«لا مؤاغزة» يا بابا..!!

انتهينا من صلاة الجمعة وطوال الطريق من المسجد إلى البيت لم يفتح المفعوص أبو نص لسان فمه بكلمة.. فظننت أن مكروها أصابه في لسانه، فقلت "أَجُرُّ شَكَله".. وسألته..
- إيه رأيك في زيارة رئيس الوزراء «هشام قنديل» إلى قطاع غزة وصورته مع إسماعيل هنية؟
- عاوزني أقول لك إنها كانت للتضامن مع «غزة»؟!
- أو مال أنت شايفها إزاي يا لِمِض؟
- شايفها تمثيلية ثخيفة.. وكارثة.. وضررها أكبر من نفعها.. وبكرة تشوف..
- أعوذ بالله.. فال الله ولا فالك.. ليه هيا «خمرة» ولّا إيه.. وإيه اللي خلاك تقول كده؟
- يا بابا.. هما "فلثطين" و"غزة" دولتان ولّا دولة واحدة؟!
- مش عاوزة كلام.. طبعا دولة واحدة..
- واللي عاوز يقف جنب دولة.. يقف جنب الرئيث الشرعي للدولة، ولّا يروح يقف مع رئيث الحكومة المقالة واللي بيمثل حركة واحدة بث، ومش كل الفلثطينيين..
- طبعا الرئيس الشرعى..
- وقنديل معملشي كده.. وزار "إثماعيل هنية".. ومثألشي في «أبو مازن».. وده ممكن يزيد الانقثامات بين حركة «فتح» و«حماث».. ثح ولا غلط..
- بس أكيد الرئيس مرسي مكنش يقصد كده.. وكان عاوز يعلن تضامنه وتأييده ل«الغزاويين»، ويقول للعالم كله: "إننا مش هنسيب حق أهالينا في قطاع "غزة"..
- هههههههه.. "غزة"!!.. "لامؤاغزة" يا بابا.. اللي معرفشي يجيب حق جنودنا الشهداء اللى ماتوا على الحدود برثاث الجيش الإثرائيلي.. واللي "بيمد إيده" للي يثوا واللى مايثواش في الغرب عشان «يثلفوه».. يبقى هيجيب حق ولاد "غزة" إزاي..؟!
- أهو أنت كده مفيش حاجة بتعجبك أبدا.. وكأن فيه عداوة بينك وبين «مرسي» و«حماس»..
- مفيش عداوة ولا حاجة يا حج.. بث ثعبان عليا الدم المصري اللي بيروح هدر.. ومفيش واحد عربي أو "غزاوي" بيثأل فيه.. وكأننا كلاب.. أو شغالين عند أبوهم..
- هَدِي نفسك ووحد الله..
- ونعم بالله.. بث عاوزك تقوللي كم واحد من «غزة» اثتنكر موت جنودنا في رفح وقت الفطار في رمضان.. وكم واحد في «حماث» طالب بقفل الأنفاق حفاظا على أرواح أشقائه من الجنود «المثريين».. مش دم جنودنا برضو غال زي دم «الجعبري».. ولّا إيه يا بابا؟
- طيب أنت لو من مكان الريس «مرسي» كنت هتتصرف إزاي؟
- كنت هثتعين ب"فرقة ناجي عطا لله" الإخوانية.. وهي تخلي تل أبيب تنام من المغرب وتقول حقي برقبتي!!