«رئيس الوزراء» ل»سطوطة الفنجرى»: في 2017 مش هيكون عندنا فقرا ولا عاطلين.. والجنيه هيبقى ب«دولارين»

طبعا كلكم عارفين علاقتى بالباشمهندس شريف إسماعيل رئيس وزراء مصر.. الراجل دا حبيبى من أيام الجيزة.. أجريت معه حوارات كثيرة منذ أن كان وزيرا للبترول.. دائما عمنا شريف كان متفائلا.. حتى في أحلك الظروف
يعنى مثلا في عز أزمة الغاز وطوابير البنزين وأزمة الأنابيب كان بيقول لى بُكرة هتشوفى ياسطوطة هانم إن شاء الله مصر مش هيبقى فيها أزمة بنزين خالص.... وقال لى: حتى الكهرباء مش هتنقطع تانى.. ولا هتسمعى عن طوابير ولا غياب لأنابيب البوتاجاز
كان بيقولى كده في عز عهد الرئيس المعزول محمد مرسي.. وأنا بصراحة ماكنتش بصدقه خالص.. حتى قُرائى كانوا يقولون لى إن الكلام ده مش معقول.. لكن الزمن لف ودار وبقدرة قادر اختفت أزمة البنزين وانتهت طوابير الأنابيب.. والكهرباء أصبحت ضيفا دائما لا تنقطع عنا طوال ال24 ساعة بمجرد عزل محمد مرسي.. إزاى بقى.. أنا معرفش!
بالأمس التقيت صديقى شريف إسماعيل في إحدى المناسبات.. حيث كان أحد أصدقائنا من رجال الأعمال المعروفين يزوج ابنه البكرى
جمعتنا ترابيزة واحدة.. أخذنا نتبادل الحوار الذي لم يخل من الفكاهة والقفشات كعادتى معه كلما التقيته بعيدا عن مقر عمله..
قلت له طبعا أيام مرسي كانت حمادة ودلوقتى حماده تانى خالص
قال: عايزة تقولى إيه ياسطوطة هانم هاتى من الآخر
قلت: يعنى كل اللى أنت قلته أيام مرسي اتحقق.. لأنك من الواضح إنك كنت عارف ايه اللى بيحصل في الكواليس ساعتها.. تقدر تقولى بقى مصر هيبقى شكلها إزاى في 2017؟!
قال: مصر هتشوف اللى عمرها ما شافته ياستى.. واعتبرى ده وعد!
قلت: والنبى إيه.. يعنى الأسعار هتزيد أكتر من كده؟!
قال: أسعار إيه يابنتى.. دى كلها مرحلة وإحنا هنعديها خلال شهرين تلاتة.. الأسعار هتنزل للحضيض وكيلو العدس هيبقى ب3جنيه
قلت: إزاى ياراجل ده الجنيه ما بقاش يساوى بصلة.. كيلو البصل ب 8 جنيه يابيه، والكيلو فيه أربع بصلات.. أنت بتقول إيه؟!
قال: كيلو البصل هيبقى بجنيه ونص.. انتى ناسية إننا عندنا مليون ونص فدان جاهزين للزراعة؟!
قلت: لأ مش ناسية!
قال: أهو المساحه دى كلها بقى هنزرعها بصل
قلت: تصور يا معالى الريس.. كيلو السكر وصل ل15 جنيه.. أمال في 2017 هيبقى بكام إن شاء الله؟!
قال: هيبقى ب3 جنيه إن شاء الله!
قلت: نعم.. أنت هتجننى؟!
قال: طب تتجننى ليه.. هو انتى ناسية إننا عندنا مليون ونص فدان جاهزين للزراعة؟!
قلت: لا ياسيدى مش ناسية!
قال: أهو كل المساحة دى بقى هنزرعها قصب سكر!
قلت: آه بقى.. والرز اللى وصل سعره ل11 جنيه هتعمل فيه إيه؟!
قال: لا الرز دا هيبقى على قفا مين يشيل.. انتى بس اطمنى وطمنى الشعب على مسئوليتى إن سعر كيلو الرز لن يزيد علي3 جنيه بأى شكل خلال العام الجديد 2017.
