وراء الاحداث

د/عبد المنعم سعيد:مساء الخير .. منذ بدأ برنامج وراء الأحداث منذ أكثر من 13 عاما وفى كل مرة يوجد فيها كأس العالم نجد أنفسنا أمام مشكلة – المشكلة هى أننا برنامج وراء الأحداث برنامج مهتم بالأمور السياسية بالذات المتعلقة بالعالم وتطوراته والأحداث الإقليمية المتعلقة بمصروأحيانا ندخل الى السياسة الداخلية بشكلٍ أو بآخرأو تجبرنا الأحداث أن نتعامل مع عدد من القضايا المحورية داخل مصر ، ولكن السياسة والإقتصاد هما موضوع هذا البرنامج ، ولكن عندما تأتى دورة كأس العالم نجد أنفسنا أمام مشكلة أهم حدث داخلى وخارجى ومباريات كأس العالم حتى كثيرمن القضايا الداخلية التى يجرى وراءها الجدل تكاد يخفت صوتها يخفت الحديث عنها بينما الجميع يشاهد المباريات الجارية الحوادث العالمية المختلفة أيضا نسمع أن لقاءا ثنائيا على مستوى القمة بين أنجيلا ميريكل الألمانية وحديثها مع رئيس الوزراء البريطانى جيمس كاميرون كلاهما يتحدث فى هذه القمة أو يكاد يكون الحديث الوحيد عن المباراة بين إنجلترا وألمانيا .
بالنسبة لنا فى مصركان كأس العالم هذه المرة فيه تقاطع مع مصر فى على الأقل مرتين هامتين الأولى أن مصر حاولت أن تدخل منافسةً فى كأس العالم أو لكى تحصل على مباريات نهائيات كأس العالم على أرضها فى 2010 ولكن ما حدث هو أن ما عُرف بعد ذلك بصفر المونديال الشهيرالذى نتيجة أسباب متنوعة فازت به جنوب أفريقيا وهى التى نشاهدها الان هذا الموضوع لا يزال من الموضوعات التى نتذكرها من وقتٍ الى آخر ونتساءل عما إذا كنا لوأحنا اليوم سوف نقوم بإستضافة هذه المناسبة الهامة هل لدينا البنية الأساسية للإستعداد الشعبى والإستعداد الحكومى للتعامل معها .
التقاطع الآخرأيضا كان له مناسبة غيرعادية وهى أن مصر بالفعل إقتربت جدا من الوصول الى نهايات كأس العالم فى المباراة الشهيرة بين مصر والجزائر فى القاهره والتى إنتهت بفوز مصربهدفين ومن ثم تساوت الأقدارمرة أخرى مع الجزائرمما إنتهى إليه الأمرالى مباراة فاصلة فى الخرطوم خسرناها وسط ظروف مؤسفة لكن هذه الظروف المؤسفة كانت وراءها رداء سياسى هام حول فكرة القومية العربية هل يجوزإنه يحدث مثل هذا القدرمن تشاحن حول مباراة لكرة القدم مَن شاهد على الانترنت والفيس بوك وكل هذه الأمورالحديثة يجد جدلا وردحا وأحيانا إهانات وأحيانا أخرى مَنْ يقول نحن إخوة وعرب ومسلمين وعلينا أن لا ندخل فى مثل هذه الصدامات .
بمعنى آخرسواء كان الأمرتعلق بالمونديال أو تعلق بدخولنا الى المونديال كان هناك رداء سياسى للقضية كلها لم يكن كأس العالم أمرا عاديا كان أمرا له علاقة بالدولة المصرية كدولة وبالهوية المصرية كهوية.. هل وصل الأمرفى كرة القدم الى هذا القدر ؟ ليس فقط بالنسبة لمصر ولكن بالنسبة للعالم كله لان مباريات كرة القدم فيها كثير من الحياة فيها الهجوم والدفاع فيها ما يسمى بالتكتيك والمسمى بالإستيراتيجية يوجد فيها مسألة إحرازالهدف فكرة التدريب فكرة.. أفكار كثيرة هى جزء من حياتنا اليومية لكى نعمل من أى شيئ إنشاء محطة مياه إنشاء محطة كهرباء فكرة المنافسة اللى موجودة كل يوم المنافسة فى سوق العمل المنافسة فى الحصول على شقه المنافسة فى إنتاج سلع وبضائع وقيم وأفكار وأموركثيرة .. أنظرالى الصحافة سوف نجد تعبيرات هى فى الحقيقة جزء من مجال السياسة ومجال الإستيراتيجية لا تؤخد بمعنى الإستعارة اللغوية وإنما تؤخذ بمعنى أن مباريات كرة القدم تمثل أشكالا هامة من الحياة هى نوع زى ما بيسموها باللغة الانجليزية ( مايكرو كوزم من الكوزميك ) اللى هو الكون لان هو كون صغيرجدا يأتى فى ملعب متحددة أوصافه ومواصفاته ولكن يظهر فجأة فيها الثقافه والسياسة والصراع والمنافسه وأيضا التدريب والتجهيزلتحقيق هدف بعينه .
