أسأل رشا .. يا نقطة ومن أول السطر.... يا تسيب الدنيا سمك لبن تمر هندي !!!

خبيرة العلاقات العامة
السلام عليكم ورحمه الله وبركاته
انا مهندس ومدير مجموعة لمشروع تطوير وبتقوم بيه الشركة اللى انا شغال فيها فى محافظه البحيرة .. المشكلة التى اريد انا اخذ رايك فيها هى اننى عندما نزلت هذا المشروع و نزلت السيت كنت لوحدى وكنت ممنج الشغل و ممشى الشغل فى البرجكت فى المحافظة احنا فى محافظه ...... لينا ثلاثة سيت بنسبورت عليهم وانا كنت ممنج الموضوع لان الدنيا لسه فى الاول وما كنش فى شغل كتير هى كل الحكايه تعرف لو فيه مشاكل لحد ما الدنيا تشتغل ويتم افتتاح المشروع المهم ان ااحنا حنفتتح المشروع هنا فى ...... خلال ايام علشان كده الشركة نزلت اثنين معايا علشان نسبورت المحافظة و ننزل الثلاثه سيت بس المشكله ان فى سيت من الثلاثه سيت اللى فى محافظة البحيرة موصلاته مش سهله و بعيد علينا والطريق بيتاعه مش كويس
و الشركه انا مديها خلفيه بالموضوع ده ، وهى قالتلى انها حتشوف حد يبقى ينزل السيت ده ، فالمفروض ان انا وزميلى نسبورت الثلاثه سيت ، لحد ما يجى الشخص اللى حيسبورت السيت اللى فيه المشكلة فان الشركه قالتلى ان انا اقوم بعملية التوزيع دى وتكون بينا علشان احنا اللى عارفين الوضع ونقدر نحكم اكتر على الدنيا تمشى ازاى اكتر منهم فى الشركة فى القاهره .
فانا قلت خلاص انا اتكلم مع الناس اللى نزلت معايا و نقوم بعمليه التوزيع دى بشكل ودى بنا وبين بعض المفروض بصفتى التيم ليدر انى اكون فى السيت الرئيسى للمشروع واوزع الاثنين الاخرين على الاثنين سيت الفرعين بس انا لقيتهم مش متقبلين موضوع ان حد فيهم ينزل السيت اللى فيه مشكله فى الموصلات وبعده علينا وقالولى انهم فى الشركه انهم حينزلوا فى السيت كذا وكذا ، قلتلهم يا جماعه انا اللى جالى ان احمد هارون فى السيت ده و محمد مصطفى فى السيت ده و انا فى السيت ده بس انا لقيت ان فيه مشكله فى التوزيعه دى و ان فيه تعب عليكم فأنا اتكلمت معاهم و قلتلهم التوزيع ده مش ينفع قالولى الموضوع فى ايديك وزع زى ما تشوف الوضع الافضل بس المهم ان الثلاثه سيت لازم يكون فيهم شخص كل يوم قلتلهم ماشى .
بتكلم مع زمايلى اللى نزلوا معايا الشغل مش متقبلين الموضوع غير كده عاوزينى اتوزع زيهم ، ان انا وهما زى بعض مافيش اختلاف بينهم قلتلهم ، لا انا التيم ليدر لازم اكون فى السيت الرئيسى بس انا حبقى ابدل معاكم فى السيت التانيه علشان ما يكنش فى تعب عليكم حنزل يوم فى السيت ده ويوم فى السيت التانى وكده لقيت عندهم بعض الاعتراض و انا مش عاوز اخلى الموضوع يكون بالامر او اوصل الموضوع للشركه لان ده حيكون نقطه مش كويسه فى حقى غير كده انا مش عاوز ازعل الناس اللى معايا منى مش عارف اعمل ايه هل اتعامل معهم بشكل رسمى واحط التوزيع و اقولهم هو التوزيع كده واللى مش لاقى التوزيع ده غير عادل يكلم الشركه ولا احاول اتكلم معاهم تانى بشكل ودى ونوصل لحل للموضوع
انا بعتزر لحضرتك انى طولت عليك وغير كده انا بعتزر لحضرتك على اسلوبى فى الكتابه والكلام اذا لم يكن بشكل فرمل ، ارجوا من حضرتك انك تتقبلى كلامى وتعزرينى اذا لم اقم بتوضيح الموضوع بشكل وافى وان تتقبلى هذا الاعتزار..
رد رشا
بص يا سيدي من الواضح ان العلاقة بينك و بين زمايلك في الموقع فرندلي شوية ...وفيها عشم ...علشان كده هم بيتاملو معاك علي انك فرد زيك زيهم ...
الحل ....ادامك حل من اثنين ....يا تحط نقطة و تبتدي من أول السطر ...يعني تتعامل تيم ليدر و هو دا الوضع يا جماعة و يتبعتلهم دا بشكل رسمي ....وصورة من الخطاب دا لمدير الشركة أو المسئول الي فوقك ...يعني جواب رسمي بالتوزيع و يتحطو امام أمر واقع و تكر في الخطاب الرسمي ان هيكون فيه روتيشن بناء علي الجدول المرفق ....يعني كل واحد ينزل السيت اسبوع مثلا و يبدل مع زميله و عايز تحط نفسك في الجدول دا يرجعلك .....كده انت اتصرفت صح و بشكل عادل يعني مفيش حد احسن من حد و حطينا حدود ...و بعد كده كل الي التوجيهات تتم بطريقة مكتوبة أو موثقة علشان نقطع النقطة دي....
الحل الثاني .... انك تسيب الدنيا سمك لبن تمر زي ما هي .... و الي يمشي عليك يمشي عليهم .....و تفضل هي دي الحياه