رسالة خاصة من يسري فودة لمخرج «اشتباك»

وجه الإعلامي الكبير يسري فودة رسالة خاصة إلى المخرج محمد دياب بمناسبة فيلمه الجديد «اشتباك»، الذي أثار موجة من الجدل في الآونة الأخيرة.
وكتب "يسري" عبر صفحته الشخصية على موقع التواصل الاجتماعي «فيس بوك» معلقًا على الفيلم: من كام يوم أرسل لي الصديق العزيز محمد دياب نسخة من فيلمه الجديد الذي نال إعجابًا وتقديرًا على مستوى دولي حتى قبل عرضه في مصر.
الفيلم بيتكلم عننا دلوقت، وبما أننا دلوقت ممزقين إلى أبعد حد فأكيد عمره ما هيرضي حد، كتبت له رأيي بأمانة، وهو تقبله بسعة صدر، وأسمح لنفسي بإعادة نشره هنا، علمًا بأنه يواجه تحديات كبيرة في عملية التوزيع، ولكنه كما قال لي قبل قليل، متفائل.
"عزيزي محمد..
شاهدت الفيلم 3 مرات، أول مرة اتضايقت، تاني مرة عذرتك، تالت مرة حبيتك.. اكتشفت بعدين إني في الغالب اتضايقت في الأول عشان أنا عِشت القصة دقيقة بدقيقة كصحفي وكمواطن، حسِّيت في الأول إن نظرته ضيقة، وإنه ظلم بعض الأطراف، وإنه كان حُنين مع أطراف تانية، وإن حتى النص المكتوب على الشاشة في الأول كان لازم يكون أدق وأشجع.
وتابع يسري: ولما شوفته تاني كنت بشوفه بعين مختلفة وسؤال جوهري: عمل زي ده إزاي يخرج للنور في ظروف زي دي والثورة في أضعف مراحلها؟
دا سؤال كان بيواجهني أنا شخصيًا بعد ما كتبت مسودة كتاب «آخر كلام» وقررت أنشره في نفس الظروف ونفس الحالة، عذرتك لأني مريت بنفس الصراع اللي باتخيل إنك مرِّيت بيه: يا ترى أستنى لحد ما أقدر أقول كل اللي أنا عايزه واللا ممكن أمرر الحد الأدنى دلوقت؟ واضح إني انتصرت للخيار التاني اللي واضح إن انت كمان انتصرت له. معنديش شك بناءً على المقارنة دي إنك عندك قصص كتيرة عن المشكلات اللي قابلتك لحد ما شاف النور.
وأضاف يسري: لما شفته تالت مرة كانت عندي فرصة أركز في الصنعة، أول حاجة حبيتها هي الفكرة في حد ذاتها، فكرة إن القصة كلها داخل عربية ترحيلات من أولها لآخرها، وواضح إن فيه شغل أتعمل كتير على اختيار النماذج الممثلة لمصر، ولو إني شايف أن القوة الجديدة اللي أعلنت عن نفسها في 25 يناير اللي إنت وأنا منها لم تُمثَّل بشكل واضح، ظلمتنا يا شيخ، ورغم التمثيل القوى لنماذج الإخوان والسلفيين والكنبة والدولجية والمهسترين، حضَّر نفسك لهجوم شديد من كل الأطراف، خصوصًا الإسلاميين، ويمكن يكون عندهم حق في بعض المشاعر بالنظر إلى أن الداخلية أخدت حقها وزيادة من "الأنسنة" مقارنةً بالواقع بشكل عام، ولن يفيدك في ذلك إنك إديت الإسلاميين هم كمان حقهم من الأنسنة.
واختتم "يسري" كلامه قائلًا: وأخيرًا، إنك تقدر تحافظ على انتباه المشاهد طول الفيلم في لوكيشن واحد مخنوق، هو في حد ذاته علامة على أنك "شببت عن الطوق" يا مبدع.
ألف مبروك، وكان نفسي بجد أقدر أحضر الافتتاح، بس تتعوض إن شاء الله.
" يسري".