يعنى إستعراض سريع لعناوين صحف سوف نجد فى كلٍ منها كلمات هى فى الحقيقة مأخوذة من المنافسة والصراع السياسى بين الدول .
يعنى صحيفة الإتحاد يوم الثلاثاء 22 يونيو بتقول محاربوالصحراء يهددون " أبناء العم سام " .. محاربو الصحراء هنا الإخوة والأشقاء من الجزائر وأبناء العم سام هم أبناء الولايات المتحدة الأمريكية – هوتعتبر عادةً العم سام كان يستخدم عن الحكومة الأمريكية هناك فى أمريكا بمعنى الرجل الطيب الطويل الذى له ذقن بيضاء لكن فى العالم الخارجى بمعنى القوة الإمبراطورية وأحيانا الإستعمارية للولايات المتحدة الأمريكية .
صحيفة أيضا الإتحاد فى نفس اليوم تقول الفلسطينيون يتمنون فوزالجزائرعلى أمريكا .. ليس فقط لان الفلسطينيون يؤيدون بلدا شقيقا ولكن لانهم يرون أمريكا يعنى متحالفة أو متقاربة مع إسرائيل .
تعبيرآخر تستخدمه الإتحاد فى نفس اليوم أورجواى والمكسيك يملكان حق تقريرالمصير .. حق تقريرالمصيرده أحد مبادئ القانون الدولى المشهود لها بأنها تعطى للدول غير المستقلة لكى تخرج عن دائرة الإستعمار .
الإتحاد أيضا ولدينا منها الكثيرهنا إن بطاقة "الفيفا " تنقذ صحفيا من مهمة " الإرهاب " – والبرتغال تكتسح كوريا الشمالية .. فضيحة – فضيحة بالسبعة .. يعنى الإتحاد أيضا فيها فى الحقيقة أموركثيرة نجد فيها تعبيرات دولية زى مقال لباسكال بليفاز مديرمركزالعلاقات الدولية فى باريس ومترجم فى الإتحاد " كيف تفوق الفيفا على الأمم المتحدة ؟ .. هنا الفيفا ينظر إليه كمنظمة دوليه تضم دول ومجتمعات العالم ولها قرارات فوق الدول يعنى بمعنى أنها تقرر أن لاعبا يخرج من ناديه أو لا يخرج هناك محاكم كلنا نعرف قصة عصام الحضرى والنادى الأهلى والى آخره كلها تتم وحسبا يُقرر الفيفا فى النهاية وعلى الانديه الوطنية أن تنصاع بغض النظر عن ما الذى تريده الدولة المصرية وأى دولة أخرى فى العالم فى هذا المجال.
الانجليز لديهم 6 أسباب لقهر الألمان ومواصلة المسيرة .. لاحظ هنا مسألة الانجليز والألمان والحرب العالمية الثانيه يعنى .
الأهرام نيجى مش الإتحاد المرة ديه يوم 27 يونيو بتقول أم المعارك الكروية بين ألمانيا وإنجلترا– وراقصوالتانجوأمام المكسيك– أم المعارك دا تعبيرإستخدم فى حرب الخليج وأيضا مسألة ألمانيا وإنجلترا وطرفى الحرب العالمية الأولى والحرب العالمية الثانية التانجو جزء من الثقافة اللى هى متعلقة بالأرجنتين .
رائحة الثأرتفوح من الموقعة الألمانية– الانجليزية – دا موجود أيضا فى أهرام يوم 27 يونيو
النهاربتقول " من جديد أفريقيا ساحة قتال بين الألمان والانجليز– ساحة قتال يعنى فى العالمين كأنها معركة العالمين مرة أخرى .
(الإتحاد ) ليلة الحرب المونديالية بين ألمانيا وإنجلترا .. أكثرالتعبيرات التارخية إستخدمت فيما يتعلق بموقعة ألمانيا وإنجلترا .
الألمان يلقنون الانجليزدرسا قاسيا فى ملحمة مونديالية تاريخية لا تنسى دا للشرق الأوسط يوم 28 يونيو.
الأهرام فى ملف كأس العالم الإثنين 28 يونيو البرازيل وتشيلى مواجهة لاتينية على الأرض الأفريقية .
الأرجنتين تفوزعلى المكسيك 3/1 وتلاقى الماكينات الألمانية فى دورالثمانية..التعبيردا موجود فى الأخباريوم 28 لكن ذائع فى كل الصحف نلاقى كلام عن الماكينات الألمانية ، البصمه البرازيلية ، التانجوا الأرجنتينى ، الأجهزة اليابانية- طبعا كان الفريق المصرى لو كان راح كان هيبقى فيه حديث عن الفراعنة فيه لمسة من الثقافة من التاريخ من إيه الحاجى بالظبط التى تُميِّزشعبا عن آخرما الذى يجعل الألمان ألمانا وما الذى يجعل البرازيليين برازيليين وما الذى يجعل اليابانيين يابانيين .
