بالصور.. أطرف مواقف المصريين في «الشغل».. طبيب: «مريض قالى أحط الحبوب قبل المرهم».. مدربة جمباز: «طفلة سألتنى انتى بتشربي زينا».. شيف: «زبونة أكلت عيالها ومشيت».. وصيدلي: «واحدة طلبت مجاد حلوى»

لا يتفهم البعض أمور عمل الآخرين مما يعرض أصحاب الأعمال باختلافها إلى أطرف المواقف التي تحرجهم في بعض الأوقات، وهو ما رواه البعض عبر موقع التواصل الاجتماعى "فيس بوك".
- انتى بتشربي زينا
قالت رانيا: "أنا مدربة جمباز اديت البنات بريك يشربوا وأنا روحت أشرب، عندى بنت بتقولى إيه دا انتي بتشربي زينا أنا اتقلبت ضحك".
- انتى بتعرفي في النقاشة؟
وأضافت ميمي: "أنا كنت بشتغل مهندسة ديكور ورايحة أعمل معاينة لشقة وجت العميلة وجوزها بيقولوا عاوزين ألوان أحمر وأصفر وأزرق في غرفة الأولاد، فقولتلها الديزين كده كتير وماينفعش وهيبقا أوفر راحت ردت عليا، قالتلى انتي مش بتعرفى فالنقاشة والله بلمت وقولت أنا مهندسة ياحاجة".
- أحط الحبوب قبل المرهم
وروى أحمد: "كان مرة جالى واحد بمرض جلدي فكتبتله مرهم وحبوب فلقيته بيقلى أدهن المرهم الأول ولا أحط الحبوب، فضلت باصصله دقيقتين كدا ومبردش وعامل "ماسك فاس" اللى على وشك ينفجر من الضحك لغاية ما فهم لوحده ومشي".
- فين الشحن؟
وقال محمود: "واحد شاكله أول مرة يمسك موبيل وأول مرة يسمع بالشحن على الهوا في جاي يقولى اشحنلي ب10 على الهوا قولتله كام رقمك وبعد ما شحنتله بقوله الفلوس، قالي فلوس إيه ما البطارية زي ما هيا رايحة تفصل أهي ياعني لا شحنت ولا حاجة".
- شالت أكتر من 8 أطباق حلويات
وأضاف ميدو: "أنا شغال شيف حلواني زبونة مصرية بتسألنى ممكن أخد أكل من البوفيه قولتلها حضرتك هو معمول ليكم أصلا.. شالت الأطباق بتاعت الحلوأ أكتر من 8 أطباق، وتحط قدام ولادها وتقولهم قولوا لعمو شكرا فضلت أسبوع أضحك".
- برشام مجاد حلوى
وقال أحمد: "مرة كنت في صيدلية بجيب علاج دخلت واحدة بس شكلها مش متعلمة، فبتقول للصيدلي لو سمحت عايزة برشام مجاد حلوى، الصيدلي ساعتها تنح وأنا فصلت ضحك بس خطر في بالى إنها عايزة مضاد حيوي فبقولها قصدك مضاد حيوي قالتلى أيوة هو ده".