ديالوج

samirelgamel@yahoo.com
الناخب: بص بقى يا أستاذ ضمير.. ياريت تستنى حضرتك برة لجنة الانتخابات لغاية ما اجيلك.
ضميره: هو أنت لمؤاخذة بعتنى لواحد من المرشحين؟! وإذا كان ده حصل.. كان تمنى كام.. وأخدته كاش ولا رز وسكر وزيت؟
الناخب: حيلك حيلك انت دماغك راح لبعيد.
ضميره: أمال عايز تسربنى ليه... أنا هادخل معاك ورجلى على رجلك لغاية ما اطمن إن اختيارك فى السليم.
الناخب: انت كده بتشك فى نزاهتي!
ضميره: انت اللى بدأت لما حاولت تهرب منى عشان تتصرف براحتك مع إنك عارف.. إن وجودى معاك لصالحك.
الناخب: ما هو أنت مش هتبطل زن.. وهتقعد تقوللى انتخب فلان عشان يجيب لنا الأمن والأمان .. وناسى إنه فلول رسمي.. وتقوللى انتخب علان لأنه خبرة وراجل دولة.
ضميره: يا سيدى باحاول اساعدك.
الناخب: خلينى اعتمد على نفسى.. ولا سيادتك مستهتر بعقلى وحسن اختياري؟!
ضميره: اسمعنى كويس يا ابن الناس دى لحظة تاريخية هندفع تمنها كلنا.. مش النهاردة بس .. لكن سنين جاية انت وأولادك واحفادك بعد عمر طويل.
الناخب: برضه مش عايزك تدخل معايا اللجنة!
ضميره: اشمعنى؟
الناخب: عايز ابقى على راحتي!
ضميره: بصراحة أنا خلاص قررت انتخب.. مرشح ثورى وفى نفس الوقت له مرجعية إسلامية مسيحية وله برنامج مضمون يخلى مصر «نمر اقتصادي» له وزنه.
ضميره: انت أكيد ضربت ع مرشحين فى الخلاط وعملت منهم رئيس فخفخينا.
الناخب: شكلك بتهزر.
ضميره: بالعكس انت اللى بتقول كلام ما يدخلش دماغ عيل فى «كى جى تو».
الناخب: بأقولك إيه.. هو أنا اللى ضميرك ولا أنت ضميري!
ضميره: بس بس.
الناخب: خايف استغنى عنك.
ضميره: ما تقدرش!
الناخب: هو أنا يعنى أول واحد.. يمشى بدون ضمير.. خليك واقعي.
ضميره: باين عليك مش عايز تبقى انسان متحضر.
الناخب: لغاية كدة واستوب وكل واحد من سكة.
ضميره: يا سيدى ألف سلامة والقلب داعيلك.. بس لما تندم وتبوس الأيادي.. مش هارجعلك ولو عملت فيها عجين الفلاحة ونومة العازب.
الناخب: المرشح بتاعى وعدنى يجب لى طقم ضماير مستورد من أمريكا!!