عبد اللطيف المناوي: السيدات والسادة مساء الخير شهدت مصر خلال السنوات الماضية عدد من الحوادث المؤسفة في مجال النقل العبارات والقطارات والأتوبيسات ومازال نزيف الأسفلت مستمر كل يوم على الطرق السريعة تغير المسئولون وتغير الوزراء واستمرت الحوادث في قطاع النقل التي يستخدمها 75 مليون مصري تقريبا تحتاج إلى تحديث وإهتمام مازالت تبحث عليه. السيدات والسادة وزارة النقل هي عش الدبابير كما يعتبرها البعض وفي قول آخر هي مقبرة الوزراء كما يعتبرها البعض الآخر وهي وزارة للكوارث كما يعتبرها آخرون الملفات المسئولة عنها هذه الوزارة تتعلق بحياة ملايين المصريين وبتعاملاتهم اليومية والخطأ الصغير في أي قطاع تابع للوزارة قد يتحول الى كارثة تودي بحياة العشرات، النقل ليس هو هيئة السكة الحديد فقط هناك المترو والنقل العام والخاص والموانئ والنقل النهري والبحري والسلامة على الطرق وكلها مصادر نقل حيوية يتعامل معها ملايين المصريين تمتلئ بالمشكلات التي تنتظر الحل. السيدات والسادة هل ننتظر اليوم الذي نفتح فيه الجريدة في الصباح ولا نجد فيه أخبار عن حوادث على الطرق السريعة في القطارات أو الأتوبيسات يروح ضحيتها عشرات الابرياء هل ننتظر ذلك اليوم الذي تصبح فيه وسائل النقل العامة آدمية ومتاحة ومنتظمة في مواعيدها اسئلة كثيرة وملفات مختلفة نستمع اليها اليوم الى وجهة نظر المهندس علاء فهمي وزير النقل. مهمة صعبة في الوزارة ومهمة صعبة ايضا ان نوصل للناس وجهة نظركم ورؤيتكم للتعامل في خلال المرحلة المقبلة جايز احد العيوب الرئيسية اللي بنعاني منها في المجتمع هي مسألة غياب النظام غياب ال system غياب الرؤية الاستراتيجية لبعض الامور الكثيرة في مجتمعنا وابدأ بسؤال لك هل بتمتلكوا استراتيجية واضحة ، نظام واضح سوف تعتمدوه في التعامل مع قضايا النقل كسؤال افتتاحي اتفضل. مهندس/علاء فهمي - وزير النقل: هو الحقيقة انا منذ وجودي في وزارة النقل منذ 9 شهور وانا اضع هذه الاستراتيجية وبحّسنها يوم عن يوم بمعنى ان فيه مسئولين كثيرون تولوا هذا المنصب قبل كده ولازلنا نشهد الحوادث العوارض الكثيرة في منظومة النقل في مصر كان لازم نبص على الموضوع دا بطريقة جذرية بمعنى ان ماهي المشكلة؟ في الواقع ماهو مفيش حد بيقصر في شغله بالشكل اللي احنا شايفينه او كان بيحصل عنه حوادث بالشكل اللي كان بيحزنا جميعا يعني طب ايه المشكلة ..؟ المشكلة الحقيقة وجدناها ان احنا ما اتطورناش وما شفناش الطريق بتاعنا بتاع التطوير يعني نمرة واحد احنا محتاجين تطوير عنيف جدا للموارد البشرية قوي جدا نمرة اتنين محتاجين ان احنا نرسم خريطة التحرك بتاعنا لسنوات قادمة معدل النمو اللي بيحصل في البلد محتاجة قدامه تغطية للطلب المتزايد يوم عن يوم وبالتالي يجب ان يكون قدامنا منظور واضح زي ما حضرتك قلت كده استراتيجي بس كلام استراتيجي قابل للتطويع على طول لبرامج والبرامج جواها مشروعات والمشروعات نقدر نجيب لها موازنات او نجيب لها تمويل ولها خطة زمنية وتنفيذية والناس اللي بتعملها قادرين ان هما ينفذوا هذا الكلام وبأقل التكاليف قادرين على تحقيق ذلك باعلى جودة المنظومة الاستراتيجية دي الحمد لله احنا بادئين فيها بقالنا فترة خلال 3 او 4 شهور ماضية وعندنا مؤشرات اداء بنقيس بيها هذه الاستراتيجية عشان ما يبقاش الاستراتيجية كلام كبير فوق وما تنزلش على ارض الواقع بنقيس معدلات اداء محددة لكل محور من محاور النقل بالاضافة الى معدلات النمو والتحسن في الخدمات اللي بنؤديها احنا بنبص دلوقت على منظومة النقل الخدمة المؤداة للجمهور احنا منظومة النقل بتعمل حاجتين بتعمل البضائع وخدمة الركاب وخدمة الركاب معناها ان احنا كل يوم بندي خدمة لجميع وسائل النقل ايا كان انا لما بعمل طريق او بعمل سكة حديد صح زي القطارات بعمل السكة نفسها ببتدي اعمل الاساس الخدمة في الاخر للمواطن فأنا ببص في الاخر انا بدي المواطن ايه ما أنا في الاخر كل اللي بعمله دا سكة حديد وبعدين قطار وبعدين محطات وبعدين اشارات وبعدين مزلقانات كل الخطة اللي محطوطة دي وبننفذها لازم في النهاية تترجم الى خدمة للمواطن عبد اللطيف المناوي: مين اللي بيحط الخدمة دي؟ م/علاء فهمي: احنا دلوقت بنعمل مجموعات عمل مش السكة الحديد تعمل خطة لوحديها ، بنعمل منظومة من المحاور بتاعة النقل كلها مع بعضيها مع مجموعة من الخبراء والدكاترة في وزارة النقل بنصيغ هذه الخطط وبنصيغ البرامج اللي بتطلع منها الخطط احنا عندنا حوالي 37 برنامج دلوقت مش كلهم بيشتغلوا لكن محطوطين قدامنا شايفين ايه المشروعات اللي جواهم اللي إحنا بنبتدي ننفذها طبقا للمخطط اللي قدامنا ، الاستراتيجية دي على بعضيها المفروض بتحقق الخدمة الكويسة للمواطن عبد اللطيف المناوي: حضرتك اشرت فيما اشرت الى ان هناك مؤشرات اداء انتوا بتعتمدوها اذا اديتني بعض الملاحظات عن مؤشرات الاداء لديكم بتقول ايه النهاردة؟ م/علاء فهمي: مثلا السكة الحديد مؤشرات الاداء بتاعتها اللي احنا بنعامل بيها الموارد البشرية بتاعتنا والرجالة بتوعنا في السكة الحديد ان الحوافز والمكافآت بتاعتهم تعتمد على مؤشرات الاداء دي والحقيقة نفذناها خلال ال 3 شهور الماضية واثمرت عن نتائج يعني بنقيس ان معدل تناقص الحوادث يعني زي الصورة الذهنية لينا كنقل لازم نغيرها عبد اللطيف المناوي: صورة حوادث؟ م/علاء فهمي: صورة حوادث لازم نغيرها عشان الناس حتى تساعدنا في ان احنا نحسن الخدمة الحكاية مش مقدم الخدمة كمان لا كمان مستقبل الخدمة يبقى مقتنع بحيث ان احنا نتلاحم مع بعض فإحنا بنحاول نقول ان معدل الحوادث عايزين نوصلها لصفر كل معدل التحسن فيها الربع سنوي عليها مكآفات وحوافز للعاملين في السكة الحديد ... نمرة اتنين الانتظام بتاع المواعيد انتظام القيام والتزام الوصول عندنا حاجات كتيرة بتؤثر على هذا الموضوع مش بس احنا كموارد بشرية وسائقين وفريق عمل بالكامل لا احنا بنبقى مضطرين نحسن السكة ونجدد السكة المهم معدل التحسن في هذه الخدمة الحمد لله احنا شفنا في الربع التاني من العام المنقضي من مايو الماضي هتبص تلاقي ان احنا في ال3 شهور اللي قبل دول كان احسن من الربع دا في الانتظام لان رمضان والاعياد والطلب ما تزايد جدا السنة دي على السكة الحديد ودا مؤشر كويس الناس كلها عايزة تستعمل السكة الحديد في السفر يعني كان معدل التزامن مش كويس قوي لكن من الربع الاولاني بتاع السنة دي هتلاقي تبص فيه تحسن في القيام من معدلات ال55 % ووصل 85% عبد اللطيف المناوي: جايز اضيف لك كمان من المؤشرات من ضمن الكلام اللي سمعناه على الاقل ان فيه بعض الشكاوي بتأخر المترو الناس ما بيعتذرلوهمش عن التأخير ودا جايز إن إحنا تجاوزنا جزء من المشكلات في الاعتذار يعني دا أظن في إطار التعامل مع احترام المتلقي الخدمة دا ينبغي انه يكون أسلوب التعامل مع متلقي الخدمة م/علاء فهمي: بالظبط كده يعني كان فيه قطار اتلغى خالص من 5 شهور رجعنا التذاكر كلها للناس ابتدينا لما النظام وصل ل85% ابتدينا نعتذر للناس حتى عن حاجات خارجة عن ارادتنا حاجة اسمها القوة القاهرة، القوة القاهرة حصلت الأسبوع قبل الماضي في انه فيه بعض الأشياء على السكة الحديد تم سرقتها وبالتالي تعطلت السيمافورات تباطأت القطارات لان احنا لازم نشتغل بطريقة امنة تماما فطبعا حصل تأخير في القطارات غصب عننا صحيح لكن في نهاية الامر لازم نحسس المواطن فين حق المواطنة في الموضوع دا زي ما اشرت الناس حقها فين بعد التاخير دا احنا خدنا قرار ان أي تأخير يحصل في السكة الحديد في رحلة من رحلات الالف ومائة اللي بيطلعوا كل يوم إتاخرت عنها لمدة اكتر من ساعة نرجع نص التذكرة تاني عبد اللطيف المناوي: هل بيتحاسب حد على التأخير؟ م/علاء فهمي: كان زمان بنقول "الحسنة تخص والسيئة تعم" احنا عكسناها وجابت نتيجة ليه ..؟ دلوقت انا كميكانيكي او ..او .. انا غلطان في اني ما جهزتش الجرار صح او القطار صح يبقى انا اخد الجزاء لا دا يسائل لحد ما نوصل للمسئول عن هذا وبالتالي السيئة بتخص الناس دي تخص المسئول عن التأخير عبد اللطيف المناوي: يعني ما بجيش لاصغر مسئول وبتحاسب معاه م/علاء فهمي: بالظبط عبد اللطيف المناوي: ودي جايبة نتيجة؟ م/علاء فهمي: جدا لانه حصل تواصل بين قيادات الهيئة والموظفين وبقي فيه مسئولية مشتركة زي ما حضرتك قلت في اول البرنامج دا خلل نظام النظام بقى بيتطبق انه مين بيطلع تعليمات لمين والاجراءات نازلة من فوق لتحت ومن تحت لفوق عبد اللطيف المناوي: انت راضي قد ايه عن اداء السكة الحديد خلينا نتكلم في بعض .. م/علاء فهمي: لو بنتكلم عن السكة الحديد المؤشر العام متوسط لكن وضع اداء السكة الحديد كنمو فيه تحسن ، العاملين في السكة الحديد دلوقت حاسين اكثر من أي يوم تاني بنوع من الانتماء والولاء للسكة الحديد وبالتالي كل واحد بيحاول يحسن في شغله بقدر الامكان وبالتالي معدل التحسن كويس جيد او جيد جدا لكن طبعا الخدمة كلها احنا عندنا عربيات عمرها 25 سنة او 30 سنة بيحصل لها عمرات مرة واتنين وتلاتة واربعة في الاخر لازم نجيب عربيات جديدة ماهو مش هينفع لازم نغير وابتدينا من السنة دي ان شاء الله خطة طموحة جدا دلوقت العربيات العادية والمميزة اللي هي بيسموها الدرجة التالتة بحيث دي طبعا عايزة استثمرات وتمويل جامد عبد اللطيف المناوي: الفلوس اللي بتخرج من الرخصة التالتة وخدنا مجموعة مليارات من الرخصة التالتة عشان تدعيم السكة الحديد م/علاء فهمي: لا احنا كان عندنا في الفترة دي جرارات مكفية الرحلات المطلوبة، السكة الحديد اشترت 120 جرار جديد لان قطع غيار الجرارات اللي واقفة مفيش قطع غيار وقطع الغيار دي هقول لحضرتك رقم بسيط جدا الصيانة سواء عمرات سواء عمرة