اعرف حظك اليوم "الأحد" من "هريدى نيوز"

ياتكون محظوظ ياتكون منحوس، اعرف حظك من هريدى نيوز ومن غير زعل.
الحمل
مع بداية الحر فيه موجة هوا حلوة جاية عليك.. عصفور فى الإيد أحسن من عصفورين بيصوصووا على الشجرة.
صحيا: حاول ترفه عن نفسك زى الأيام اللى فاتت.
الثور
كل يوم طموحك بيزيد، بس حاسب يدلدق منك ويقع على الأرض، وممكن ييجى واحد ويقولك الحق اللى وقع منك.
صحيا: عندك حساسية فى مشاعرك، حاول تطهر قلبك بمطهر قوى.
الجوزاء
حط رجل على رجل وشغلك هيبان، وحقك هيرجعلك، وهتحس إن اليوم مريح وسعيد، ولازم توضح لحبيبك كل مواقفك المبهمة.
صحيا: دلّع نفسك ع الآخر، انت النهاردة تستحق الدلع.
السرطان
يا طاهرة يا ام الحسن والحسين اكفيه شر الحسد والعين.. وشوية ثقة على بخور بالمستكة هتبقى زى الفل.
صحيا: اغسل يديك قبل الأكل وبعده، وبطّل تلعب فى الشارع.. انت كبرت على كدة.
الأسد
لما تحب تعمل أسد اعمل أسد على أعدائك مش على حبيبك.. وقول لنفسك لا تعايرنى ولا اعايرك الهم طايله وطايلك.
صحيا: إلى الرجل / المرأة المولودين فى برج الأسد "اللحم فيه سم قاتل" ابعتوه على "فيتو".
العذراء
لو جالك الطوفان حط "حبيبك " تحت رجليك.. بس اتأكد الأول إن الطوفان جاى بدل ما تبيع وتضيع زى بديع.
صحيا: صحتك زى البمب بس "حاسب يفرقع فى وشك".
الميزان
لو تعرف ترقد وتبقى النهاردة "مسهوك " و"سهن" هتعدى اليوم بسلام وضميرك هيرتاح.
صحيا: الحياة كل يوم على حال وانت صحتك على أدك.
العقرب
اقف أدام المراية وقول "أنا ماسك نفسى".. تقدم فى شغلك وتقدم فى الحب، وأعداء عينهم تندب فيها رصاصة.
صحيا: العصبية آخرتها "طين على مية"، يعنى هتبقى طين مبلول.
القوس
زيارات رايح جاى، ولا نافعة فى شغل ولا فى الحياة، خليك فى اللى بتعرف تعمله، وبلاش تدخل حد فى علاقتك بحبيبك دى سذاجة.
صحيا: هيلا هوب هيلا هوب..احمل أثقال خفيفة.
الجدى
من تدخل فيما لا يعنيه سمع ما لا يرضيه.. خليك فى حالك.. حبيبك هيفتحلك قلبه، إوعى تقفل انت الباب فى وشك.
صحيا: قولوا لعين الشمس ما تحماش عشان "الجدى" صابح ماشى.. خلى بالك.
الدلو
بقالك كتير ما اتظلمتش.. عادى تتظلم مرة.. عديها، الناس لبعضيها، وركز مع حبك أحسن شكله هو كمان هيطير.
صحيا: دينامو ولا بتكل ولا بتمل.. حاسب السِّلّمة المكسورة.
الحوت
ورّيهم الحوت اللى جواك، وخد قراراتك بلا رجعة.. النهاردة الصدفة هتلعب دورها "حط برفاان"، وخليك جاهز.
صحيا: لو نفسك فى كابوس من زمان "كل بالليل"، بس ما تصحاش والسرير مبلول.