حلم قديم.. يراود المهندس خيرت الشاطر.. منذ أن كان فى فصل تانية تانى، بمدرسة الإخوان "التخريبية"... عفوًا التجريبية.. معلش أصل لوحة المفاتيح اللى بكتب عليها ساعات بتخرف.. المهم إن التلميذ النجيب طول عمره "شاطر" وبيلعب بالبيضة و"الطاسة" يادى النيلة على "الكيبورد" بتاعى... اقصد بالبيضة والحجر.. المهم تانى إن "الشاطر" طول عمره بيحلم يكون زعيم.. وأنا بعترف بذكائه وشخصيته القوية.. وده واضح من يوم ما كان رائد فصل تانية تانى.. وكان بيبقى عنده شعور ب"اللذة" وهو بيكتب اسم أى واحد بالفصل بيتكلم.. وكان بيبقى سعيد لما يشوف المدرس بيضرب زمايله ويقوله برافو يا واد يا "خيرت".. أنت ليك مستقبل باهر إن شاء الله لما تكبر وتتجوز "عرفى".. ومن يومها والشاطر حاطط فى دماغه الجواز العرفى.. جواز ساهل والفلوس كتيرة والحمد لله.. وعشان كدة عمال يتجوز "عرفى" وغير عرفى وكله ب"شرع الله" طبعًا.. لكن الحلم الكبير للتلميذ خيرت الشاطر.. هو أنه يتجوز "مصر" عرفى وعلى سنة الله ورسوله "الاتنين مع بعض"، خدو بالكو، ويشهد على كتب الكتاب المرشد السرى الدكتور "محمد بديع"... وعشان كدة عمال يعاكس فى البنت الدلوعة "مصر" ويتحرش بيها وماشى وراها منين ما تروح... لو راحت الميدان وراها... لو راحت الاتحادية وراها.. لو راحت ديوان المظاليم عند الريس وراها.. لو رايحة السوبر ماركت تشترى "لبان" يشترى هو كمان ويمشى "يطرقع" باللبانة وراها.. وهى ما عليها غير تقوله احترم نفسك أحسن والله العظيم هقول لجبهة الإنقاذ الوطنى! يرد عليها بقى انتى يا "جربة" هتقولى للجبهة.. برادعى مين وحمدين مين دول اللى عاجبينك.. هتجوزك ان شاء الله وإلا "بكره تندم يا جميل".. وساعتها هعرفك! تقاطعه وتقوله: هو انت بتعرف؟ اصل بيقولوا ما بتعرفش ؟ يرد الشاطر ويقولها: طب جربى يا حلوة.. وانا هعرفك مين الشاطر خيرت بجد! تقوم البنت "مصر" تقوله كان غيرك أشطر.. د أنا مصر... كبيرة أوى... أما أنت مهما تكون هتفضل نونو... يا نوووونووو ! وهنا يغضب الشاطر ويقولها بكرة تشوفى... إن ما طلقتك "مرسى" واتجزوتك أبقى شوفى! فترد عليه "مصر" وتقوله: يا سم.. لا دمك خفيف زى صفوت حجازى بالظبط.. يا عم روح د انت شكلك يقطع الخميرة من قصر الاتحادية.. سلام يا نووووونووووو ! وفى نهاية "الحدوتة" يبقى السؤال: هل يستطيع الشاطر زواج مصر عرفيًا.. حتى ولو بعُرف الديك ؟ مستنى الإجابة منكم يا رجااااااالة... سلااااااااام