حوار بين مالك عقار قانون قديم وشخص من عالم خيالي

- واحد من كوكب تانى: السلام عليكم
- مالك العقار قانون قديم: وعليكم السلام
- واحد من كوكب تانى: إنت بقى مالك عقار ؟؟.. يعنى راجل غنى مش كده ؟؟
- مالك العقار: لا مش كده !
- واحد اللي من كوكب تاني: إزاى ؟؟ مالك عقار وفقير ؟ إزاى ؟
- مالك العقار: زى الناس.
- الراجل: عقار يعنى ثروة.. إنت بتمتلك ثروة وفقير ؟ مش معقول.
- مالك العقار: لا معقول قوى !
- الراجل: هو العقار مرهون ؟
- مالك العقار: لا مش مرهون ولا حاجة.
- الراجل: محجوز عليه ؟
- مالك العقار: ولا دي كمان.
- الراجل: أمال إيه بس ؟
- مالك العقار: إيجار قديم.
- الراجل: يعنى إيه إيجار قديم ؟
- مالك العقار: يعنى إيجار عمارة طويلة عريضة خمسة أدوار .. عشر شقق مساحة الشقة 200 متر في الشهر كله ب 40 جنيها.
- الراجل: طيب وهو الجنيه عندكم بيجيب إيه ؟؟
- مالك العقار: بيجيب جرنال..
- الراجل: ياااااااه.. يعنى إنت بتاخد الإيجار وتقدر تشترى طول الشهر الجرنال كل يوم ويتفضل معاك كمان 10 جنيهات مش كده ؟
- الراجل: وال 10 جنيهات دول ممكن يجيبوا لك إيه يعنى ؟
- مالك العقار: أحيانا بشترى قلم ودفتر إيصالات الإيجار من المكتبة.
- الراجل: كل شهر بتشترى قلم ودفتر إيصالات ؟
- مالك العقار: الكدب خيبة..! لا بشتريهم شهر وأسيب شهر.. الحمد لله بيكفونى شهرين بحالهم.
- الراجل: عظيم عظيم.. طب والشهر اللى ما بتشتريش فيه لا قلم ولا دفتر إيصالات بتعمل إيه بالفلوس ؟؟
- مالك العقار: غالبا بحط ال 10 جنيهات دول في البوسطة !
- الراجل: برافو عليك !
- مالك العقار: أماااال.. الواحد لازم يعمل حساب مستقبل الأولاد.. أولادى يعنى !!
- الراجل: يا راجل ده إنت قطعت قلبى.. بس إنت لازم تشوف لك حل..
- مالك العقار: لايمنى عليه..
- الراجل: هو إيه ده اللى ألايمك عليه ؟!
- مالك العقار: الحل.. فين هو الحل ؟؟
- الراجل: وهى دى عيزة كلام ؟! إنت تطلب من السكان يزودوا لك الإيجار.. قل لهم أنا حرفع الإيجار زى ما كل حاجة اترفع سعرها.. معقولة شقة 200 متر وإيجارها 4 جنيهات في الشهر!! إنت قل لهم خلاص الكلام ده ما ينفعش أنا حرفع الإيجار.. حخليه 4000 جنيه في الشهر ‍!
- مالك العقار: ما أقدرش أرفع الإيجار..
- الراجل: ليه ما تقدرش ؟؟؟!!!
- مالك العقار: القانون بيمنعنى !
- الراجل: بسيطة.. اطردهم خالص ودور على سكان تنيين يقدروا يدفعوا إيجار معقول..
- مالك العقار: ما أقدرش أطردهم..
- الراجل: إزاى يعنى ما تقدرش تطردهم ؟؟!!
- مالك العقار: القانون بيمنعنى !
- الراجل: خلاص هد العمارة واستريح يا أخى..
- مالك العقار: ما أقدرش أهد العمارة.
- الراجل: ليه ما تقدرش ؟ هي العمارة مش بتاعتك ولا إيه ؟
- مالك العقار: أيوه بتاعتى بس القانون بيمنعنى !
- الراجل: يخرب بيت القانون ده !! بص! انت تنسى العمارة دى خالص.. سيبها تولع بجاز.. عيش انت حياتك وكأن العمارة دى مش موجودة..
سيبها خالص يمكن ربنا يهدها على دماغ السكان.. انت مالك بقى؟!
- مالك العقار: لا ما هو ما ينفعش ربنا يهدها على دماغ السكان !!!
- الراجل: نعم !! إزاى يعنى ؟؟؟!!!
- مالك العقار قانون قديم: القانون بيسجنى !!
- الراجل: أنا إيه اللى جابنى هنا ؟؟؟!!!