جسيمة او متوسطة او خفيفة او صيانة عادية يومية بتتكلف في السنة حوالي 1.7 مليار جنيه فمكانش موجود الفلوس دي في السكة الحديد قبل كده لسنوات فكانت الجرارات عاطلة بقالها سنوات وياخدوا من الجرار دا عشان يمشوه فجددنا وشغلنا الجرارات وجبنا جرارات جديدة السكة الحديد جابت جرارات جديدة حصل انتعاش في السكة الحديد احنا بنتكلم عن مليون حصان زادوا في السكة الحديد وبالتالي من غير ال5 مليار دول مكانش هيبقى فيه رحلات اه احنا دخلنا اليومين دول في المرحلة التانية عبد اللطيف المناوي: هل معنى ذلك انه لو لم ندخل بال5 مليار في السكة الحديد هل معنى ذلك ان السكة الحديد كانت مهددة بالتوقف م/علاء فهمي: اه طبعا بقول لحضرتك اكثر من مليار جنيه لاعمال الصيانة واحنا كان عندنا 200 مليون 300 مليون ودي كانت غير كافية لان عندنا فجوة بين الطلب والمتاح عبد اللطيف المناوي: احنا احتياجاتنا قد ايه من الجرارات وعندنا قد ايه منها؟ م/علاء فهمي: احنا احتياجنا تماما عايزين 800 جرار احنا عندنا 500 ممكن يحصل عمرات لحوالي 100 كمان مكن يوصل 600 او 650 اعتقد ان دول كافيين جدا يكفوا الركاب والبضائع ايضا عبد اللطيف المناوي: يعني خلينا نقول ان نسبيا خدنا خطوات مهمة في مسألة تامين الجرارات الخاصة بالقطارات وبالتالي لسه محتاجة تانية عشان نستكمل العدد المناسب احنا في وضع الأمان نسبيا تقدر تعتبره.. م/علاء فهمي: الأمان محتاجين مش بس الجرارات محتاجين كمان العربيات عبد اللطيف المناوي: بتكلم عن الأمان نسبيا لكن العدد كافي بقصد ندخل موضوع العربيات اصلا العربيات الشابة عندنا عمرها 27 سنة احنا محتاجين ايه عشان نصل الى مرحلة آدمية الوسيلة المستخدمة؟ م/علاء فهمي: احنا بنعمل حاجتين دلوقت احنا بنشتري عربيات لكن مش هنقدر نغير 3 الاف عربية في وقت قليل عايزين مثلا 10 سنين فبنعمل حاجتين بنحاول نشتري عربيات جديدة السنة دي هنوصل ل450 عربية في العام المالي الحالي وليهم موازنات وكل حاجة بعد كده العربيات التانية بنحاول نطور الورش اللي بتحدث وتعمل عمرات للعربيات دي محتاجين ندرب الناس محتاجين نحط نظام صح محتاجين الجودة في المخرج اللي بيطلعه العربية في الاخر جودته شكلها ايه ما تبقاش عملية انتاجية فقط بتطلع.. عبد اللطيف المناوي: يعني سكة حديد مصر بتعتبر من التاريخ في السكة الحديد في العالم يعني هل فيه امكانية انه تعود هذه الصورة لسكك حديد مصر م/علاء فهمي: الاجابة اه ان شاء الله بس هتاخد وقت الاجابة اللي انا حصرتها في الشهور اللي فاتت اعتقد انه هنوصل لكده في سنوات قليلة عبد اللطيف المناوي: ال450 عربية الجداد في أي مستوى حاطينهم؟ م/علاء فهمي: درجة اولى ودرجة تانية ودرجة تالتة عبد اللطيف المناوي: يعني مش مركزين بس .... م/علاء فهمي: فيه منهم 300 درجة تالتة عبد اللطيف المناوي: هل التطوير والتمييز في الخدمة هينعكس علي تطوير وتمييز لاسعار الركوب في الدرجة التالتة؟ م/علاء فهمي: لا الدرجة التالتة لا السكة الحديد انا مش باصص خالص علي الايراد والمكسب عايزين نوصل لنقطة التعادل بس اني محملش موازنة الدولة يعني اكتر من اللي هي بتحدثه والمفروض احنا بنغطي الباقي فانا شايف انه في الفترة اللي جاية لو قدرنا نوصل في المعادلة بتاعة الايراد زي المصروف خلاص عبد اللطيف المناوي: المعادلة دي تتعمل ازاي؟ م/علاء فهمي: المعادلة دي تتعمل في ان احنا نزود شوية ايرادات من موضوع التذاكر يعني احنا دلوقت بنعمل محطة سيدي جابر ومعاها فيه مول تجاري بحيث ان احنا ندي منحة لحد يستغل هذا السوق منحة امتياز لاستغلال هذا السوق واخد منه دخل عبد اللطيف المناوي: زي محطات العالم كله؟ م/علاء فهمي: محطات السكة الحديد في العالم كله بتكسب من الحاجات دي ما بتكسبش من التذكرة بالشكل الكبير فإحنا عايزين نكسب من الخدمات الاخرى المساعدة لكن لو بصيت على الدرجة الاولى ممتاز لو انا جبت حاجة متميزة جدا اعتقد انه من حقنا ان احنا نزود التذكرة فلو احنا قدمنا خدمة متميزة جدا في الدرجة الاولى اعتقد ان احنا هنزود التذكرة عبد اللطيف المناوي: ودا مخططينه انا بس عايز اعرف ان تغطيتكم في الدرجة الاولى الممتازة وتكون اسعارها اسعار اقتصادية في هذه الحالة ودا للحفاظ على اسعار التذاكر ففي الدرجات الاخرى بحيث انها لا تتحرك مش هيحصل تغيير في الاسعار م/علاء فهمي: بالظبط عبد اللطيف المناوي: مشروع سيدي جابر م/علاء فهمي: احنا الحقيقة عندنا 20 محطة فيها الcategory دا بس عايزين نخلص النموذج دا نخلصه واحنا هنديه لحد يستغله لمدة عشر سنين برضه ويدينا دخل ، هنخلص النموذج دا قبل عام ان شاء الله وبالتالي هنشوف هنطبقه فين تاني احنا هنطبقه في محطة طنطاواسيوط وطبعا في محطة مصر هنطورها فانا اتعشم ان النموذج بتاع سيدي جابر دا نعممه ونطبقه في ال20 محطة التانية عبد اللطيف المناوي: قبل ما انقل بالنسبة لمحطة مصر السؤال هو هل هتحافظوا على نفس قيمة المبنى الاثري بشكله ولا عدى الوقت وهيبقى فيه مبنى بشكل مختلف؟ م/علاء فهمي: هنحافظ عليه وبعدين عندنا كمان متحف كده صغير هنطوره ايضا عبد اللطيف المناوي: احد الموضوعات المهمة في مسألة السكة الحديد هي المسألة المرتبطة بالأمان والأمان مرتبط بالإمكانيات والعنصر البشري أيضا السؤال هو إحنا نقدر نحط نفسنا في درجة الامان بنسبة قد ايه لقطارات السكك الحديد؟ م/علاء فهمي: الحقيقة العنصر البشري عندنا محتاجين ان هما يحسوا بالأمان والولاء والإنتماء ودي اللي إحنا شغالين عليها واعتقد انه إحنا وصلنا لدرجات في تقدم ملموس النقطة التانية إن احنا محتاجين الناس كلها تتدرب عندنا اكتر من 40 الف موظف فعايزين ندرب الناس دي التدريب بتاع السواقين بتاع الميكانيكية بتاع البرادين كل دول بيتعملهم منهجية للتدريب بحيث ان كل واحد ياخد الجرعة المناسبة بتاعة التخصص بتاعة سنويا الأدوات بتاعة التدريب المناهج بتاعة التدريب مكان التدريب احنا بنطور معهد اسمه معهد السكة الحديد عبد اللطيف المناوي: ودا من تاريخ السكة الحديد؟ م/علاء فهمي: احنا بنطوره دلوقت وال 4 او 5 شهور هيكون انتهى وهنستفيد منه لعناصر النقل الاخرى ايضا عبد اللطيف المناوي: وسائل الامان؟ م/علاء فهمي: وسائل الامان هي معادلة فيها متغيرات كتيرة جدا من اول السواق اللي بيسوق الى عربية الكهرباء او عربيات الpowerعندنا العربيات دي برضه 30 و40 سنة اشترينا حوالي 20 ، الكهرباء في العربيات اللي بيتعملها عمرة بيبقى متحدث دا امان، الامان بتاع التشغيل نفسه دا امان ، السيمافورات احنا عندنا 15% بس هو اللي متكهرب والباقي كله mechanicalمحتاجين ان احنا نغير السكة نفسها، السكة نفسها متاخرين في 1600 كيلو ان احنا نعملهم وكل سنة بنعمل 200 كيلو عشان نحافظ على عمر السكة ، محتاجين ان النظام كله يبقى واضح احنا يعني احنا بنتكلم على 9 الاف كيلو بنتكلم على 5 هما اللي مستخدمين جامد فدول لازم يتحدثوا لازم تبقى سكة حديد شابة جدا الاحواش لازم تتظبط الاحواش. عبد اللطيف المناوي: ايه هي الاحواش؟ م/علاء فهمي: الاحواش اللي هي مكان الركن يعني ال parking بتاع السكة الحديد محتاجين نبص على المحطات الرصيف لازم يبقى على القطار ما يبقاش اعلى ولا اوطى فيه حاجات كتيرة جدا عبد اللطيف المناوي: عندكم البداية جيدا بالاعتراف ان فيه مشكلات وبعد كده هيكون فيه خريطة واضحة لحل المشكلات هل انتم لديكم خريطة لكل كيلو متر حديد عارفين فين مشاكله؟ م/علاء فهمي: بالظبط يعني عندنا ال 1600 كيلو المفروض يكونوا متحدثين النهاردة عبد اللطيف المناوي: بس مش هنقدر نعمل أكتر من 200 كيلو في السنة م/علاء فهمي: لا .. لازم نعمل دفعة جامدة نعمل 200 وكل سنة نعمل عليهم 300 او 400 وهي دي الخطط اللي احنا حطيناها ومصممين ننفذها عبد اللطيف المناوي: عندكم الموازنة الكافية لدا ولا هتجيبوا الفلوس منين؟ م/علاء فهمي: والله هقول لحضرتك حاجة الفلوس ممكن تيجي يعني احنا عندنا في الفترة اللي فاتت دي يعني احنا عندنا السنة اللي فاتت كان عندنا الموازنة ما صرفنهاش كلها لان فيه قضية اخرى قضية التنفيذ والمشروعات ازاي تتنفذ يعني تعمل مناقصة علشان تجيب عربيات وفي الاخر تطلع المناقصة المواصفات بتاعتها غلط طبعا احنا بنشتغل في القانون 89 يعني لو فيه أي غلطة ما نقدرش نراجعها يبقى هاتوا مناقصة من اول وجديد احنا بنشتري قطارات او معدات سكة حديد غالبا بتصنع يعني ما بتجيش حاضرة الكلام دا كنظام لازم يتظبط تماما ان احنا نطلع مواصفات لازم تطلع المواصفات صح جدا وعلى اعلى مستوى وطبقا للتكنولوجيا الحالية وبعدين انه يبقى فيه كمان دوافع ان احنا نجيب الحاجات دي بسرعة ما نقعدش 4 او 5 سنين عقبال ما تتورد ، عندنا بطء في الاجراءات عبد اللطيف المناوي: هتعالجوه ازاي؟ م/علاء فهمي: نظام .. انا مثلا قلت ان أي مناقصات هنعملها السنة دي لازم نخلصها قبل ما نخلص شهر اكتوبر اللي احنا فيه علشان اضمن اني لما اطلع كراسة قبل شهر اكتوبر اقدر اعرف النماس تقدم لي عقود اقدر اخد وقت ابت في انه صح مش ابص الاقي 30/ 6 ابص الاقي معلش نستنى تاني وتبقى الفلوس راحت فلو انا معايا الفلوس ما انا لازم يبقى معايا الادوات كمان اللي تتنفذ والآلية فالإتنين متوازيين مع بعض التمويل والتنفيذ ودا اللي احنا بنعمله دلوقت، احنا السنة اللي فاتت عملنا 50% من اللي كان موجود في الموازنة السنة دي هنوصل لحوالي 70 او 75% مش هقول 100 % بحيث انه ال systemنفسه يمشي ،system الكراسات والفنيات والاجراءات بحيث ان احنا كمان ناخد حاجة مظبوطة عبد اللطيف المناوي: انتوا مخططين ان نوصل للحالة اللي ممكن نقول فيها ان عندنا قطار بيطلع في ميعاده ويوصل في ميعاده ما بيحصلش زي ماحد من زمايلنا بيتكلم في انه بيقف في الطريق عشان التكييف باظ فناس بيكسروا القزاز عشان يخرجوا منه زي ماحصل الاسبوع اللي فات في قطر قنا السؤال هو امتى نوصل لخدمة منتظمة ، ادمية توصل الناس في ميعادها مخططين لدا امتى؟ م/علاء فهمي: هو عاوز سنوات يوم ايه بالظبط انا مش هقدر اقول لحضرتك عبد اللطيف المناوي: مش هقول يوم كام انا بقول لحد كام سنة تقريبا؟ نقدر نقول دا م/علاء فهمي: المعدلات دلوقت احنا كنا 55% وصلنا 85% يعني من كل 100 رحلة فيه 85 بيطلعوا في ميعادهم احنا عاوزينم نوصل ان شاء الله في اخر السنة انه يبقى 98% يطلعوا في ميعادهم دا اللي اقدر اقوله واقدر اقيسه والتزم بيه عبد اللطيف المناوي: دا بالنسبة للقيام ، بالنسبة للوصول؟ م/علاء فهمي: بالنسبة للوصول كنا 30 او 40% وصلنا ل65% وهنوصل ل90% فيه نقطة مهمة جدا بنتعلمها ان احنا نسمي الحاجات باساميها يعني دلوقت بنعمل تجديد للسكة الحديد في منطقة طنطا مثلا بنعمل تهدئة للقطار دا بيعمل تأخير ربع ساعة لازم نعمل في الجدول بتاعنا ان القطار دا هيطلع الساعة 8 مش هيوصل 10 وربع لا هيوصل 10 ونص احنا ما بنعملش كده لازم نعملها يعني هي شوية اجراءات ونظم بحيث ان احنا نحسن الانتظام بتاع القطارات عبد اللطيف المناوي: فكرة السينافورات وفكرة الانتظام احنا العالم النهاردة بدأوا يوصلوا لمرحلة الاقمار الصناعية بيسيروا القطارات بيها واحنا لسه بنتكلم عن 85% تقريبا لسه بشكل ميكانيكي في المزلقانات احنا امتى هنوصل للمستوى دا او قريب من المستوى دا؟ م/علاء فهمي: السكة طويلة شوية لكن احنا عارفين رايحين فين زي ما حضرتك الاشارات اللي انت بتتكلم عنها دلوقت فيه نظام اوروبي بيسموه مستوى اول احنا بنشتغل فيه في الحتة اللي عندها كهربا وفيه عندنا مشروع من عرب الرمل لحد اسكندرية ومن بني سويف لحد اسيوط ودا ممول كمان من البنك الدولي ، احنا مش مكتفيين بكده الحقيقة احنا باصين ان احنا نوصل للمستوى التاني ومستوى الاقمار الصناعية في نفس اللحظة بتاعة المستوى الاولاني احنا مش مكتفيين ان فيه مرحلة اولى او ان المستوى الاول هو اللي يكفينا ..لا.. احنا عايزين نخش لا على مستوى اعلى حاجة موجودة دلوقت في العالم هو استخدام ترددات المحمول دا بيستخدم في انتظام الخدمة وفي توجيه القطارات احنا بنذاكر الكلام دا دلوقت بحيث ان احنا ننفذه ايضا في نفس الوقت بنوصل الاشارات الكهربائية لاعلى مستوى المشكلة الكبيرة ان احنا عندنا سكة حديد لحد اسوان مش متكهربة كلها فاحنا محتاجين ان احنا نكهرب الكلام دا كله او نكهرب الحتت اللي فيها الحتت اللي فيها العملية ذكية شوية نكهرب الحتت اللي فيها حركة المرور عالية جدا فمحتاجين ان التحكم يبقى عالي جدا والحتت اللي هي زي الاقصرواسوان مفيش حركة عليها كتير عبد اللطيف المناوي: ممكن تشتغل manual او ميكانيكي؟ م/علاء فهمي: بالظبط مش لازم نعمل كل حاجة نعمل الحاجة اللي توصلنا لمعدل الامان الي هو 99.9 عبد اللطيف المناوي: احنا معدل الامان تقريبا دلوقت كام وفقا للمعايير العالمية؟ م/علاء فهمي: سؤال صعب عليا جدا لكن اقول لحضرتك انا بحاول ان احنا نوصل..... عبد اللطيف المناوي: قول ومش هنقول لحد م/علاء فهمي: هو الحقيقة انا دا اللي شاغلني طول الوقت انه يبقى عندي معدل امان واضح رقم عبد اللطيف المناوي: احنا معندناش معدل امان؟ م/علاء فهمي: معدل امان هقول لحضرتك حاجة لما تكون اشارة القطر بيفرمل لما يعدي على اشارة حمرا دا موجود دا بيدي نسبة امان 99.9 لكن انا اقول انه لو السواق ما يشوفهاش حمرا ما يعديش او يكسر الاشارة، لو كان عندنا مشكلات في السينافورات مطفية او حصل لها أي مشكلة بنمشي بنسبة امان برضه 99.9 بحيث انا ما بتنقلش من المحطة دي الا لما القطر اللي في المحطة اللي قبليها مشي طبعا بيحصل تأخير بس المسألة الاولى الامان عبد اللطيف المناوي: برضه هل لدينا معدل او متوسط للامان غير ال99.9 اللي احنا بنتكلم فيها م/علاء فهمي: معدل الامان الدولي بيتقاس لما يبقى فيه نظم متحكمة في القطرات بالكامل فبيقدر يقول مقدار عدم الامان ايه في المية لكن احنا اغلب النظام يدوي فمعتمد على البشر وبالتالي قياسه .... عبد اللطيف المناوي: هل احنا محطوطين في أي category في أي قياس عالمي لمعدل الامان في السكة الحديد في مصر كام في المية م/علاء فهمي: اه احنا كنا بنعمل دارسة مع البنك الدولي عشان نشوف الاشارات انا قلت لهم النظام اللي احنا هنعمله دا هيدينا معدل امان قد ايه قال هيرتفع بمعدل الامان بس في الآخر هيبقى معتمد على الموارد البشرية في الاخر ان هي اللي تتحكم لان احنا عندنا الموضوع كله تحكم الي ففي الاخر هتبقى معتمدة على البشر وكل ما نعلم الموارد البشرية اكتر كل ما زودنا معدلات الامان اكثر واكثر عبد اللطيف المناوي: واضح ان الحوادث خفت في الاشهر الاخيرة اذا ماقارناها