الشروق بتقول ألمانيا تسحق إنجلترا برباعية تاريخية .. لاحظ هنا تعبيرتسحق وتمحق والى آخرها من التعبيرات اللى هى مرتبطة بالتفاعل الانسانى وفكرة المنافسة والصراع بين الدول وبين الأفراد أحيانا .
هذه الحلقة من برنامج وراء الأحداث سوف تكون حول كأس العالم وضيفنا فيها هو ك عصام عبد المنعم .. ك عصام عبد المنعم محلل معروف فى قنوات تليفزيونية متعددة بيحلل كثيرا المباريات فى جوانبها الفنية من ناحية تبديل اللاعبين وهل الفرقه مناسبه منذ البدايه وهل هناك فراغ خلف خطوط الهجوم والدفاع والوسط الى آخر ما نسمعه من الإستديوهات التحليلية لكن سوف نناقش معه فى هذه الحلقة مناقشة سياسية دولية وأحيانا كروية .. قبل أن نلتقى مع ضيفنا ك عصام عبد المنعم تعالوا نستمع الى هذا التقرير .
فاصل " تقرير "
دائما ما كانت السياسة حاضرة فى كأس العالم لكرة القدم ولكن حضورها فى الدورة الحالية المقامة فى جنوب إفريقيا أكثروضوحا .. فمنذ أن أعلن الإتحاد الدولى لكرة القدم الفيفا عن إختيارجنوب إفريقيا لإستضافة كأس العالم 2010 قفذت السياسة الى ذهن المتابعين إذ إستعاد الجميع تاريخ جنوب إفريقيا ونضالها بقيادة نيلسن مانديلا ضد نظام الفصل العنصرى متسائلين عن قدرة جنوب إفريقيا فى إستغلال هذا الحدث الذى يتابعه حوالى خمس سكان العالم لتغيير صورتها لدى العالم التى يسيطر عليها أنها بلدٌ للجريمة وإنتشار مرض الإيدز وقبل ذلك كانت السياسة حاضرة كونها المرة الأولى التى تستضيف قارة إفريقيا تلك البطولة التى كانت حكراعلى دول إوربا وأمريكا اللاتينية بما وضع تحديا آخر على جنوب إفريقيا يتصل بقدرة دولةٍ إفريقية يعانى 40 % من سكانه من الفقرعلى تنظيم كأس العالم بمستوى لائق ثم كان كأس العالم سببا فى إلغاء جنوب إفريقيا مؤتمرالسلام الذى كان مقررا عقده فى جوهانسبرج قبل إسبوعٍ واحد من إنطلاق كأس العالم بحضورالدلراى لاما خوفا من أن يخطف المؤتمرالأضواء وإهتمام وسائل الإعلام من كأس العالم رغم ما يمكن أن يحدثه ذلك من آثارعلى العلاقة السياسية بين جنوب إفريقيا بالصين .
ومع إنطلاق فاعليات التصفية المؤهلة لكاس العالم كان السياسة حاضرةً أيضا وكان الحضور الأهم هوما حدث بين مصروالجزائر لحجز بطاقة التأهل إذ كاد ما حدث بين الفريقين فى الخرطوم أن يؤثر على مستوى العلاقات السياسية بين البلدين وع إنطلاق فاعليات البطولة نفسها اطلت السياسة مرة أخرى فى مواقف كثيرة كان أهمها ما أثيربشأن المواجهة بين منتخبى الولايات المتحدة وإنجلترا وما حدث من الرئيس الفرنسى عقب خروج المنتخب الفرنسى من الدورالأول بل إن متابعة مباريات كأس العالم قد طغت على إهتمامات رؤساء مجموعة العشرين فظهرت المستشاره الألمانية إنجيلاميركيل ورئيس والوزراء البريطانى ديفيد كاميرون وهم يتابعون مبارات المنتخب الألمانى مع المنتخب الانجليزى كما حرص الرئيس اوباما على تشجيع منتخب بلاده قبل سفرهم الى جنوب إفريقيا وأثناء خوضهم للمباريات مع إنجلترا ثم مع غانا ، أما الرئيس الليبى معمرالقذافى فقد إنتقد المونديال معتبرا أنه مشروعٍ إستغلالى بدلا من كونه رياضىٍ ترفيهى ومشروعا للفساد وغسيل الأموال . بإختصارفإن كأس العالم لكرة القدم لم يكن بطولةً دوليةً للعبة رياضية وفقط بل إن السياسة ومعها الإقتصاد والثقافه كانت حاضرةً دائما فما هى أهم دلالات إستضافة جنوب إفريقيا لكأس العالم ؟ وما هى العلاقة بين كرة القدم وكلٍ من السياسة والإقتصاد والثقافة فى الدورة الحالية من كأس العالم ؟ وما هى حدوث تأثيرالتكنولوجيا على مجريات مباريات كرة القدم هذه هى أهم التساؤلات التى تناقشها تلك الحلقه من برنامج وراء الأحداث .
