عوكل والحاجة أطاطا.. حلقة رقم (3).. فى خدمة الشرطة!!

الحاجة أطاطا: واد يا عوكل روح بلغ نسوان القلعة كلهم، وقول لهم إن جدتى الحاجة أطاطا بتقولكم كل واحدة فيكم النهاردة تطبخ اللى يقدرها عليه ربنا علشان حَنْوَدى الأكل لأقسام الشرطة.
عوكل: إيه يا جدتى إحنا حَنْأَكِّل الحبسجية والمساجين.
الحاجة أطاطا: اتلهى يا واد حبسجية ايه اللى إحنا حنأكلهم؟ إحنا حنأكل الضباط والعساكر وأمناء الشرطة.
عوكل: ليه حد قال لك إنهم مش لاقيين ياكلوا؟
الحاجة أطاطا: يا واد الأقسام قفلت والضباط عاملين اعتصام وإضراب عن العمل عاوزين يشيلوا وزير الداخلية ومش عاوزين يضربوا الثوار.
عوكل: همه عاوزين كده؟
الحاجة أطاطا: أيوه يا واد طلعوا رجالة بصحيح علشان كده لازم نقف جنبهم ونبعت لهم أكل.
عوكل: طيب إحنا حنستفيد إيه من كده؟
الحاجة أطاطا: يا واد لما ترشح نفسك لانتخابات رئاسة الجمهورية حينفعوك ويقفوا فى ضهرك.
عوكل: أنا كل ما أسمع حكاية رئيس الجمهورية دى بطنى بتوجعنى وبيجينى إسهال.
الحاجة أطاطا: يا واد ما تبقاش خرع، جمد قلبك وروح للنسوان واعمل اللى قلت لك عليه.
عوكل: زمان الحرامية فرحانين أن الأقسام اتقفلت وحيسرقوا براحتهم خدى بالك يا جدتى بدل ما ينط عليكى حرامى يسرق منك حتتين الصيغة اللى حيلتك دول.
الحاجة أطاطا: ينط عليا حرامى فشر ده أنا أنط فى كرشه هو أنا حيلتى غيرهم حتتين الصيغة دول، دول همه اللى ساترينى وهمه اللى حيساعدونا فى الانتخابات حعمل لك بيهم دعاية انتخابية يا ولا.
عوكل: وصورى حتتعلق فى الشوارع والناس تشاور عليا وتقول عوكل الجن؟
الحاجة أطاطا: جن إيه يا واد؟ جن لما يعفرتك فيه رئيس جمهورية يسمى نفسه عوكل الجن.
عوكل: أمال اسم نفسى إيه؟ هو أنا حتبرى من اسمى؟
الحاجة أطاطا: هو ده اسم يا منيل؟ ده تهمه كفاية عوكل بس اسم عوكل جديد وفيه موسيقى وينفع يشد الناس.
عوكل: اللى تشوفيه يا جدتى انتى ست المفهومية وأنا تحت أمرك.
الحاجة أطاطا: الله يرحم أبوك «بُرُّق» لو كان بيسمع كلامى زيك كده كان زمان معانا فلوس كتير بدل العيشة الضنك اللى احنا عايشينها دى.
عوكل: هو كان بيشتغل إيه يا جدتى؟
الحاجة أطاطا: كان عنده عربية كبدة.
عوكل: وأنا بقول أنا بحب سندوتشات الكبدة كده ليه أتارى أنا طالع لأبويا.
الحاجة أطاطا: فالح مبسوط أوى جاتك نيلة فيك وفى أبوك كبرتونى قبل أوانى.
عوكل: قبل أوانك إيه يا جدتى ده أنت من أيا م ديليسبس وحفر قناة السويس.
الحاجة أطاطا: سبس فى عينك «قال سبس قال» ده أنا لسه بنت إمبارح.
عوكل: يا جدتى حرام عليكى إمبارح إيه بس؟ ده أنت مرضعة نص القلعة ده الراجل العجوز اللى بيبيع فول على ناصية الحارة بيقولى كل ما يشوفنى أنه راضع منك.
الحاجة أطاطا: راضع فى عينه ده كداب ابن كلب أنا عمرى ما شوفته ولا رضعته.
عوكل: خلاص يا جدتى ما تزعليش نفسك أنا حنزل أبلغ النسوان بطلبك وأرجع أخدك ونروح نوزع الأكل على العساكر والضباط.
الحاجة أطاطا: أيوه كده علشان العساكر والضباط يتعرفوا عليك وعلى شكلك قبل ما ترشح نفسك للرئاسة.
عوكل: حاضر يا جدتى
الحاجة أطاطا: يحضرلك الخير يا مؤدب يا ابن بنت بنتى.