عوكل والحاجة أطاطا حلقة رقم (2) .. عوكل رئيس جمهورية!

عوكل يجلس بجوار جدته الحاجة أطاطا، وهى تتابع شريط الأخبار على قناة النهار فرحة بما تقرأه وعوكل يرغب فى تحويل القناة إلى أخرى تعرض فيلما لإسماعيل يس..
عوكل: يا جدتى ارحمينى حرام عليكى أنا زهقت من الأخبار، فيلم إسماعيل يس حيخلص.
الحاجة أطاطا: اتنيل ما انت اهبل زيه علشان كده عاوز تتفرج عليه، يا واد ده أنا داخله بيك الأولمبياد السياسية يعنى لازم تتثقف وتتنور اسمع الأخبار وشوف البلد فيها إيه أمال حتبقى رئيس ازاى؟
عوكل: يا جدتى انتى لسه مصدقة نفسك؟ والحكاية دى؟ انتى كده بتضحكى عليا وعلى نفسك، ده انا مابعرفش اتكلم كلمتين على بعض.
الحاجة أطاطا: ي اواد من بكرة أبله رجاء جارتنا فى القلعة جاية تديك دروس عربى وانجليزى وحتخليك لبلب وبربنت وحتتكلم لغات أحسن من مرسى وماحدش حيضحك عليك زيه.
عوكل: دروس عربى وانجليزى كمان وأنا حفهم؟
الحاجة أطاطا: ايوه لازم تفهم البلد محتاجة لك يا عوكل انت أمل مصر ومصر معلقة آمالها وطموحاتها عليك يا مدهول.
عوكل: ده المتغطى بيا عريان يا جدتى.
الحاجة أطاطا: ده كان زمان لكن من هنا ورايح الوضع لازم يتغير انت بعون الله وبدماغى حتبقى رئيس الجمهورية
رئيس الجمهورية؟ حتة واحدة أنا مش بفهم فى السياسة.
الحاجة أطاطا: أنا حفهمك وكل يوم حعرفك حاجة جديدة النهاردة مثلا خد عندك المحكمة الإدارية لغت قرار مرسى ببدء الانتخابات ومرسى اتبط على لا مؤاخذه هو والإخوان والشعب كله فرحان وبيقول إن لسه القضاء بخير وماتأخونش.
عوكل: مش فاهم.
الحاجة أطاطا: ما البعيد حمار، مرسى كان معجل بالانتخابات علشان الإخوان يزوروها ويكسبوا مقاعد البرلمان ويحطوا إيدهم على البلد وخصوصا أن جبهة الإنقاذ قررت إنها تقاطع الانتخابات يعنى الملعب كان حيبقى فاضى قدامهم المحكمة الإدارية قالت قانون الانتخابات فيه عوار ولا يصلح لأن الطعون عليه كانت كتير وبكده حيرجع القانون للمحكمة الدستورية العليا للبت فيه من جديد والنتخابات حتتأجل لأجل غير مسمى.
عوكل: مش فاهم
الحاجة أطاطا: يا واد يا ابن بنت بنت بنت بنتى جننتنى أحط إيدى فى الشق منك ولا اعمل إيه معاك شكلك كده مفيش فايدة فيك أنا آخر ما حغلب معاك حرشح نفسى أنا بدالك.
عوكل: يبقى عملتى فيا خير أنا أحلامى إنى أكون سمكرى ايجبشن سمكرى ويكون عندى ورشة.
الحاجة أطاطا: شوف الواد الفقرى أقوله رئيس جمهورية يقوللى سمكرى يا واد افهم ماتبقاش غبى لكن انت حتجيبه من برة ما ابوك كان كدة وألعن.
عوكل: والنبى يا جدتى خليكى انتى رئيس جمهورية وبلاش أنا أنا ما انفعش
الحاجة أطاطا : لسه فيه وقت انا مش حتسرع واخد قرار دلوقتى لسه بدرى
عوكل: بدرى من عمرك بس انا عايزك تتسرعى ياجدتى انا كل ما بفكر فى الحكاية دى ما بنامش وبقعد مرعوب
الحاجة أطاطا: يا واد جمد قلبك مرسى كان مرعوب كدة واكتر لما المرشد قال له انت حتبقى يا مرسى رئيس جمهورية واهه بقى حصل ايه يعنى الدنيا خربت ابدا كل يوم تلاتة أربعة بيموتوا عادى البلد والعة عادى البنزين مش موجود عادى العيش بالطوابير وإيه يعنى عادى السلع غليت والمواطن المصرى بيشحت عادى فيه عصيان مدنى عادى الوزارة فاشلة عادى البلد بتتأخون عادى السلفيين طلع لهم حس عادى الإخوان بقوا سعرانين سلطة عادى الحوادث كترت فى البلد والبلطجة كمان عادى الإعلام فلت عياره عادى كل شىء بقى عادى فى عهد مرسى والقيامة ما قامتش وعادى انت خايف من إيه حيحصل إيه اكتر من اللى بيحصل فى حكم مرسى والإخوان ولا حاجة على الأقل لو انت حد شار عليك بحاجة تفيد البلد حتعملها ومش حتروح تستشير المرشد وخيرت الشاطر زى ما بيعمل مرسى يبقى عادى ولا مش عادى.
عوكل : عادى يا جدتى طالما انتى شايفة كدة خلاص أنا موافق أبقى رئيس جمهورية طالما ده حيريحك وحيفيد البلد أنا ما يهمنيش غير مصلحة البلد ومصلحة البلد فوق كل اعتبار
الحاجة اطاطا : اهه كده انت ابن بنت بنت بنت بنت بنت بنتى روح انده لى المحامى أشوف وصل لحد فين فى موضوع الحزب بتاعنا.
عوكل: حاضر يا جدتى فريرة وأكون عندك أنا والمحامى
الحاجة أطاطا : يا عوكل هاتلى معاك 4 سجاير فرط أصلى خرمانة وعاوزة اظبط دماغى
عوكل : حاضر يا جدتى مش حتأخر عليكى
الحاجة أطاطا: لأ حتتأخر ماانا عرفاك لكعى
عوكل: لأ يا جدتى المرة دى مش حتأخر عليكى
الحاجة أطاطا: لما نشوف