إشراقات

«بؤلة» بيه.. خبير نهضوي

أزيك يا واد يا بؤلة.. حرمتنا من أنسك ليه.. أسبوع كامل ما شفناكش يا وله.
- أهلا يا بيه.. بس ياريت لما تكلمني بلاش تقولي يا «وله» تاني!
إيه الحكاية يا عم بؤلة.. هي القوالب نامت.. والانصاص قامت ولا إيه؟
- لا يا عم.. بس وضعي الجديد.. ومكانتي الاجتماعية ماينفعش معاهم كلمة «وله» أبداً.
مكانتك إيه يا عم بؤلة.. صلي علي النبي يا عم.. ده أنت عندك دستة سوابق.
- يا عم بلاش نقلب في الماضي.. الدنيا اتغيرت يا بيه.. ثم ان كل سوابقي دي كانت لمناصرة الثورة.. وهي اللي مهدت ليها.. وولعت شرارتها.
نعم يا خويا سوابقك كانت لمناصرة الثورة.. تيجي إزاي دي.. دي سوابقك نصفها سرقة ونهب والنصف الآخر اغتصاب وتحرش جنسي!
- ايوه يا سيدي كلها كانت لمناصرة الثورة وأقولك إزاي.. السرقة والنهب كنت أعملها مع نجوم النظام السابق، وكنت أسرقهم علشان أخذ حق الناس منهم!
طيب والاغتصاب والتحرش أظن هاتقوللي لمناصرة الثورة لأنك عملتها مع بنات النظام السابق؟
- لا سيدي أنا كنت بعمل الحاجات السودة دي.. علشان الشعب نخوته تتحرك .. ويولع في مبارك ورجالته بسبب الفلتان الأمني!
طيب قلي يا سيدي ليه حرقت المجمع العلمي أنت وأصحابك من أصحاب السوابق؟
- أولاً يا عم البيه احنا سرقنا كل محتوياته قبل حرقه وده كمان كان لمناصرة الثورة زي ما قال الرئيس مرسي وأصدر عفوه عنا لاننا أردنا أن نمحي من مصر أي أثر للاحتلال.. مش المجمع ده عمله اخينا نابليون.. علشان كدة أحنا قلنا يغور نابليون ومجمعه.. مش عايزين حاجة تفكرنا بيهم.
ماشي يا سيدي سيبك من كل ده.. إيه حكاية وضعك الاجتماعي الجديد ده؟
- شوف يا سيدي أول إمبارح.. اتصل بي واحد من الإخوان المسلمين وقال يا بؤلة بيه عايزينك أنت وكل زمايلك من الأبطال اللي متسجلين خطر في الداخلية علشان تقابلوا مسئول كبير قوي في الجماعة.
معقولة يا بؤلة بيه؟
- أيوه يا سيدي.. المهم ان المسئول جمع كل المسجلين الأبطال في الاستاد وقال لنا يا جماعة مصر محتاجة لكم النهاردة.. فانخرطنا جميعاً في البكاء بعد ان نقح علينا عرق الوطنية، وهنا رددنا جميعاً مصر هي أمي.. نيلها جوه دمي.. وبعد كدة الراجل تحدث معنا بكل احترام وقال يا جماعة انتم عارفين أننا وعدنا الناس في الانتخابات الرئاسية بأن نأتي لمصر بمتين مريار دولار، والناس صدقتنا، لكن للأسف كل الدول العربية خلت بينا، وجعلونا أضحوكة بين الجماعة الليبراليين دول أنا علشان كدة جمعتكم اليوم.. علشان نؤكد للناس ان مشروع النهضة بتناعتنا مش هو «الفنكوش» ولا حاجة.. ده مشروع هيودي مصر للسما وأنتم من اليوم خبراء نهضيون.
معقولة دي يا بؤلة.. يعني أنت الآن خبير نهضوي في مشروع النهضة الإخواني.. يعني هتعمل إيه بالضبط، ده أنت كل خبرتك في السرقة والاغتصاب.
- شوف يا سيدي.. المسجلون الأبطال زملائي كل واحد له تخصص.. يعني حرامي غسيل.. ملقاط.. هجام.. حرامي سيارات.. وكل واحد منا هيشتغل في نفس تخصصه.
إزاي يا عم بؤلة.. يعني الإخوان هيسرحوكم في البلد تسرقوا وتنهبوا علشان يوفروا ال 200 مليار دولار اللي وعدونا بيها.
- لا ياعم.. شغل مخك معاك.. هم هيبعتونا للبلاد العربية اللي الرئيس ريقه نشف معاهم، علشان ننضف جيوبهم.. يعني الواد حكشة حرامي الغسيل مش هيسيب حبل غسيل عليه هدمة واحدة في بلاد الخليج، والواد شنكل الهجام هيقود زمايلك ويأخذ كل مليم من حبابي عينهم، والواد شفتورة حرامي السيارات مش هيخلي سيارة تسير علي عجلات في بلاد النفط.. كل ده هيتجمع ويرسل لمصر وبكرة نجمع أكثر من متين مريار اللي عاوزينها الإخوان.
يعني يا سيدي انتم متخيلين ان الخليج هيفلس لما تعملوا كدة يا عم دول عندهم بترول يقعد ألف سنة جاية.
- لا سيدي ما هو احنا عاملين حساب ده كمان.. احنا هنخلي السعودية تعمل الجسر اللي يربط مصر بيهم، واحنا هنيجي نخبي ماسورة ضخمة في قلب الجسر وعن طريق الماسورة دي هنشفط كل «رتر» بترول عندهم!
طيب يا عم بؤلة مش كل ده حرام.. هو احنا المصريين نقبل ناكل حرام.
- يا عم اسكت بقي ما هو الراجل بتاع الإخوان قال لنا الضرورات تبيح المحظورات، واحنا بكرة بناخد حق المسلمين من بتوع الخليج اللي الريس لسانه اتدلدل علشان يدونا قرشين فرفضوا.. يبقي ده أقل عقاب لهم.
طيب يا عم بؤلة بيه يا خبير النهضة.. يعني هتحرمني من أنسك كتير وأنت مشغول في مهمتك القومية دي.
- شوف يا سيدي.. لو وحشتك ابعتلي السلام مع أي إخواني وقل له سلم لي علي الخبير النهضوي بؤلة بيه.. وانتظر منا الخبير وحياة أمي شفعات لنخلي أمريكا تطلب منا قروض واحتمال نديهم مساعدات اقتصادية لدعم اقتصادهم المتدهور.. وكله فدا الوطن الحبيب.