محمد فؤاد أبوالعز يكتب: عاوزين نموت

كان الهتاف المدوي من القلوب ..يانجيب حقهم يا نموت زيهم ...مهو صحيح انا مش احسن من احمد بسيوني ولا مصطفي الصاوي ولا كل الشهدا اللي ماتوا دول ...بس كل يوم بيموت شهيد جديد..الثورة في يناير ..كل يومين يحصل جريمه ...ونضيف شهيد جديد ..ماسبيرو...التحرير ...محمد محمود ..مجلس الوزرا ..بورسعيد ...اه يا وجعي ...اه يا وجع قلوب الامهات في مصر ..اه يا كل شهيد دمه سال ..شاب تعب عليه امه وابوه ..من وهية حامل فيه ومبسوطة وهيه بتحط ايدها علي بطنها وتحس بيه بيتحرك...لما اتولد وفرحوا بيه او شالوا همه هيأكلوه منين وازاي هيعيش في بلد ما بترحمش ...ازاي هيلاقي ياكل وازاي هيتعلم وازاي هيتجوز..شافوه بيكبر كل يوم ..دخل ابتدائي ونجح ..نفسهم يبقي دكتور ...نفسهم يبقي مهندس ..وده نفسه يبقي لعيب كورة ...ويبقي نجم مشهور...هوه رجله حلوة أوي ولعيب بس محدش عارفه ولا حد هيسساعده ...دخل اعدادي وكل يوم يرجع يحكي لأمه الي حصل في المدرسه ..وتطبطب عليه وتقوله معلش ..لو شتمك قوله الله يسامحك وخليك احسن منه ..الله يسامحك ؟؟ كام واحد فينا بيعرف يقول الكلمه دي ؟؟ كام واحد يعرف يسامح في البلد دي ؟؟
لما راح ثانوي كانت مشكلة وهياخد علمي ولا ادبي وهيدوه دروس ازاي ...يارب نقدر نعلمه عشان يبقي راجل وملو هدومه ...الواد بيحب الكورة موت..أهلاوي ولا كأنه متربي في الاهلي ...زمالكاوي بيحب الزمالك اكتر من عنيه ...بس بيصلي كل الفروض الحمد لله ..وبيزاكر وممكن يجيب مجموع ويدخل طب ...ياه ..يارب اعيش واشوفك دكتور قد الدنيا وفاتح عيادة وتساعد الناس يا بني ..يارب اشوفك عريس في الكوشه ...
لما كان بيزاكر وبينام تعبان وتدخل امه تطمن عليه في سريره ..تدعيله يا رب ينجح يارب ..مش مهم يكون شاطر ولا متفوق بس ده ابنها ...سهر الليالي وتعب السنين ..حلم العمر الي ما حيلتهاش غيره ...ده كان ولد وحيد علي خمس بنات ..كل شويه تقوله لو مابقتش راجل وشيلت المسؤليه هنجبلك اخ وتدخل الجيش ..
الواد شقي اوي ومالي البيت عفرته ...يدخل يعاكس في اخواته البنات ويزعقلهم ...قال ايه عامل فيها راجل ..وحاطط صورته في الاوضه وصوره في الصاله ..قال يعني بقي نجم ...ربنا يخليك يابني وتسند ضهري في يوم وجعي ..يارب افرح بيك...
امك مش عاوزاك تتعلم وتموت في البحر لما تحاول تهاجر وتسيب البلد عشان يأست تلاقي شغل..امك مش عاوزاك تتغرب ..والله علي عيني يا حبيبي لو هتسافر بره ..بس صحيح هتعمل ايه وهتجيب فلوس منين تتجوز وتتاجر شقه ..وتصرف علي بيت ..
يااااااه بقي معقول ربنا هيديني طولة العمر واشوفك عريس ولابس بدله ومعاك بت حلوة كده في الكوشه ..واجي احضنك وابوسك واقول والله وكبرت يا حته عيل كنت بشيلك وبغيرلك هدومك امبارح ...ربنا يحييني لما اشوفلك حتة عيل واشيله والعب معاه ..مهو اعز الولد ولد الولد ..
بس منين كل الاحلام دي ..دانت يادوب عارفين نصرف عليك دلوقت ..انت بتحوش مصروفك عشان تدفع تمن تزكرة الماتش ..والله يا حبيبي لو معايه ما هتأخر عليك ...والله انا بستخسر في نفسي الدوا بتاع ضهري وبديلك الفلوس يمكن تنبسط وتعرف تزاكر وتشد حيلك عشان ربنا يكرمك...
امك خايفه عليك اوي من بكره ..البلد دي ما بترحمش ..ناسها وحوش ..اللي فوق بيدوس علي اللي تحت بالجزمة ..حتي ما بياخدش باله انه فرمه ...بس بينضف جزمته لما ياخد باله من دمه..احنا غلابه يا بني والي مالوش ضهر بينضرب علي بطنه ..خليك في حالك الله يخليك وما تروحش ناحية التحرير ..انا ماليش الا انت ..اوعي تمشي في المظاهرات ..خلي بالك وانت بتعدي الطريق ..السواقين بقي معندهمش رحمه ..انت علي طول كده بتضحك يعني علي كلامي ...امك خايفه عليك...لو انت مش غالي عند نفسك ..ولا عند البلد دي كلها ...كفايه انك غالي عليا يا حبيبي...
عاوز تروح الماتش ...تاني ..بس خليك المره دي شوفه قدام التليفزيون احسن ..بلاش سفر..قلبي بياكلني ...بردو مش هامك كلامي ...روح ربنا يجعلك في كل خطوة سلامة ..خلي بالك وتقل هدومك عشان الدنيا برد اوي ..وسدرك مش ناقص من الكحة..والبس الكوفيه عشان تبقي تلفها علي دماغك..
ابنها سافر وراح يشوف ماتش ...ابنها راح ومارجعش...ابنها مات ..ابنها اتقتل ...ابنها دمه سال من غير ذنب ..ابنها مش هيشوفها تاني ولا هيكلمها ولا هيرد عليها ..ابنها مش هيتجوز ولا هتشوفه عريس ..بس هتشوفه في كفن ابيض ..مالوش جيوب ولا فيه رتب ولا نياشين بتتحط عليه ...ابنها اتحط في كفن ...عشان ناس تانيين يعيشوا علي كراسيهم ..ويزودوا فلوسهم ...ابنها مات عشان حاجات تانيه خالص مالوش دعوة بيها ...ابنها مات ...ومحدش عارف يجيب حقه...ابنها مات
وكلنا هنموت ...زيه زينا
كلنا كنا خالد سعيد ...بقينا كلنا سيد بلال ...بقينا كلنا احمد بسيوني ...بقينا كلنا مينا دانيال ...بقينا كلنا احمد حرارة ورضا عبد العزيز الي عينيهم راحت ...بقينا كلنا احمد سرور ...بقينا كلنا عماد عفت ...بقينا كلنا علاء عبد الهادي ...بقينا كلنا مشاريع اموات ...بس عشان ناس تانيين يعيشوا علي كراسيهم ..حتي لو كانت كراسي من لحمنا ...بتعوم علي بحر من الدم ...
اقتلونا كلنا ...مابقاش مهم مين يعيش ومين يموت ...
مات الكلام...