فاصل
د/عبد المنعم سعيد:كأس العالم فى كرة القدم وضيفنا ك عصام عبد المنعم رئيس تحرير الأهرام الرياضى والمحلل الرياضى المعروف .. أهلا بك يا كابتن .
ك/عصام عبد المنعم:أهلا بك يا دكتور .
د/عبد المنعم سعيد:كابتن كأس العالم فى جنوب أفريقيا يعنى إنت متابع كل ال مش هقول على الأقل السن يعنى ههههه لكن متابع على الأقل ال 3- 4 كؤس العالم الأخيرة – كاس العالم فى جنوب أفريقيا إيه ؟ إيه الجديد فيه ؟ إيه اللى بيميزه هيذكر فى التاريخ بإيه ؟
ك/عصام عبد المنعم:هيُذكرفى التاريخ بإنه المرة الأولى فى أفريقيا – المرة الأولى اللى أفريقيا بتستضيف كأس العالم وهيُذكر إنه أعلى مردود من الميديا وصل للفيفا حوالى 3 مليار دولار .
د/عبد المنعم سعيد:3 مليار دولار للفيفا ؟
ك/عصام عبد المنعم:دا الرايتس بتاعة الميديا كلها بكل أنواعها دخل الفيفا .
د/عبد المنعم سعيد:دا ما حصلش فى كاس العالم اللى فات فى ألمانيا ؟
ك/عصام عبد المنعم:كان حوالى 2 وشويه كان حوالى 2 بون تو أو حاجة زى كده وتخطى الأوليمبى الجيمز حتى الألعاب الأولمبية فى العائد المادى وهيُذكربإنه المونديال اللى خرج فيه من الدور الأول بطل ووثيق فى الدوره السابقة.
د/عبد المنعم سعيد:طيب لوأخذنا واحده واحده دلالة إنه راح أفريقيا إيه يعنى معناها إنه لأول مرة كاس العالم يبقى فيه كل الانسانيه يعنى كان كاس العالم زمان معروف تقريبا إنه أمريكا الجنوبية وأوربا حتى أمريكا الشمالية ما كنتش فيه قوى يعنى هم دول اللى بيقسموا وأظن كان بيبقى ليهم نصيب أكبر من عدد الدول ؟
ك/عصام عبد المنعم:المقاعد آه .
د/عبد المنعم سعيد:المقاعد وصوله لآسيا وأفريقيا معنى كده نقدر نقول إن كاس العالم بقى كاس العالم فعلا ؟
ك/عصام عبد المنعم:هوما كنش ممكن يوصل لأفريقيا لو فضل بالنظام القديم بتاعه اللى هو التقدم المفتوح حضرتك بتتقدم بالملف بتاعك سواء كنت أفريقى أسيوى عربى أمريكى وبيشوف اللى بيوفى أكثربالمتطلبات لكن دائما هتبقى الانتصار للدول الغنية سواء أوربا أو أمريكا أو حتى فى شرق آسيا عمر ما أفريقيا كانت هتاخد إلا لما الفيفا عملت نظام التداول بمعنى إنه كارهه تنظمه فى كل .
د/عبد المنعم سعيد:هم أخذوا نظام الأمم المتحدة فى الحقيقة .
ك/عصام عبد المنعم:آه عملوا نظام التداول فأصبح المنافسة بين الدول الأفريقية يعنى المنافسه على منديال 2010 كان فقط بين الدول الأفريقية مش على مستوى العالم وأنا كنت قريب قوى من مسألة الإختيار ديه وإحنا ظلمنا نفسنا وقسينا على نفسنا بحكاية صفرالمونديال .
د/عبد المنعم سعيد:خلينا الأول على.. هنتكلم عن مصرلانه عندما يُذكرالتاريخ المصرى بالنسبة لكاس العالم مثل هذه الواقعة ستحدث إنما الأول عشان ما نبخس جنوب أفريقيا حقها هل نجحت جنوب أفريقيا فى تنظيم هذا الكأس من الناحية الأمنية يعنى مقارنةً بجميع العواصم والحواضر اللى هى إستضافت المونديال قبل كده ؟
ك/عصام عبد المنعم:أعتقد إنها نجحت ونجاح إحنا سعداء به لانه الهاجس الأمنى تضاءل عما كان مقدرا له بشكل يعنى هم حتى كانوا بيخوفوا الناس الضيوف أكثربيدوهم تعليمات وكتيبات ما تمشيش هنا ما تعملش هنا إقفل زجاج العربية اللحاجات ديه كلها اكثرمن اللازم لان هم متحسبين عندهم معدل الجريمة مرتفع شوية لكن لا يجب إن إحنا ننسى إن جنوب أفريقيا دولة إقتصادية متقدمة جدا إقتصاديا ودولة منظمة من ناحية ترافيك ومن ناحية المرورومن ناحية سهولة المواصلات والإتصالات بينها دولة يمكن من أفضل20 إقتصاد فى العالم عندها صناعة متقدمة جدا .
