عوكل والحاجة أطاطا.. حلقة رقم (5).. الانتخابات الرئاسية المبكرة !

جلست الحاجة أطاطا كعادتها على الكنبة الاسطنبولى العتيقة فى فسحة شقتها تدخن وتشرب كوبا من الشاى لمحت عوكل يمر من باب حجرته إلى الحمام فنادته
الحاجة اطاطا: انت ياواد ياعوكل مالك رايح جاى على الحمام كل شوية؟
عوكل: فيه ايه ياستى بلاش ادخل الحمام عندى إسهال وبطنى ماشية عليا باين الكبدة اللى اكلتها امبارح معفنة
الحاجة اطاطا: ياواد يامعفن يارمرام انت لسه برضه بتقف على عربيات الكبدة والسجق تاكل انصاص
عوكل: هو كان ايه اللى اتغير فيا ياستى علشان ابطل اكل كبدة وسجق ؟ لسه فقير زى ما انا
الحاجة اطاطا: اللى اتغير فيك أن كلها أيام وتترشح لرئاسة الجمهورية خلاص ياواد عمك أبوالفتوح كل شوية يطالب بانتخابات مبكرة لرئاسة الجمهورية علشان نخلص من الفاشل ده اللى اسمه مرسى وحكم الإخوان
عوكل: وانتى فكرك يعنى أن حد حيسمع كلام أبوالفتوح ده ولو فرضنا أن الانتخابات الرئاسية اتعملت مين دراكى انى حكسب حمدين وشفيق ومرشح الإخوان ومرشح حزب النور ده كل من هب ودب حيرشح نفسه ماهى زاطت
الحاجة اطاطا: حتنجح ياواد انا نظرتى ماتخيبش ابدا بس قولى ياواد انا سمعت انك خلصت دروس الإنجليزى والفرنساوى وبقيت برابنط وبتعرف لغات صحيح ولا كدب ولا انت متفق مع المدرسين بتوعك يقولولى كده ؟
عوكل: انا بقيت اتكلم إنجليزى وفرنساوى احسن من مرسى ودروس التاريخ كمان خلصتها كلها وبقيت عارف كل تاريخ مصر القديم والحديث عارفة يا اطاطا انا حتى لو ما نجحتش مش حزعل لأنى استفدت كتير وبقيت متنور ده انا بعد اللى اتعلمته عرفت انى كنت عايش حمار قبل كده وعرفت أن بلدنا ياما فيها حمير وفاكرين انهم بنى آدمين
الحاجة اطاطا: علشان تعرف مخى وافكارى اديك اتعلمت واتنورت يارب يتمر فيك وتفتكرنى لما اموت
عوكل: بعد الشر عنك ربنا يديكى الصحة وطولة العمر يا اطاطا
الحاجة اطاطا: شعبيتك بقت كبيرة اوى ياولا انا سمعت انك بتعمل اجتماعات على القهاوى وبتعلم الناس ازاى يختاروا الصالح ليهم وبتعلمهم الامور السياسية
عوكل: الناس جهله ولازم تتعلم وتفهم وتتنور علشان ماحدش يضحك عليها تانى زى الإخوان ما عملوا معانا واحنا صدقناهم بعبطنا وقلة وزناخة عقلنا
الحاجة اطاطا: مرسى بيقع خلاص وصندوق النقد مبقاش عنده ثقة فيه ولا فى قنديل ولا فى الإخوان كلهم علشان كده راحوا اتقابلوا مع حزب النور وجبهه الإنقاذ
عوكل: انتى عارفة ياستى انا بقيت مصاحب مين ؟
الحاجة اطاطا: مين ياموكوس ؟ اكيد مصاحب على علوكة والأشكال اللى زيه
عوكل: علوكة مين ياستى ؟ ده كان زمان دلوقتى انا مصاحب عمرو موسى وشفيق والسيد البدوى
الحاجة اطاطا: اتوكس مصاحب فلول
عوكل: ياستى دول ناس محترمين
الحاجه اطاطا: ياواد صاحب عمرو حمزاوى أو عمرو الشوبكى أو أحمد عكاشة على الأقل يعالجك من الجنان اللى انت فيه ده
عوكل: كده ياستى هو انا مجنون ؟
الحاجة اطاطا: ايوه مجنون لما تصاحب ناس مفيش منها فايدة عموما انا حتصرف .. لبسك نضف ياواد
عوكل: ده احسن لبس فى الوكالة
الحاجة اطاطا : وكالة يامدهول انا مش قيلالك تروح تشترى هدومك من مكان محترم ؟
عوكل: ومالها الوكالة ما انا طول عمرى بلبس من هناك ولا دلوقتى حنفترى ؟
الحاجة اطاطا: كل وقت وله أوانه انت دلوقتى رأجل مهم ماينفعش تلبس أى حاجة افهم بقى
عوكل: حاضر ياستى حبقى اشترى لبسى من الشواربى
الحاجة اطاطا: الشواربى راحت عليه اشترى من سيتى ستار وخد منى الفلوس اللى انت عايزها
عوكل: فين سيتى ستار ده ؟
الحاجة اطاطا: فى مدينة نصر يامدهول
عوكل: حاضر ياستى حبقى اشترى من هناك بس انتى ريحى نفسك
الحاجة اطاطا: انا مش حرتاح الا لما انت تترشح للرئاسة ياواد حتى لو خسرت الخسارة برضه مكسب حيقولوا عليك المرشح السابق لرئاسة الجمهوريه ودى لوحدها بفلوس مش ببلاش نفسى تفهم وتبطل تبقى غبى
عوكل : حاضر ياستى حبطل غباوة وانتى بطلى تهزئينى
الحاجة اطاطا: حاضر ياحيلة ستك يلا شوف انت رايح فين
عوكل: حاضر ياستى فوتك بعافية
الحاجة اطاطا: الله يعافيك ياعوكل