بمعدلات سابقة عليها السؤال هو هل مرتبطة المسألة بحظ شخصي ولا مرتبطة باجراءات تم تنفيذها م/علاء فهمي: طبعا انه طالما معندناش التحكم الكامل في كل الادوات فالحظ كويس شوية وفي نفس الوقت خدنا الاجراءات بتاعة المنظومة بتاعة اللي بيشغلوا السكة الحديد العاملين في السكة الحديد العاملين لازم يبقوا مرتاحين وهما بيشغلوا هذه المنظومة وهو حاسس ان دي منظومته وبالتالي بيقدر يحسن من الاداء بتاعه وبالتالي تقل الحوادث انا شايف ان هما ملتزمين بالتشغيل والامان على اعلى مستوى الحقيقة واعتقد ان النتيجة كويسة في الحوادث قلت وفي الانتظام احسن عشان الموارد البشرية بتشتغل احسن عبد اللطيف المناوي: اتعاملت ازاي مع اضرابات واحتجاجات السكك الحديد؟ م/علاء فهمي: والله الحمد لله مفيش حاليا دلوقت خالص عبد اللطيف المناوي: برضه دا حظ .. م/علاء فهمي: لا .. بص دول مصريين احنا بنتعامل معاهم احنا مع بعض كعيلة واحدة دا اللي انا حسيت بيه في اول يوم في التعامل مع رجالة السكة الحديد من اول رئيس الهيئة لحد العامل اللي تحت انا بقالي 9 شهور بس معاهم بس بحس ان هما ناس رجالة جدا جدا والحقيقة سيادة الريس دايما يقول خد بالك من رجالة السكة الحديد وصلت لهم دا فحسوا ان هما بؤرة اهتمام الدولة كلها انتوا يا رجالة معذورين برضه ما احنا سايبينكم فترة من الزمن محتاجين ان احنا نراجع مع بعض كلنا بس اعملوا اللي عليكم واحنا نعمل اللي علينا فابتدت فيه منظومة كاملة بشرية قلبها على بعض بشكل او باخر وبتوع السكة الحديد دلوقت بجد بيبقوا بيخدموا الناس في القطار عشان يحسنوا صورتهم الذهنية ودا حقهم هما ناس كويسة وبتتعب وشقيانة ما تعرفش حضرتك السواق اللي بيركب دا دا شكله ايه بيركب الجرار دا بيعاني قد ايه خلال 12 ساعة او 14 ساعة بيعاني من حاجات كتير قوي يعني شغلانة صعبة فلازم ان احنا كلنا ناخد بالنا ونعرف انه بيشتغل شغلانة صعبة انه لازم نراعيه وهو في نفس الوقت لازم يراعي شغله ويراعي اكل عيشه ويراعي زمايله عبد اللطيف المناوي: المراعية المتبادلة بين الطرفين هي اللي عملت حالة من حالات التهدئة النسبية في السكك الحديد في الفترة الاخيرة ممكن نقول كده؟ م/علاء فهمي: ممكن نقول كده وبعدين هي مش تهدئة نسبية هي تهدئة عادية دا اللي يجب انه يحصل لانه السكة الحديد مرفق مهم جدا والناس اللي فيه ناس كويسة جدا اغلبهم بسطاء وعايزين يعيشوا عبد اللطيف المناوي: الجرارات اللي جايبنها جرارات صيني ولا فرنسي ولا ايه بالظبط؟ م/علاء فهمي: لا جرارات امريكاني عندنا 120 جرار امريكاني 40 منهم من شركة AMT و80 منهم من شركة GE عبد اللطيف المناوي: المسألة الخاصة بمترو الانفاق هذا الهبوط المتكرر في اثناء عمليات حفر المترو ايه سببه وهنوصل فيه لايه يعني هل دي مسالة امنة هل فيه مشكلة ممكن تحصل في الفترة القصيرة دي م/علاء فهمي: الحقيقة كان حصل هبوط السنة اللي فاتت وحتى الارض هبطت جامد على الحفار والحفار معرفش يكمل، الحتة دي اصعب حتة في القاهرة كلها لان دا كان مجرى مائي للقاهرة كلها المحجرى المائي دا حصل عليه كذا طبقة عبر السنين فالحفار بتاع مترو الانفاق لما بيحفر لازم يحفر في حاجة صلبة عشان يعرف يحفر صح ويلاقي الجرافات تخش وبعد كده يسحب رمل يحصل هبوط فالحقيقة الشركة والمقاول والاستشاري بيتعاملوا مع الموضوع دا بمنتهى الحرص ويخشوا تحت الارض عشان يعرفوا يحفروا فيها، السيد رئيس الوزراء الدكتور احمد نظيف افتتح الحفار الجديد ومشي تحت جراج العتبة وعدت سليمة ومشي تحت سنترال الاوبرا وعدت سليمة مشي تحت حوالي 150 متر تحت عمارات منها تحت الازالة وعدى وطلع لشارع الجيش وعدى واحنا قلنا الحمد لله ، المحطة بتاعة باب الشعرية التقرير لسه ماجاش من الخبراء او الاستشاري لكن يبدو الحفار وهو داخل دي كانت حتة معمولة مش لحتة دخول وانما خروج مصممة ومعمولة عشان الحفار يخش فيها من الناحية التانية فحصل خطا بسيط كده عمل شرخ جاب مية، المية دي سحبت شوية رمل الاسفلت نزل فعملت الهبوط بسيطة جدا بالنسبة ومش مخيفة، احنا فاضل لنا جزء لحد 300 متر عشان نوصل لمكان الحفار القديم ونبقى فتحنا بقى من العتبة للعباسية النفق كمل احنا داخلين تحت نفق الصرف الصحي الشهر الجاي ونفق الصرف الصحي احنا عدينا عليه مرتين واحنا بنعمل نفق الازهر بس تخيل انبوبة 4 متر داخلين من تحتيها ل11 متر فمعمول تحصينات رهيبة يعني التربة كلها متجمدة تحتيها باسمنت بمادة جديدة بتكنولوجيا جديدة عبد اللطيف المناوي: احد الحلول الاساسية في أي مجتمع من المجتمعات للخروج من ازمة الزحام الرهيبة اللي موجودة ان يجد المواطن وسيلة نقل عامة ادمية تدفعه ان هو يستخدم وسيلة النقل دي بدل ما يستخدم العربية بتاعته وجود وسائل نقل ادمية ممكن تصل بنا الى حل جزء امتى نستطيع ان احنا نوصل لهذا في مصر؟ م/علاء فهمي: احنا الحقيقة مشكل النقل الجماعي في مصر لعدم وجود شبكة واضحة لنقل الجماعي لما نتكلم عن مواصلة آمنة ومريحة للمواطن المصري بنتكلم عن شبكة متكاملة من وسائل المواصلات بنتكلم على سكة حديد مع مترو مع اتوبيسات مع العربيات بتاعتنا اللي هو التكامل ، التكامل دا محتاجين ان احنا نبني شبكة واضحة للنقل الجماعي زمان لما كنت عاوز تروح لاي حتة في مصر لازم تروح الاول التحرير بعد كده بقت 4 العتبة وبعد كده بقت العباسية احنا محتاجين نعمل شبكة واضحة للنقل الجماعي وشبكة لنقل البضائع اللوجستيات الشبكات دي بتخلي النقل مش من الباب للباب عبد اللطيف المناوي: تقصد ان حد بيسلم من نقطة لنقطة عشان توصل للنقطة التالتة اللي انت عايزها لكن مش فكرة التواصل المباشر يعني مترو الانفاق م/علاء فهمي: مترو الانفاق المحطات الجديدة اللي بنعملها بنبص لها على جراجات حواليها ومواقف نقل عام حواليها المترو الخط التالت اللي كنا بنتكلم عليه هيوصل لكلية البنات فلازم يوصل محطات جديدة لمصر الجديدة ومدينة نصر انها تتحسن ايضا ودا يبقى واصل للقاهرة الجديدة ويبقى فيه تكامل لعناصر المواصلات مترو الانفاق من ضمن الحاجات اللي هتشعر المواطن بان فيه خدمة احسن احنا وصلنا الى انه اكتر من 2 مليون مواطن بيستعمل مترو الانفاق في اليوم ، ال2 مليون دول انت لو ترجمتهم لاتوبيسات كنا محتاجين 40 الف اتوبيس لو ترجمتهم لميكروباصات محتاجين لربع مليون لو عربية محتاجين نص مليون عربية فاحنا الخط التالت دا عتبة عباسية هيضيف 250 الف وبعدين المرحلة التالتة هتضيف 500 يبقى نقدر نزود 750 الف في خلال سنتين ان شاء الله لما نخلص المرحلة الاولى والتانية ، الخط التالت دا ميزته انه بيقطع مصر او القاهرة الكبرى من الشرق للغرب عكس الخطين التانيين اللي قطعوه من فوق لتحت فقلنا لازم نبتدي نتحرك بسرعة جدا في المرحلة التالتة والرابعة، المرحلة التالتة توصل الكيت كات وامبابة والمنيب والمرحلة الرابعة توصل لحد مطار القاهرة والقاهرة الجديدة فالمشكلة هنا وقت التنفيذ اللي هو عايز فلوس وعايز شركات تقدر تعمل الكلام دا بدل ماهي مخططة سنة 20 او 22 لا نخلصها 15 ودا اللي احنا بنحاول دلوقت ان احنا نجد كل الوسائل والسبل اللي توصلنا للمعدلات دي. عبد اللطيف المناوي: المترو لما بدأ كان يبدو انه فيه فعلا مستوى ممتاز في النظافة في الالتزام في المواعيد الامور ما بتعتقدش انها بدأت تتراجع بشكل كبير فين الخلل هل هو خلل في الادارة ولا الاستخدام ولا زحام م/علاء فهمي: كل الكلام دا له تاثير الخط التاني لا باس به لسه جديد ، الخط الاولاني فيه مشكلة لانه فيه قطورات كانت بتشتغل في مترو حلوان بتاع زمان دلوقت اللي احنا بنعمله برضه خطة حوالي 4 مليار جنيه لتحديث الخط الاولاني والتاني الخط الاول مشكلته انه حتة الاشارات بتاعته قديمة الاجهزة الالكترونية قديمة التكنولوجيا بتاعته قديمة محتاجة تتحدث فعندنا خطة دلوقت الحقيقة انا بركب المترو كتير عشان اشوف التهوية، التهوية مشكلة وخصوصا لما يكون في وقت زحمة او مدارس على فكرة الخط التالت كله مكيف الخط التاني جبنا له 4 عربيات مكيفة عبد اللطيف المناوي: مستهدف انك توصل تدريجيا الى ان كل الخطوط الاول والتاني والتالت تكون عربيات مكيفة فيه؟ م/علاء فهمي: بالذات التالت والتاني لكن الاولاني اصل مش بس تكلفة تكييف القطر لا تكلفة السيستم كله لازم يبقى عندك كهرب في الخط كله تقدر تغطي احتياجات التكييف فهو الخط الاول جزء الخط التاني اغلبه الخط التالت يبقى كله مكيف عبد اللطيف المناوي: الموضوعات الخاصة بالنقل متداخلة مع عدد كبير من الوزارات الاخرى ومن المحليات ومن الهيئات الاخرى الى أي مدى هناك شكل من اشكال التنسيق بين كل هذه الاطراف ولا مازال عندنا عيب الجزر المتصادمة م/علاء فهمي: لا انا الحقيقة من ساعة ماجيت الوزارة والتعاون واضح يعني وزارة الدفاع ووزارة الداخلية دول بيعملوا supportبيعملوا دعم تنسيق متكامل مع وزارة الدفاع ، الداخلية متداخلة معانا في كل الامور اللي على الطرق وشرطة السكة الحديد وشرطة المرافق بيتعاونوا تعاون كامل الحقيقة .. نبص عل محور تاني محور التمويل علاقة كويسة قوي مع وزارة التنمية الاقتصادية مع التعاون الدولي بحيث ان انا عايز من دا يتحط لي في الخطة وعايز من دا يديني تمويل من الموازنة وعايز من دا يجيب لي قروض ومنح ، التجارة والصناعة فيه تعاون بيني وبينهم في مجال اللوجستيات انا بجهز لهم الارضية بتاعة التجارة الطرق والمراكز ومراكز التوزيع مع السياحة ومجرى نهر النيل احنا الحقيقة بنجهزه له والحقيقة بقى جاهز للملاحة الجيدة جدا لكن بطبيعة نهر النيل بيبقى محتاج كل شوية اعداد وتجهيز يعني لازم يكون فيه صيانة ليه عبد اللطيف المناوي: طب شكل العلاقة بينك وبين المحليات في المسألة الخاصة بالطرق السريعة وطرق السفر اعرف انه فيه مشاكل تقاطع اختصاصات خليني اسميها وفيه مشكلات بين المحليات ووزارة النقل ووزارة الاستثمار انتوا فين من الكلام دا؟ م/علاء فهمي: الطرق الرئيسية والسريعة بين المدن والمحافظات والطرق الداخلية داخل المحافظة دي تبع المحافظات والنقل الجماعي اللي بين المحافظات وزارة النقل، النقل الجماعي بين المدن داخل المحافظة احنا عاملين تفويض المحافظات لانهم ادرى بالجو بتاعهم والطلب يعني المزلقانات بتعمل عدد من الحوادث لا باس بها تلت الحوادث من المزلقانات فاحنا داخلين لتجديد ل345 بنغير شكلهم بالكامل عبد اللطيف المناوي: من كام مزلقان تقريبا؟ م/علاء فهمي: عندنا اكتر من 1200 مزلقان بس فيه مزلقانات بتاعة بضاعة احنا لو عملنا المزلقانات هيقللوا 99% من الحوادث عبد اللطيف المناوي: دول يخلصوا امتى؟ م/علاء فهمي: قبل 30/6 عبد اللطيف المناوي: كام من الحوادث اللي بتسبب فيهم المزلقانات؟ م/علاء فهمي: 35% .. احنا محتاجين عشان المزلقانات دي الطرق بتاعته تبقى صح عشان ما يحصلش حوادث الكهربا بتاعته اللي عايزينها محتاجين تنسيق كامل مع المحافظات عبد اللطيف المناوي: بالنسبة للطرق بين المحافظات الى أي مدى عندكم دراية بطبيعة المناطق الخطرة في هذه الطرق وخطة لاصلاح هذه الطرق المناطق الخطرة فيها على الاقل؟ م/علاء فهمي: النقط السوداء كمناطق خطرة ولانها عايزة صيانة واحنا عندنا مشكلة في الصيانة الحقيقة، احنا محتاجين نعمل دفعة جامدة جدا في النقط السودا كلها واعلي مستوى الصيانة بتاعة الطرق لانها محتاجة لفلوس عالية جدا ورقم كبير عبد اللطيف المناوي: انتوا عاوزين قد ايه صيانة عشان نحافظ على الطرق؟ م/علاء فهمي: 4 مليار والنهاردة يتعمل لانه طبعا كل يوم وكل سنة .. عبد اللطيف المناوي: اظن انت بتتفق معايا ان حياة المصريين تساوي اكتر م/علاء فهمي: اه طبعا فاحنا مش هنستنى ال4 مليار احنا بناخد اجراءات سريعة دلوقت في انه النقط السودا دي بنحسنها اصل حوادث الطرق ناتجة عن صيانة الطرق احنا بنشتغل في حوالي 6 او 7% لان اغلب حوادث الطرق هي اخطاء بشرية في القيادة، لما وزارة الداخلية مشكورة حطت رادارات وكاميرات على بعض الطرق المحورية بتاعتنا الحوادث قلت خالص والمخالفات نزلت من 7 الاف مخالفة الى 1500 مخالفة في خلال شهر عبد اللطيف المناوي: بس دا معناه ان كمان الدخل قل عشان المخالفات ... المهندس علاء فهمي الموضوعات الخاصة بالنقل كثيرة ومتعددة وبالتالي احنا هنحتاج في مرات اخرى نتكلم عن النقل النهري والنقل البحري وامكانية استخدام وتوسيع الطرق بالنسبة للتجارة لكن قراركم اللي اخدتوه فيما يتعلق بالحجاج والنقل البحري دا شكل من اشكال الاعتراف انه كان فيه خلل كبير موجود في مرحلة سابقة ايه اسباب هذا القرار وناويين تستمروا فيه لغاية امتى؟ م/علاء فهمي: احنا العبارات اللي موجودة سعة 10 الاف راكب لكن فيه حج سياحي وحج قرعة الحج السياحي بعضه هيستعمل مراكب لكن حج القرعة وزارة الداخلية فضلت تحط معايير متشددة شوية للمراكب او العبارات والتكلفة بتاعة الطيران بقت متقاربة تقريبا من العبارات فالداخلية فضلت تحط معايير عالية شوية ودا ما بيقولش ان العبارات اللي عندنا لاتصلح للابحار بالعكس العبارات دي عملت موسم عمرة رائع عبد اللطيف المناوي: انتوا المعاير الخاصة بالعبارات مفيش تنازل فيها؟ م/علاء فهمي: نهائي واحنا بيتقال ان احنا متعسفين بس يتقال عننا كدا بس ابقى ضامن ان العبارة ماشية بقدر الامكان ان ربنا هيسترها معانا عبد اللطيف المناوي: المهندس علاء فهمي لاعب الكرة السابق في النادي الاهلي رغم ان هو زملكاوي وكلمتني عن شعورك واحساسك بان افضل اللحظات هو لحظة احراز الهدف السؤال هو حاسس انك انت مقترب انك تحرز هدف وتحقق انجاز في مهمتك الصعبة لازم اعترف ان هي صعبة في مجال النقل م/علاء فهمي : اه طبعا كذا جون يعني الطريق لحد الكيلو 27 وادي النطرون المفروض نخلصه في 2012 بس انا عايز اخلصه على 30/ 6 اللي جاي ويبقى طريق حر على اعلى مستوى نستحقه احنا كمصريين الحاجة التانية فيه السنة الجاية ان شاء الله المرحلة الاولى بتاعة مترو الانفاق الخط التالت ودا هيبقى جون حلو قوي في اللصعوبة البالغة في الارض اللي احنا بنشتغل عليها دلوقت في اكتوبر الجاي وكمان كوبري الواسطة وكوبري ملاوي يبقوا جونين بنحاول نجيبهم السنة الجاية باذن الله زائد السكة الحديد ان على 30/6 تكون الصورة الذهنية لسكة الحديد تكون اتحسنت ان شاء الله عبد اللطيف المناوي: مهندس علاء فهمي اتمنى لك العديد من الانجازات ومن الاهداف تحققها والتي تصب في النهاية في مصلحة المواطن المصري نتمنى لك التوفيق من اجلنا جميعا في هذه المهمة التي انت فيها نشكرك على هذا الحوار السيدات والسادة الى اللقاء في مرات قادمة باذن الله * لمشاهدة الحلقة كاملة "فيديو"