د/عبد المنعم سعيد:عندها الإدارة والآلية الكافية إنها تدير حدث كبير بهذا المعنى ؟
ك/عصام عبد المنعم:عندها ما يكفى للقيام بدورها لانه الفيفا بيعمل للدورالأكبر فى إدارة المونديال .
د/عبد المنعم سعيد:زى إيه إشرحها كده للمشاهدين ؟
ك/عصام عبد المنعم:يعنى إدارة المباريات – إدارة كل ما هو متعلق بالمونديال بتقول به الفيفا بشكل أساسى .
د/عبد المنعم سعيد:يعنى جنوب أفريقيا مالهاش دعوة حكم غلط ما غلطش ؟
ك/عصام عبد المنعم:خالص ولا تعيين الحُكَّام ولاالمراقبين لا فصيلة بتاعة التدريب ولا كل حاجة لكن الدولة المضيفة بتبقى هوست بس يعنى هى مسألة الضيافة والتأمين للملاعب وأشياء من هذا القَبيل فهم قاموا بهذا العمل الحقيقة بشكل يعتقد إنه مُشرِّف لأفريقيا .
د/عبد المنعم سعيد:كابتن عصام قلت إحنا ظُلِمنا فى هذا الموضوع ظلما إزَّاى ؟
ك/عصام عبد المنعم:طُلمنا لان كان المفروض هذا المونديال أعطى لأفريقيا وهم الحقيقة إستفادوا من وجود الأيكون منديلا – منديلا ده هو الأيكونة بتاعة أفريقيا وهو موجود فى قلب الكمبين أو الحملة بتاعة المونديال وهم ظُلِموا فى البطولة اللى قبليها ولما أخذتها ألمانيا كان فيه برضه فضيحة برضه تلاعب فى الأصوات وكانت منشورة فكان فيه محاولة لتعويضهم إن المونديال اللى جاى هيبقى لأفريقيا ..
د/عبد المنعم سعيد:كان فيه شعوربالذنب لدى الفيفا ؟
ك/عصام عبد المنعم:بالظبط عند الناس حتى من غيرالفيفا الناس اللى هم معاهم الأصوات الى جانب إنه كان فيه دورلمانديلا لا يمكن إن إحنا نكره وإشترك فى الكامبندا الحاجة الثالثة إن أفريقيا بالنسبة للناس مش إحنا يعنى إحنا حتى ما بنديش الإحساس إن إحنا أفارقة للعالم إحنا شرق اوسطيين وعرب بالدرجة الأولى ومسلمين و.
د/عبد المنعم سعيد:لما جم ساعة الإختيارقالوا عايزين حد شبه أفريقيا البتاع دا رايح أفريقيا معناها أفريقيا غير مستحقة .
ك/عصام عبد المنعم:لأول مرة أفريقيا تأخذها يبقى مش يبقى مش ممكن تكون مصرولا تونس ولا المغرب .
د/عبد المنعم سعيد:آه شبههم حاجة تانية .
ك/عصام عبد المنعم:يعنى تبكال أفريقا .
د/عبد المنعم سعيد:هل معنى كده إن إحنا كان القرار إن إحنا ندخل فى هذه المبادرة أو المغامرة ما كنش سلبى ؟
ك/عصام عبد المنعم:هنقول إحنا ظُلِمنا جزء من الظلم إن إحنا ظلمان نفسنا إن إحنا ما إستعديناش كويس ما كناش عارفين إيه المطلوب .. يعنى ما كناش عارفين كيف تُدارهذه الحمله بشكل يعنى إحترافى عملناها بشكل فيه كثير من الهواية والنيات الطيبة والإعتماد على إن إحنا نجيب الناس ونزورهم الهرم وأبو الهول والحاجات ديه فمكناش .
د/عبد المنعم سعيد:كان فيه تقديرموقف سياسى على الأقل بالنسبة للظروف اللى إنت قلتها بالنسبه لجنوب أفريقيا ؟
ك/عصام عبد المنعم:ما كنش مشروع دولة كان مشروع آخره وزير الشباب الدكتورعلى الدير هلال هو الأمبريلا بتاعة المسألة وزارة الشباب دا آخره إنما ما إشتركتش فى جهات الدولة كلها .
