عمار ياسر : قوم ولعلك فحمة !

عزيزي مؤيد استخدام الفحم !!!
أو حتى مع وضع ضوابط بيئية !!! What ever the hell in Egypt that is أو م المطالبين بالبديل أو الفلوس منين ؟؟
الكلام الجاي ده كله ليك .. بما إني مهندس كهربه باور وفاهم على قدي .. !
1_ بص في النتيجة أنا عارف إن مشاكل معظمكم بسبب انقطاع صلتكم بالنتيجة .. عارفها ؟؟ أيوة الCalender بص فيها شوف إحنا في سنة كام يمكن تكون ناسي ولا حاجه !!!
2_ ضوابط بيئية مين يا نجم !!! إحنا مش عارفين نفرض ضوابط اشتباك بالسلاح الحي !!! ده إحنا مش عارفين نحافظ على ضوابط انتخابات متهيسش علينا !!! .. ده إحنا بنرمي مخلفاتنا في النيل لحد إنهارده .
3_ لو انت دخلت مدارس واستفدت حاجه عمرك ما كنت هتسئل عن بديل طاقه .. أما بقى لو مدخلتش فممكن تفتح كتاب علوم سنه 5 ابتدائي وتشوف مصادر الطاقه البديله لو انت جاهل كده .
4_ الفلوس إللي هتتصرف ع الفحم تتصرف على دعم مشاريع تطوير الطاقه الشمسيه وبما إننا زي ما انت بتقول عندنا صفر % استخدام فحم نحافظ على أم الصفر بمزاجنا لأول مره في حياتنا مش هتزعل .
5_ مشكلة الطاقه مهمه مش بالنسبه للبيوت والحر وشغل الإبتذال ده إنما بالنسبه لنهضة صناعية واقتصادية للدولة ومن حق الدولة إنها تجبر الصناعة ع الإستثمار في الطاقة النظيفة زي بقية مخاليق ربنا .
6_ إلغوا أم دعم الطاقة إللي ذالين أنفاس الناس وأنفاسنا بيه !!! .. وحطوا فلوس الدعم دي في تطوير قطاع طاقه دايمة .
7_ الإستثمار في الحياة أهم مليون مليار مرة وأثمن وأكثر ربحية وأمان .. شعب عنده طاقه وتلات تربعه عنده (ربو) ميساويش .. إنما لو تقلنا شويه وخرجنا الحوار ده م الصراع السياسي خلال فترة من 25 ل 40 سنة هتكون بنيت قطاع طاقه تكنولوجي ومتطور كمان .
8_ الصناعات كثيفة الإستهلاك للطاقه تطور أبحاث الطاقة الخاصة بيها .. ده إللي بيحصل في أي مكان وفكك من نغمة بنشجع الصناعة عشان ده مش تشجيع ده كسل .
9_ مش معنى إننا عندنا أزمه حالياً في قطاع الطاقه فنسيب الإتجاه إللي الكوكب كله ماشي فيه ونبدأ في خطوة 1830 م ..
10_ فيه إفتكاسه كده عن الناس العاقله اسمها تكاليف الأزمة .. يعني بحسب قطع الكهربا بيكلفني قد إيه وحل زي بتاع الفحم هيكلفني قد إيه ؟؟ (هتلاقي إن الفحم حالياً أرخص وأسهل من أي طريق تاني) تقوم تمد الخط لآخره .. هتبني شبكة طاقه خلال 50 سنة هتنقرض من العالم وتكلفه صيانتها وإصلاحها واستيراد موادها الخام قد إيه ؟؟ .. تكلفة آثارها البيئيه والصحيه قد إيه ؟؟ .. استهلاك الكهربا هيزيد في مسر خلال 10 سنين 133% فهتكبر الشبكة إزاي ؟؟! .. هتبني محطات جديده ولا كل ما تديله فحم زياده هيديك طاقه ولا الحسبه إزاي عندكم !!!!
عشان الحسبة العاقله إن تكاليف أزمه طاقه في مصر لفتره من 3 ل 5 سنين وبدأ قطاع طاقه دايمة أرخص وأحسن وأكتر فاعليه مستقبلاً من حل الفحم العبقري !
11_ إللي إتعلمته م الدول إنها مش زي الأفراد .. خطتها دايماً معتمده على سنين قدام .. مش بتبص تحت رجليها بتحل مشكله وخلاص !!! .. الدول إللي بتبص تحت رجليها دي فاشله ومعندهاش ثقه ولا رؤيه ولا خطة للمستقبل .
في الآخر أحب أقولكم ..
أنا مش خبير طاقه ولا سعادتك بس أنا وانت مواطنين مصريين لو هيحرقوا فحم أو هيحرقوا في بعض دي بلدنا والمفروض تقول رأيك وتكون جزء من ضغط شعبي للوصول لتحقيق رأيك .. إللي يقولك غير كده أو يقولك بلاش هري أو يقولك نسيبها للمتخصصين أو ايه فهمنا في ده شخص مش عايز مصلحتنا متسمعوش أصلاً .