ساخرون.. قصيدة جديدة للمعلم هريدي: "نفسي لمبة تنور جوه بيتنا"!!

يا وزير الكهرباء نورك كفاية
بس لو تسمح تقول إيه الحكاية
كل حبه الكهربا تقطع وترجع
هي ليه ماسكة لنا بإيدها العصاية؟
إحنا راجعين تانى للمبة الصفيح
اللى نورها كان بيسعدنا بصحيح
كان بعود كبريت تنور كل بيتنا
وأما تنفخ تنطفى بهدوء مريح
فهمونا النور بيقطع كل ساعة
هو فيه عفريت راكبكم ياجماعة
صرحوا قولوا الحقيقة فهمونا
المصارحة بالحقيقة من الشجاعة
كلنا فاهمين وعارفين الحقيقة
إن نورنا بينقطع ليه في الدقيقة
بس مش ممكن حنسكت مرة تانى
أو حنقبل مهما كان نفس الطريقة
البلد مش ناقصة تصبح في الظلام
اللى فيه يظهر لنا مكر اللئام
رجعوا لنا الكهربا يا حكومة تانى
ربنا يرحمكوا وبلاش الكلام
اللى عندى قلته يا وزير كهربتنا
وأنت عارف حدوتتنا ومشكلتنا
لو تقوللى يا فريد نفسك في إيه
نفسى لمبة نور تنور جوه بيتنا