ابين زين

حضرة جناب الوزير.. داخليتك باى باي.. عايزة حاجات محتاجات.. نقعد ونشرب شاى.. وتقول على اللى إنت شايفه.. والحل إيه وإزاى .. لسه انفلات الشوارع.. وناس بتصرخ آى .. يا شاويش تعالى هنا .. يقول لى لأ .. مش جاى .. إيه الحكاية بقى .. ما تقول لى رايحين فين .. والشرطة لسه بتشرب ليه فى قمر الدين .. والسرقة والقتل فى الشارع وفى الميادين .. مش قلت فيه انضباط ؟!.. فين هو مش شايفين .. الناس فى عرضك بقى .. والخلق مش ناقصين .. لم اللى هربوا من الشبيحة والمساجين .. وراقبوا عيش الغلابة بشرطة التموين .. هو إحنا إيه والنبى .. مش برضه بنى آدمين .. وأن البلد دى بلدنا ولسه فيه قوانين .. مش إنتو برضه الحكومة .. حنشتكيكوا لمين؟.. وحياة مقام الحسين بنحبكم يا وزير .. بس انتو حبونا حبة .. وظبطوا المعايير .. أحسن خلاص والنبى .. الأمر جد خطير .. وأنا باحذر جناب الأمنا والمأمير... قدامكو فرصة تقولوا خطة التأمين .. والناس تبات ليلة واحدة فى البيوت آمنين .. وأنا رملى قال لك خلاص .. أنا وإنت والسامعين.. وحالم ودعى وأجيلك بكره أبين زين..