المنيا ياريس !

سيادة رئيس الجمهورية.. تحية طيبة وبعد،
والله ياريس أنا مش بكتب لحضرتك علشان أنا مسيحي أو حاجة، لأني أساسًا عُمري ماتربيت على إن في بيننا فرق، أنا بكتب لحضرتك لأن أنا "مصري "..
لأ ياريس ده مش اسمي دي جنسيتي كدة "مصري"، يعني ليا نفس الحقوق وعليا نفس الواجبات، وبنفذها بالحرف صدقني، بس في ناس قررت إني مش هينفع آخد الحقوق دي، ولا حتى أنفذ الواجبات، وخونوني، وخلّوني عميل، لأ وكفروني !! ومشكلات كتير كدة مش عايز أدوش دماغ حضرتك بيها.
أنا بس بكتب لحضرتك علشان اللي بيجري في المنيا ده حرام، وكتير، وأكيد حضرتك ماتعرفش، فقلت يمكن يقع في إيد حضرتك المقال فأبقي عملت اللي عليا.
ياريس في ناس في المنيا بتتقتل وبيوتها بتتحرق، طب تصدق إنت.. لامؤاخذة تصدق حضرتك إن في واحدة ست هناك عجوزة في مجموعة ناس عريتها ومشيت بيها في الشارع "أه والله زي مابقولك كدة".
ياريس والله الناس هناك شايفة ذُل وكأنهم مش مصريين، ضرب وشتيمة ومهانة وحاجة آخر مأساة، والمحافظ مش بيتدخل، ومدير الأمن تقريبًا مش بيروح، والدنيا هناك سداح مداح، والفتنة مفتوحة على البحري.
وفي ناس كتير بتحاول تحسن الأوضاع هناك، بس الغريب إن الأوضاع مابتتغيرش، ولا حتى الدنيا بتهدي، والمظلوم مظلوم بقاله فترة وزي ماهو، ماحدش حتى حاول يجيبله حقه، وده كلام أنا عارف إنه مايرضكش، فحضرتك كدة لازم تدّخل وبسرعة.
أنت الوحيد اللي قادر يوقف كل عمليات البطش اللي بتحصل هناك، بإلقاء القبض على الناس دي، وييجي اليوم اللي نشوف فيه إن كل واحد بيجيله حقه ياريس بقي.
كمان نفسي أسأل حضرتك سؤال ياريس.. هي الناس دي ذنبها إيه ؟؟
كل ده علشان عايزين يصلّوا ؟؟ أومال لو بيهربوا مُخدرات أو بيتاجروا في السلاح كان إيه اللي حصل.!!
أنا و90 مليون واحد كمان خايفين، وزهقنا من التحرش، والبطالة، والجهل، والوسايط، وعدم تكافؤ الفرص، والمرور، والصحة، والتعليم.. فمش هنبوظ إنسانيتنا كمان..الإنسانية ياريس..
وحياتك ياريس.. المنيا.. المنيا ياريس.. " أبوس إيدك "