د/عبد المنعم سعيد:لكن النيات فيه كانت طيبة على الأقل ؟
ك/عصام عبد المنعم:كان فيه نيات طيبة وكان فيه محاولات جاده لكن اللى قُريِّب كان يعرف وإحنا رايحين أنا رحت فى .
د/عبد المنعم سعيد:إن قلت كلمه مهمه ما كنش مشروع دولة هل من الممكن يبقى مشروع دولة بغض النظر إحنا رايحين جنوب أفريقيا ولا لأ يعنى لو إحنا أن الفيفا بيقول عشان دولة تستضيف كاس العالم يبقى فيها مواصفات من واحد الى 20 هل إحنا ممكن ناخد الواحد والعشرين دول ونعملهم ويوم ما ترسى علينا الإستضافة نبقى ناخدها ؟.دا سؤال مرتبط بترتيب المجتمع ككل .
ك/عصام عبد المنعم:آه طبعا أنا متصورإن حاجة زى كده ممكن تساعدنا فى إن إحنا يعنى نعمل تطويرفى جوانب كثيرة جدا يعنى ما كناش هنعملها لو مش هنستضيف كاس العالم زى بالظبط إحنا لما نيجى عندنا ضيوف مهمين فبنموضب الصالون وننضف كذا ولو فيه حاجة بنشترى عشان نكمل فإحنا سألنا نفسنا حتى ساعتها لو فيه واحد عايزيخش تواليت فى أى حتة فى الشارع فى مصر .
د/عبد المنعم سعيد:هيعمل إيه ؟
ك/عصام عبد المنعم:هيعمل إيه لابفلوس ولا من غيرفلوس موجود يعنى بره فيه بفلوس وفيه من غيرفلوس يعنى فيه جاجات كتيرة قوى إحنا .
د/عبد المنعم سعيد:إن كان إيه رأيك كان أكثرجوانب الكسوركانت هى ديه ويعنى ديه ذُكرت كثيرات مع إن المستدات بتاعتنا مش جاهزة الإستادات بتجهز .
ك/عصام عبد المنعم:بتتبنى .. لأ إحنا اللى ما كناش جاهزين له إحنا ما كناش عارفين إزَّاى نأخذ الأصوات إنما علشان إن إحنا فى خلال الفترة من ساعة التصويت لغاية دلوقت كنا ممكن نعمل كل حاجة يعنى من ناحية المنشآت ومن ناحية الإستعدادات وكل الكلام ده نقدر وعندنا الكوادراللى تقدرتعمل الكلام ده والفيناينس دا هييحى لوحده لانه أساسا الإستثمارات ليها مردود والفيفا بيساعد فيها .
د/عبد المنعم سعيد:إحنا عموما أكيد كان درس كبيرنتعلم منه لكن عايزأنقل للنقطة الثانية إنت قلت إن دا أكترليه راح فى حنوب أفريقيا ال 3 مليار يعنى إيه اللى جد على الساحة العالمية ما كنش موجود فى 2006 إنت قلت حتى أكثرمن الأولمبيات بيعتبروا أولمبيات الصين دا هو يعنى كان قمة التاريخ الرياضى فى العالم وإنت بتتكلم من 2،2ل 3 مليار يعنى 800 مليون يعنى بتتكلم على 40% زيادة تقريبا ؟
ك/عصام عبد المنعم:الفيفا هى اللى كسبت طبعا المبلغ ده لانها بتبيع لشركات عملاقة وفى كل شوية يعنى إحنا بنسمع حتى أجورالناس هنا فى مصراللى بيعمل مسلسل بمليون السنة ديه بيعملوا السنة اللى بعدها ب2 .
د/عبد المنعم سعيد:يعنى إنت شايف التضخم هواللى عمل الإرتفاع داولا وإن الإهتمام زاد ؟
ك/عصام عبد المنعم:لأ يعنى الإعلان ساعد الفيفا فى إنها والإستنصل شيت والشركات الراعية ديه بتساعد على إنه أنا عارف إن إنت بتكسب كبيديا كمحطات أوكشركات .
د/عبد المنعم سعيد:يعنى آخد منك أكثر؟
ك/عصام عبد المنعم:فأنا بأخذ منك أكثر .
د/عبد المنعم سعيد:بالمناسبة أجرالمحلل الرياضى زاد ولا قل فى الدورة ديه ؟
ك/عصام عبد المنعم:كله بيزيد .. كله بيزيد هههههههههههه.
د/عبد المنعم سعيد:هههههههه فالفيفا صعَّد .
ك/عصام عبد المنعم:آه صعدت المسائل وهى أصلها بتبقى يعنى محسوبه بينهم والشركات الراعية شركات يعنى اللى هى شركات عالميه كلها يعنى .
