فخ" الإخوان" !!

انتهيت من صلاة الجمعة، وجلست أتابع الأخبار أمام التليفزيون، وفجأة "نط" أمامى المفعوص أبو نص لسان، وبادرنى متسائلا:
- بابا.. مش ملاحظ حاجة غريبة فى مليونية تطبيق الشريعة؟!
- قول يا نابغة عصرك وأوانك؟
- إذا كانت "الإخوان"، و"الحرية والعدالة"، و"النور"، وغيرهم غابوا عن مليونية "الشريعة".. أومال يبقى مين اللى موجود فى "التحرير"!
- أكيد فيه فصائل إسلامية تانية بتشارك وتنادى بتطبيق الشريعة من غير ما تفهم إيه المقصود أصلا ب"الشريعة".
- تقثد أتباع "حماث" و"حزب الله"، وبتوع "إيران"، وبتوع القاعدة و"بن لادن" وغيرهم من الجهاديين والتكفيريين.. اللى رفعوا "كوكتيل" الرايات الثودا والأعلام الخضرا والحمرا والبيضا فى الميدان..
- أكيد.. لكن يا مفعوص تفتكر "الإخوان" عاوزين يطبقوا الشريعة بجد؟
- طبعا لأ.. وأنا متأكد من كده!!
- وإيه اللى خلاك متأكد؟
- يا بابا.. الريث "مرثى" فى إيده كل "الثلطات" دلوقتى.. ولو كان عاوز يطبق "الشريعة" كان بإمكانه إثدار مرثوم بالتطبيق.. وثاعتها كان هيكثب دعم وتأييد إخوانه فى جماعة الإخوان، وكمان الثلفيين وكل تيارات الإثلام الثياثى.. ثح ولا غلط؟
- عندك حق..!
- وكمان لازم تتأكد أن "الإخوان" بالذات لن تطبق الشريعة، وهى متأكدة من ده كويث جدا.. و"مرثى" عندما كان رئيث حزب "الحرية والعدالة"، قال إن "الإخوان" لن تطبق إلا مبادئ الشريعة فقط.. وإن "الحدود" ليثت من الشريعة وإنما "اختلافات" فقهية.
- طيب ليه هما كل شوية بيقولوا فى الإعلام عاوزين نطبق الشريعة؟
- هما عاملين "فخ"، وعاوزين يظهروا للناث اللى على قد حالهم، ومش فاهمين ألاعيبهم.. إن الليبراليين والاشتراكيين واليثاريين والثوريين "كفاااار" علشان بيعترضوا على تطبيق الشريعة، وبعدين الشعب يتخلث من أعداء الإخوان.
- لأ يا مفعوص.. مش ممكن يكون ده تفكير الإخوان..!
- وأكتر من كده.. "الجماعة" بتثتعد من بدرى للانتخابات البرلمانية اللى جاية، ومش فاضية للعبة الشريعة وغيرها.. وكل شوية تِطلع حاجة، وتعمل مشكلة تشغل بيها الناث علشان ميركزوش لا فى الدثتور، ولا فى حل الجمعية التأثيثية، ولا فى حل الشورى، ولا فى انتخابات مجلث الشعب، ولا الريث بيعمل إيه.. وإيه اللى بيحثل فى ثيناء.. وليه الأنفاق مفتوحة لغاية دلوقتى.. وحاجات تانية كتير.
- تخيل ممكن يكون تحليلك منطقى يا مفعوص!
- أومال يا بابا.. ابنك بيفهم.. وبيبث لقدام.. وبيحثبها من كل الجوانب.. مش زى ناث تانية..
- ربنا يسترها على مصر.