بالصور.. أطرف حكايات رواد «فيس بوك» مع العفاريت.. «فارس»: «العفريت حدفنى 7 مرات».. «محمد»: «شوفت والد صاحبي وهو مسافر وبعدها مات».. و«محمد»: «كنت بسمع قصص رعب وشوفت خيال بيتحرك»

روى رواد موقع التواصل الاجتماعى "فيس بوك" مجموعة من أصعب اللحظات المرعبة التي مرت عليهم، عبر دعوة بعنوان "احكى موقف رعب حصلك".
النور بينور ويطفى
وقال "أحمد": "كنت مرة قاعد فالشقة لوحدى المهم كنت قافل كل الأنوار ماعدا نور الأوضة شربت وقفلت النور ودخلت تانى الأوضة ونسيت الباب مفتوح وانا قاعد كدا لقيت نور الحمام عمال ينور ويطفى تانى رحت فتحت أنوار الشقة كلها عشان أريح نفسى وأنا خايف أصلا، المهم دخلت تانى الأوضة ونور الشقة كله مفتوح لقيت فجأة نور الصالة اتطفى وكل الأنوار ماعدا نور أوضتى والحمام روحت طالع قاعد على السلم لحد ما أهلي ييجوا من بره".
ضحك أطفال
وروى "حسين": "كنت في الصيف من 6 سنين ولا حاجة وكان الحاج نايم والبيت كله بايت بره وقاعد لوحدى في الأوضة وشوية وسمعت صوت ضحك أطفال غريب كده جاى من جيرانا اللى فوق قلت عادى أطفال سهرانين وصيف بقى أما ركزت افتكرت أن جيرانا اللى فوق في المصيف وأصلا لسه مجوش".
والد صاحبى المسافر
وقال "محمد": "كنت مروح بليل وشوفت واحد صاحبى مروح ومعاه راجل كبير في العربية، تانى يوم قولتله شفتك إمبارح قالى طيب موقفتنيش ليه قولتله كان معاك راجل كبير قولت يمكن مش فاضي قالى راجل مين!! وصفتله قالى ده والدى بس هو في الأردن استغربنا والموضوع عدى.. بالليل أهله اتصلوا بيه قالوله والدك توفي".
العفريت حدفني
قال "فارس": "كنت رايح الأرض الزراعية الساعة 2.30 الفجر قابلنى واحد مسكنى من رجلى وحدفنى من فوق العمود واستنانى الناحية التانية وقبل مقع حدفنى تانى استناني الناحية التانية برضو كررها نحو 7 مرات أغمى عليا في المرة الرابعة وبعد خمسة أيام بعد مبقيت فايق من الغيبوبة كنت نايم في البيت وفجأة لقيت واحد بيقول نصحت يافارس اعااا "بصوت اللمبى" وبعدها هوب دبل كيك دخلت غيبوبة تانى".
صراخ وخيال
وقال "محمد": "كنت بسمع أحمد يونس ونمت والسماعات في ودنى وأنا نايم حصل الصراخ اللى بيحصل وسط الحكاية قمت مفزوع من النوم لقيت خيال بيتحرك قدامى والنور قطع كنت خلاص هموت بس الحمدالله أنا حي أهو".