د/عبد المنعم سعيد:هل التكنولوجيا إختلفت فى المرة ديه ؟
ك/عصام عبد المنعم:التكنولوجيا بتاعة النقل ؟
د/عبد المنعم سعيد:بتاعة النقل والكلام ده يعنى بنلاحظ دلوقت حاجة موجودة زى ما يكون فيه طياره بتصور الملعب من تحت يعنى بقة شبه كده اللى هى بتيجى على بيسموها إيه البليستيشن والحاجات ديه .
ك/عصام عبد المنعم: فيه دلوقت الكاميرا اللى هى بتجرى فوق الملعب يعنى هى فى وير أسلاك وهى بتجرى بتتحرك فوق الملعب زى اللى بيسموها الكرين فى التصويرالتليفزيون الإستديوهات وفيه طيارات – فيه طيارات بتبقى على طول موجودة علشان تجيب الإستاد من مسافة بعيدة وبعدين تقرب – التكنولوجى بتاع البث التليفزيونى تطور جدا طبعا وعدد الكاميرات ونوعية بقى الفريدا مينشنز والإتش بى والحاجات يعنى بقى دلوقت الصورة نفسها الكوالتى بتاعتها إتحسنت جدا وتطورت بقة بياعه أكثروبتخلى الإعلان يبان أكثر .
د/عبد المنعم سعيد:كابتن عصام هناخد بريك يعنى فاصل قصيروبعدين نعود وعايزين نكمل النقطة بتاعة التكنولوجيا ديه هل التكنولوجيا دية موجودة فقط بالنسبة لموضوع الإعلام ميديا ولا دخل فى اللعبة نفسها ؟ .. نلتقى بعد فاصل قصير .
فاصل
د/عبد المنعم سعيد:كأس العالم فى كرة القدم وضيفنا كابتن عصام عبد المنعم .. أهلا بك يا كابتن عصام مرة ثانية .. عايزين نستكمل النقطة الأولانية يعنى بمعنى إنه الحديث دلوقت عن تطورات تكنولوجيا جرت فى الجانب الإعلامى لكن جرت أيضا فى اللعبه نفسها يعنى متعودين على كرة القدم طول عمرةا 11 قدام 11 وجون هنا وجون هنا وأبعاد قد كده وكان أحسن حاجة نعرفها كانوا زمان يعملوا الحدود بالجير كده مش كده دلوقت بقة حاجة ثابته والحشيش شكله جميل لكن فيه كلام دلوقت عن حاجات زى سينسون جثات إن الكورة ذكية إن الحكم حاطط على ودنه سماعة الزيطة ديه كلها على إيه يعنى إيه اللى بتخدمه بالظبط ؟
ك/عصام عبد المنعم:هى طبعا نوع من أنواع التطويرفى المقاربات المختلفة الخاصة باللعبة سواء كانت من ناحية التحكيم أومن ناحية متعة المشاهدة نفسها يعنى دائما السعى أوالهدف وراء كل التعديلات ديه تبقى نيترتيننج أكثرللناس يعنى تبقى اللعبة مسلية جدا وإنه يحصل أهداف كتيرونحاول نسرع الإيقاع ونخلى متعة كرة القدم فى الأهداف فإزاى نخلى الكورة ديه نعمل تكنولوجى فى الكورة بحيث ان الكورة تبقى أسرع وتحرزأهداف أكثرالكورة جابولانى اللى هى موجودة دلوقت ديه ولوإن فيه شكوك على إنها هتستمر لانها كانوا مبالغين قوى فى إن هم يدوا لها صفة الخفة والباونت العالى والكلام ده كله علشان تجيب إجوان كتير تعبه اللعيبه وتعبه حراس المرمى ويمكن إعادة النظر فيها لكن التكنولوجى دخل فى مجال اللعبه لدرجة إنه الصين قالت أنا عايزه أستضيف كاس عالم ولما أستضيف كاس عالم هأعمله فى 300 ملعب ف 300 ملعب إزَّاى دا هم أساسا 32 فرقه على 4 فى 8 سايت وخلاص – فإنت عايز 300 ملعب – قال لك هم دول الملاعب هأعمل ال 8 ملاعب الأساسيين دول 12 ملعب الباقى الناس هتروح تتفرج على نفس المباراة بتتلعب بفيرتى واللعيبه جوه الملعب .
د/عبد المنعم سعيد:هتعمل هولى جران هو دا التكنولوجى بتاع الهولى جران .
ك/عصام عبد المنعم:آه ولعيبه بتوع نفس اللى بيلعبوا فى الملعب الثانى فى عشروميت ملعب تانى بيلعبوا نفس الجيم .
د/عبد المنعم سعيد:طيب هل بالمناسبة ديه إحنا يمكن ما نحتجش الصين ولا غيره ممكن نعمل كاس العالم كل 4 سنوات فى العالم كله .
