11 ضد 13

يوم السبت اللى فات كنت باتفرج على فريق البرسا أو كتيبة الإعدام، وهو أقل ما يطلق عليهم بلغة المجنونة كرة القدم، بصراحة حاجة تجنن، إيه مافيش فريق قادر على هؤلاء الأقدام فى الجسم، بس دول عباقرة فى الأداء، فكرت كتير لو أنا مدير فنى وأمامى لقاء فى الكامب نو أو على ملعبك أو جوا بيتك أو على سريريك برضه مش هيرحموك دول ولاد ماعندهمش رحمة فى الأهداف، قعدت أفكر ألاعبهم إزاى بالعرض بالطول بالضرب والتحايل قلت مش هينفع فيه حكم وهاخد عقوبة، طيب أعمل إيه مع فريق نسبة الاستحواذ فى أى مباراة تصل إلى حد الإعجاز الكروى 70٪، نسبة التمرير تصل إلى أكثر من 800 تمريرة فى اللقاء، لم ولن يصل إليها أى فريق فى العالم. الضغط من عند حارس المرمى بتاعى مافيش نفس للاعب بطول الملعب وعرضه، نسبة صناع اللعب كتيرة تصل إلى أكثر من 9 لعيبة، ناقص حارس المرمى وقلبين الدفاع ويكون ال11 لاعب كلهم بيخلقوا فرص نسبة التسديد تصل فيها إلى أكثر من 20 تسديدة على المرمى، وكمان جه عم جوارديولا وراح عامل خطة وطريقة جديدة علشان يلاعب فابريجاس، وقال إيه علشان يزود النواحى الهجومية وإحراز الأهداف أصلها كانت قليلة السنة اللى فاتت، وده لوحده عمل كارثة 19 هدفا، مجموع ما أحرزه فى مباريات الليجا، نرجع تانى للخطة من 4-3-3 إلى 3-4-3، طيب إحنا كمدربين مش قادرين على ثلاثة دلوقتى، هنقدر على الزيادة بتاعة فابريجاس؟ عموما بعد تفكير عميق وقلق طول الليل، ما أنا فاكر إنى هالاعب برشلونة، قررت أن أخاطب كل الأندية الإسبانية والأوروبية لتقديم احتجاج قوى لزيادة عدد لاعبى الفرق بتاعتنا لما نلاعب كتيبة الإعدام لو نلعب إحنا ب13 لاعيب قدام 11 بس من برشلونة علشان يكون فى «فير بلاى» مش هما بيقولوا اللعب النظيف، طيب إحنا محتاجين لمعونة إضافية فى خط الدفاع وإمداد فى الوسط والهجوم معاه ربنا، أنا مايهمنيش أجيب أجوان قد ما يهمنى إنى أوقف الإخوة الشياطين من كل اتجاه والله عندى إحساس ما هينفع أن اللعيبة بتاعتى قبل ما تنزل يجلها رعشة وإسهال وخوف من الهجوم الكاسح من كل مكان فى المعركة معلش برضه معذورين لأنهم شايفين مدربهم وشه أصفر لأنه معرض إنه يروح النهارده للبيت بعد الستة أهداف، الله يكون فى عونا كلنا على الوقوف أمام ملوك كرة القدم فى العالم، الفريق الكتالونى قضى على متعة الإثارة فى النتيجة التى كانت هى أهم وأقوى أسباب الفرجة على اللقاء، ولكن حاليا لما تسمع البرسا مع أى فريق فى العالم تفكر 5 ولا 6 علشان كده أنا متوقع أن مورينيو وإيمرى وكيكى فلورس والسير ورانييرى وكونتى وهنيكيس وأرسن فينجر هيعملوا رابطة (لا للفوز بأكثر من هدفين)، ما العملية بقت صعبة أوى وكمان هيقدموا خطابا شديد اللهجة للاتحاد الأوروبى بإيقاف نزيف الأهداف وزيادة عدد اللعيبة بالذات أمام البرسا علشان يوقف نزيف التوقف الذى من الممكن أن يستمر لسنوات مع مدرب عبقرى متطور تكتيكيا فى تقديم أسلوب يواكب ويناسب لاعبيه فى كل مكان فى الملعب، بالإضافة لمعدل الإحلال والتجديد الذى لم ولن تلاحظه فى مشوار الفريق لفكر وعبقرية مدرب اسمه بيب جوارديولا.