أنا رايح أعيش في كوكب تاني!

بيقول لك اكتشفوا كوكب جديد، لأ وأيه فيه حياة كمان، وتقدر تعيش فيه عادي، مش بس كدة، ده فيه كل حاجة صالحة للحياة بنسبة 60٪!
وكالة ناسا الله يبارك لها، هي إللي عملت العملة الحلوة دي، وهي إللي قامت بالواجب واكتشفت الموضوع، ومن كُتر أمانتها، حبت تثبت أن الموضوع بجد، فبعتت كام واحد، يشوف أيه الظروف وييجي يحكي، وكدة كدة الشعب هيصدق!
لما سمعت الموضوع، تخيلت كدة التقرير إللي هيعمله الناس إللي راحت دي، ولأن إحنا ماشيين بمبدأ "لنا في الخيال حياة"، فتخيلت ده شكل التقرير:
السيد الأستاذ / صاحب وكالة ناسا..
تحية طيبة وبعد،
أنا روحت أنا وزميلي مصطفى وليدوڤيتش، الأوردر إللي اطلب مننا في العيد، وعاينت كل حاجة بنفسي وشُفت بعيني، المكان هنا هادي، ورايق، مفيش زحمة، كل الناس بتحب بعضها، آه وَاللّه!
النت شغال 100 فُل وعشرة، الزمالك الحمد لله بيكسب الأهلي من ساعة ما الكوكب فتح، الأسعار هنا مش رخيصة أوي، يعني المتر يشبه نفس سعر المتر في الرحاب!
الحمد لله فيه فُرص شغل كتيرة، مفيش انتخابات على الدستور ولا بتاع، هنا كل واحد في حاله.
تشم هوا نضيف، وتشوف إعلام حقيقي، والراجل الظابط إللي هنا الله يبارك له شايف شغله على الآخر، وماسحبش ولا رخصة.
التعليم بقى ماأقولكش، العيال ماشية وفي أيدها الآي باد، والكل هيبقى دكاترة، الزبال هنا بيتعامل زي الوزير ويمكن أحسن.
الحب هنا برضه جميل، وكل واحد يعمل إللي يريحه.. العلاقات بقى ماأقولكش يا باشا، السطحية واخدة حقها تالت ومتلت.
مفيش حاجة اسمها ظلم، أو حد حقه ضايع، هما بس فيه مجموعة كدة جاية من الكوكب القديم وعاملة قلق، بس هنسيطر إن شاء الله.
ولا فيه افترى ولا حد بييجي على حد زي ما بيحصل عندكم، والناس شكلها هتحب بعضها، والله يا باشا أنا مش عايز أرجع؛ لأني عملت بوصية أمي ومضيت عقد عمل في الكوكب الجديد، ولسه كاتب على الFacebook
"الوداع.. أصل أنا رايح أعيش في كوكب تاني"، وعملت tag لأمي وأصحابها.

ولكم جزيل الشُكر..
مصطفى هو أنت فين؟
أنا في ألمانيا يا باشا..