد بنتي الكبيرة كنت مرعوبة جدا من اللى بسمعه وطبعا زي بقيت ستات مصر ولدت قيصري المهم أخدت البنج النصفي والدكتور شغال وأنا روحت صوت جامد جدا وأقوله استنى استنى أنا حاسة بكل حاجة انت بتفتح بطني أه أه الدكتور اترعب جامد ورفع إيده وقالي إزاي انتي متبنجة طيب حركي صوبع رجلك كده طبعا متحركش راح قال ما أنا عارف إنك حاسة بكل حاجة وخلي الممرضة تغمض عيني بالشاش".
وأضافت إنجى: "في ابني الأول وأنا في البنج سألتهم عديتوا صوابعه وابني التاني بقيت أزعق عشان عايزة الشبشب بتاعي".
- صرخت في الدكتور سيبني أتشاهد
وقالت أم زيزو: "كان أول ولاده وخايفة وعمالة أتشاهد قبل البينج جيت طالعة على السرير الدكتور بيقولي انتى دكتوره قولتلوا لأ، قالي طب ممرضة قولتلوا لا.. قالي امال شكلك مدى على حد كيميائي أو دكتور ليه صرخت في وشه وقولتلوا معرفش وسبني اتشاهد بقا الدكتور فطس على روحه من الضحك".