«آسف يا ريس» تستنكر إضراب الأطباء: «ليه الجزيرة بتنقل مظاهراتكم»

استنكرت صفحة «أنا آسف يا ريس»، المؤيدة للرئيس الأسبق حسني مبارك، تظاهرات الأطباء ودعوات إضرابهم عن العمل.
وقال أدمن الصفحة، عبر موقع التواصل الاجتماعي «فيس بوك»، اليوم الجمعة: «خدعوك فقالوا مظاهرات الأطباء، لو نقابة الأطباء شايفة أنه من حقها أنها تنزل في الشارع بالآلاف وتخترق قانون التظاهر وتعطل المرور علشان تعبر عن غضبها من (حادث فردي) بين أمين شرطة ودكتور إذا فالناس المريضة دلوقتي اللي حضراتكم سايبينهم في العيادات والمستشفيات بدون دكاترة هما كمان من حقهم يعملوا فيكم إيه؟».
وأضاف: «لو الأطباء نفسهم شايفين أنه من حقهم أنهم ينزلوا يتظاهروا ويعملوا إضراب علشان مشكلة فردية مع شرطي أخطأ.. فالناس اللي انتو نسيتوا في بطنهم الفوط والمقصات واللي انتوا قتلتوهو وسببتولهم العمى بإهمالكو.. دول بقى هما كمان أهاليهم يعملوا فيكو إيه؟».
وتابع: «لو أنت كدكتور شايف إنك نازل علشان تتظاهر وتعبر عن غضبك علشان مشكلة فردية مع فرد شرطة أخطأ.. أمال حضرتك رافع صور محبوسين من الإخوان ليه؟، ولو حضرتك شايف إن نزولك ده مجرد تعبير عن الرأي والغضب ملوش أهداف سياسية تانية.. يبقى إشمعنى قناة الجزيرة بتنقل مظاهراتك وإشمعنى صفحات الإخوان وأعضاء 6 أبريل كلهم متضامنين معاك ونازلين يتظاهروا جنبك؟».
واستكمل: «لو إنت شايف أن من حقك تثور وتغضب علشان حادث فردي بين دكتور وأمين شرطة.. يبقى الناس اللي بتطردوهم وبتسبوهم من غير علاج في المستشفيات علشان ممعهمش حق الكشف يعملوا هما كمان فيكوا إيه؟».
واختتم: «وأخيرا ليه دايما أي مشكلة بين أي فرد شرطة وأي موظف في أي مكان بيتم استغلالها سياسيًا وإعلاميا ضد الدولة.. والسؤال هنا: هل لو كانت المشكلة دي بين مهندس ودكتور أو بين مدرس ودكتور كانت هتبقى نفس النتيجة؟ ولا هو تربص بجهاز الشرطة وخلاص؟».
وكانت دار الحكمة، مقر نقابة الأطباء، استقبلت، اليوم الجمعة، آلاف الأطباء والمتضامنين معهم، وأدت الحشود الكبيرة للأطباء إلى إغلاق شارع قصر العيني، حتى لجأ رجال الأمن إلى تسيير حركة المرور في حارة واحدة من الطريق.