قلت: ودى هتحلها إزاى بقى؟!
قال: ماتنسيش ياست سطوطة إننا عندنا مليون ونص فدان!
قلت: ما أنا قلتلك مش ناسية ياسيدى!
قال: أهو المساحة دى كلها بقى هنزرعها رز
قلت: وحياة أبومعاليك ياريس متجننيش.. ده الدولار بلغ سن الرشد خلاص ووصل 21 جنيه!
قال: عارف ياستى.. وإيه يعنى.. ماهو ده اللى إحنا عايزينه!
قلت: لااااااااااا والنبى.. إزاى دى كمان!
قال: شوفى ياستى ولا سيدك إلا أنا.. الدولار بعد أن تخطى مرحلة المراهقة وبلغ سن الرشد، ووصل ل21 جنيه خلال عام 2016.. إحنا كنا عارفين أنه هيوصل لسن الشباب ويبقى ب30 جنيه.. ومن المحتمل يتعدى مرحلة الرجولة خلال 2017 ويوصل ل40 جنيه.. وانا أعتقد أنه هيوصل ل60 جنيه على نهاية العام القادم، وبكده يكون وصل لسن المعاش ويغور يموت بقى ويريحنا منه خالص
قلت: طب وبعد ما يغور ويريحنا؟!
قال: ساعتها الجنيه هيبقى ب2 دولار
قلت: وده ممكن يحصل إمتى إن شاء الله. في المشمش؟!
قال: ده هيحصل قبل نهاية 2017 إن شاء الله
قلت: شكلك كده بتسخر منى يا معالى الوزير.. يا راجل ده إحنا مش لاقيين العلاج.. الأدوية اختفت من المستشفيات والصيدليات كمان!
قال: كلها شهور والأدوية هتبقى مرطرطة في السوق.. ما تقلقيش
قلت: كمان دى هتحلها في 2017؟!
قال: طبعا.. العلاج هتلاقيه في المستشفيات الحكومية وهيبقى على أعلى مستوى إن شاء الله
قلت: إزاى بقى؟!
قال: ماهو إحنا ناويين نبيع المستشفيات الحكومية إن شاء الله
قلت: أهو ده بقى اللى كان ناقص.. ياراجل الشباب خلاص هيطفش من البلد بسبب عمايل الحكومة بتاعتك والهجرة غير الشرعية بقت حلم أي شاب دلوقتى!
قال: أهو خلال 2017 بقى مصر هتبقى الأولى في العالم اقتصاديا.. والشباب من كل الدول هيهاجر لمصر.. واعتبرى ده وعد!
قلت: طب شباب العالم هييجى عندنا.. ليه بقى هيشتغل إيه إن شاء الله!
قال: هيشتغلوا في جنى العنب وحدايق الموز ياستى!
قلت هو إحنا عندنا مزارع عنب وحدايق موز وأنا معرفش؟!
قال: هو انتى ناسية إننا عندنا مليون ونص فدان جاهزين للزراعة واللا إيه؟!
قلت: ياراجل متخلينيش أشد في شعرى.. دى المليون ونص فدان علشان تجهز للزراعة قدامها لسة كام سنة.. ده الرئيس السيسي نفسه مابيقولش كلامك ده لأنه عارف إن ده مشروع قومى عايز شغل سنين.. ده إحنا عندنا الشباب عاطل على القهاوى وانت جاى تقولى شباب العالم هييجى عندنا؟!
قال: خلال 2017 مش هيكون عندنا ولا عاطل واعتبرى ده وعد !
قلت: ماتخلينيش أشد في شعرى يامان.. الناس مش لاقية تاكل وأنت قلبك مريحك كده؟!
قال: مش هيكون عندنا ولا فقير في مصر خلال 2017.. بقولك الجنيه هيبقى ب 2 دولار ياست إنتى.. هو إنتى ما بتفهميش؟!
قلت: وعلشان بفهم.. أحب أقولك كل سنة وأنت طيب وقوم بينا بقى نلحق البوفيه أحسن الأكل هيخلص.. وأنت عارف أن أسعار اللحمة بقت نار!
قال: لا أنا هاكل حلو بس علشان ماعنديش سكر في البيت!