اعرف حظك اليوم «السبت» من هريدى نيوز

الحمل
بمبى.. بمبى.. بمبى الحية بقى لونها بمبى أبواب الحظ مفتوحة وفكك م الحب ما بيأكلش عيش فى الزمن ده.
صحيا: غسيل الرجلين لا يحتاج إلى "أمينة " يا سى السيد.
الثور
ما بيعجبهمش العجب ولا الصيام فى رجب.. تعالى على نفسك وابعد عن الشر وغنيله وحبيبك هيعوضك قرف الدنيا.
صحيا: بلاش تعيش دور "سيد العاطفى" وتتأثر بكل حاجة عديها الناس لبعضيها.
الجوزاء
فاصل براحتك النهاردة هتكسب كل الرهانات وهتفرس أعداءك بشجاعتك.. ما تتفاجئش من الأندال "العشرة منهم بريال".
صحيا: شكلك هتنط الحبل أو هتلعب بلاى ستيشن النهاردة وهتتبسط.
السرطان
كل الكواكب والأبراج والنجوم حتى نجوم الظهر بتقول إنك النهاردة هتحس بحرية أكبر فى حياتك ونفسك تسافر.
صحيا: لازم تتعلم قراية عقارب الساعة عشان تعرف تنظم وقتك.
الأسد
يوم مهم لازم تركز فيه وتكسب صداقات كتيرة وسيبك من عقدة الخواجة أما عن حبيبك لو نفضلك اعذره أكيد مشغول فى طابور العيش.
صحيا: الكسلان يتغذى على النوم ومش كل مرة تنام فيها هتسلم الجرة.
العذراء
قول جلا جلا جلا هتختفى كل حاجة ممكن تضايقك وعندك ميعاد مع حد من برج الحمل.
صحيا: الدخان من أى نوع فيه سم قاتل ما بتشوفش رجل "الأشكيف" ع العلبة !!
الميزان
يوم فاشل خصومات فى الشغل وأعداء فى كل حتة ولو بتزعلك كلمة "فاشل" خليك فى البيت النهاردة
صحيا: تزعل ثم تأكل هتزعل أكتر بعد ما تبقى أد "البرميل".
العقرب
بلاش تهاجم النهاردة.. اقف "ندرجى" من كل المواقف التعبانة وركز فى خلافات الحب وحلها.
صحيا: لو كان فيه الخير ما كانش رماه الطير جرب طريقة ثانية للتخلص من الألم.
القوس
أهوج وأرعن ومتسرع قولها لنفسك أربع مرات بعد الأكل وقبله يمكن اليوم يعدى على خير.
صحيا: بنطلوناتك بترقص من فرحتها أخيرا فكرت تأكل من غير دسم.
الجدى
فيه مفاجأة حلوة.. مش بسبوسة ولا كنافة وشكلها هتبقى فى الحب وهتعيش اللحظة النهاردة.
صحيا: الضغوط هتختفى بفضل مسحوق الغسيل الجديد.
الدلو
نهيتك ما انتهيت والطبع فيك غالب و"الدلو" عمره ما يتعدل ولو علقوا فيك قالب.. هتفضل مجرجر الناس وراك تحل مشاكلك.
صحيا: تعمل العملة وتعد متفائل.. ربنا بيسلط أبدان على أبدان.
الحوت
خلى بالك من المقالب الخفية والمصايب المستخبية واتعلم من الكوارث اللى فاتت.. حياتك العاطفية محتاجة لمبة جاز فى ظل النهضة.
صحيا: يوم مشمس امشى شوية واستخدم كريم التسلخات.