افرض جدلاااااااااا

إنك قابلت واحد صاحبك وليك سنين ماشفتوش، وهات يا أحضان وبوس لما قطعتم بعض وأخدك الكلام معاه فى الدنيا والعيال والحريم واللى حاصل، هو يشكى وأنت تبكي لما عيونك بقيت زى الدم من كتر العياط، صعبت عليه قوى قال.. إيه أنت تعبان فى حياتك للدرجة دى؟، ابتسمت وقلت له أنا بعيط عليك أنا مطلق مراتى لى أربع سنين، يضحك ويقول ما تزعلش نفسك كلها ذنوب وربك بيغفر وفجأة يسألك.. إيه رأيك فى حكم الإخوان؟، تلاقى نفسك من غير مقدمات تصرخ الحمد لله جعنا، وعلى وشك نبقى عرايا وبندور على الأمان ياعينى مش لاقين.
وكله بقى صوته من دماغه تبص وش صاحبك اتقلب قلبة سودة، وصرخ فيك هى وصلت أنك ترفض حكم الإسلام أنت إيه مش خايف من ربك لما يسألك ويقولك لماذا لم تساعد الإخوان، وحنفية كلام واتفتحت خليك ماشى وراء الكفار إن شاء الله هتروح النار وخلى الأعداء ينفعوك، وأخد موقفا جامدا منك لدرجة أنك تقوله ياعم الموضوع مش كده الموضوع إن الإخوان فاشلين فى كل حاجة حتى فى الدين، وتلاقى صاحبك القديم تحول ثورا هائجا وعايز يفتك بيك وتحولت الأحضان والقبلات إلى طلقات رصاص حية...

_لو أنت مكانى تعمل إيه؟!...