بختك اليوم "الثلاثاء" من هريدى نيوز

يا تكون محظوظ يا تكون منحوس.. حظك عندنا فى هريدى نيوز.. من غير ما تضرب بوز.
الحمل
افرح واتنطط.. صحابك القدام ومعارفك هيظبطوك ويعدوك، حتى لو من خرم إبرة، حتى حبيبك راضى النهاردة عنك.
صحيا: لو رحت الملاهى أو فكرت تغنى فى الحمام هتحس بسعادة.
الثور
مفاجأة سعيدة فى انتظارك، بس خلى بالك من أى بالون ممكن يقع، أو أى قطر يتقلب، أو أى ماتش فى استاد، أو برج يتهد فوقك وانت خارج مع حبيبك.
صحيا: هو صحيح.. صحيح.. صحيح الهوا غلاب.. بيجيب رشح وكحة واحتقان.
الجوزاء
وريهم نصك العنيد، وكشّر لهم عن أنياب الجوزاء، وممكن يحطوك مكان أسدين قصر النيل.
صحيا: تأتى الرياح بما لا تشتهى المراكب، فكّر تغير عصبيتك، لو كنت ماشى على رجليك أو كنت فى العربية راكب.
السرطان
مستنيينك زى الذئب مستنى فريسته، بس على مين.. انت فلة شمعة منورة، وقلبك أبيض ولا بياض الثلج.
صحيا: اوهامك لنفسك هتتعبك.. اشرب مية وكل سبانخ زى "باباى".
الأسد
ما فيهاش حاجة لو طلبت من حد يساعدك فى إنك تحسب 10+2+4 يساوى كام.. كلنا نسينا حاجات كتيرة بعد ما سبنا المدرسة.
صحيا: أشتاتا أشتوت، كل ما تعدى على بتاع كبدة بلدى تاكل منه، يا من التخمة يا من الزيت هتموت.
العذراء
تعمل موسيقى بالخلاط فى البيت أو تخمس بالعربية فى الشارع، أى حادثة انت اللى هتكون مسئول عنها، وحبيبك بيشك فيك "من غير ما تقول هو مش دبوس".
صحيا: مضطر تلعب رياضة مجبر أنت لا بطل يعنى.
الميزان
حد بيراقبك وبيبص عليك "ما تقلقش"، ده معجب وبيفكر يصارحك.. بس اليوم فى مجمله مش على مستوى طموحاتك العظيمة.
صحيا: عيد ميلادك قرب، استعد بقى وخفّ حلويات "هتضرب " كتير قريب.
العقرب
سوبر "عقرب" انطلق.. النهاردة عندك مغامرات، وهتنقذ حد من مشكلة ومعجبينك هيكتروا، وفيه "ميزان" النهاردة هيأثر عليك تأثيرًا رومانسيًّا.
صحيا: الثوم حلو ومفيد وفيه اختراع اسمه لبان.
القوس
تحسن تدريجى بعد ما حاولت تأخذ قرارات صعبة الأيام اللى فاتت، اسمع لاعتذار حبيبك وبلاش غرور مستمر.
صحيا: فكر تنط الحبل أو تنط من فوق جبل، أى حاجة تخرج فيها طاقتك.
الجدى
كتاب حياتك يا "عين" ما شفت زيه كتاب.. الفرح النهاردة سطرين، والباقى كله عذاب ..
صحيا: بما إن الدنيا دايما زحمة عشان صحتك ابعد عن الزحمة وغنيلها "زحمة يا دنيا زحمة".
الدلو
فرحان بنفسك عشان بتعرف تستفز الناس.. بلاش زمايلك عشان ما يلبسوكش فى حيط.
صحيا: الوقت كالسيف إن لم تقطعه مش هيسمى هو عليك.. وهتلاقى طريقك مسدود يا ولدى.
الحوت
الفلوس بتغير النفوس، ولو ما حلتش أزماتك بسرعة هتحس بقلق.. وشكل الأخبار الوحشة النهاردة أكثر من الحلوة.
صحيا: ما تخليش حاجة تأثر على نومك، الحر جاى وما فيش كهربا وفيه نهضة كتير.