ك/عصام عبد المنعم:أعتقد إن بقى هتبقى بديل التليفزيون يعنى هيبقى بديل إنك تتفرج فى التليفزيون ممكن لو إنت عايز تروح ملعب وتهيص وتتبسط وتعمل .
د/عبد المنعم سعيد:هو هيبقى فيه منافسة بين التليفزيون اللى هو ثرى ديز دا أو غيره مالتى ذا مينشنال دا اللى هو بيحسسك بالتكعيبة بتاعة الملعب أوإنك تبقى فى الملعب لان ديه الميزة الحقيقية للملعب إنك إنت حاسس بالحجم .
ك/عصام عبد المنعم:بالظبط حاسس بالحجم وحاسس بالأشخاص جوة بتشجع وبتعمل فيعنى قد كده يعنى هم اليابانيين قالوا إحنا هنكسب كاس العالم فى 2050 يعنى إبتدوا الإحتراف بتاعهم من أواخرالثمانينات أوائل التسعينات دلوقت أصبحوا عندهم إحتراف متكامل عظيم جدا واليابان وصلت للدور ال16 .
د/عبد المنعم سعيد:كابتن عصام نرجع للقوى النقطة الثالثة اللى إنت أثارتها اللى هو القوى الكبرى اللى طلعت فى الدورالأول دا تعبيربيستخدم فى السياسة الدولية قوى عظمى قوى كبرى الى آخره .
ك/عصام عبد المنعم:آه بيقولوا الأسماك الكبيرة والأسماك الصغيرة .
د/عبد المنعم سعيد:يعنى دلوقت على أساس إيه التصنيف يعنى اللى بيتم ؟
ك/عصام عبد المنعم:التصنيف بيبقى دائما على آخركاس عالم آخركاس عالم إتلعبت فى ألمانيا كان البطل إيطاليا وكان الوصيف فرنسا الإثنين لعبوا الماتش الفاينال وإنتهى بفوزإيطاليا فى المباراة الشهيرة اللى إتطرد فيها زيدان لما نطح المدافع الإثنين خرجوا من الدورالأول وديه ما حصلتش قبل كده قوتين كبريين جدا المدرسة الإيطالية والديك الفرنسى والمسألة سببت مشاكل أوعواصف سياسية يعنى ساركوزيه قابل - يعنى بعت جاب طيارة خاصة هنرى اللى هو كابتن الفرقه قبل ما الفرقة ترجع عشان يقابله .
د/عبد المنعم سعيد:عشان يفهم إيه الموضوع ؟
ك/عصام عبد المنعم:عشان يفهم إيه الحكاية وبعدين مطالبة لرئيس الإتحاد إنه يستقبل وقدم إستقالته بس هتبقى فالد من يوم الجمعة اللى جاى هيستقيل إنما فى صدمة للجماهير الفرنسية لان المسألة .
د / عبد المنعم سعيد : بقى فيها جزء من الكرامة الوطنية .
ك/عصام عبد المنعم:يعنى بقى فيها جزء من الإحساس بالإهانة .
د/عبد المنعم سعيد:هل يا كابتن عصام يجب على كل رئيس إتحاد يعنى يلزم طريقه فى كاس العالم اوفى الطريق الى كاس العالم إنه يستقيل ؟
ك/عصام عبد المنعم : لأ هواللى حصل بالنسبة لفرنسا مش لمجرد الفرنساويين برضه ناس عاقلين هومش لمجرد إن هم خسروا حتى وطلعو فى الدورالأول إنما دا حاصل إنه لاعب أو كابتن الفرقة شتم المدرب ولاعب تانى شتم مساعد المدرب واللعيبة جم فى اليوم التالى إمتنعوا عن التدريب أو ضربه .
د/عبد المنعم سعيد:حصل إنفلات يعنى ؟
ك/عصام عبد المنعم:حصل نوع من التصرفات اللى هى مجافية للروح الرياضيه للأخلاق وللانضباط والإلتزام والإحترافية والمهنية فى آداء هذا العمل ودا لا يليق إنه يحصل من منتخب بهذا الحجم.. هو دا فى تقديرى السبب الأدعى يعنى إنما هى المردود السياسى عموما وصل لأمريكا إنه الرئيس أوباما نفسه .
د/عبد المنعم سعيد:ترك إجتماع عشان يشوف ال .
ك/عصام عبد المنعم:أجِّل الراجل التركى ساعة قعَّده على جنب لغاية لما يخلص وأمريكا مش دولة كورويا لكن الغزوالكروى دخل فى العالم كله .
د/عبد المنعم سعيد:كابتن عصام لاحظت إنك إستخدمت كلمة الديك الفرنسى ديه جاية منين ؟
ك/عصام عبد المنعم:اللى هوالشعار بتاع الإتحاد – يعنى مثلا البادج أو اللوجوا بتاع الإتحاد عليه ديك زى الانجليز عندهم 3 أسود فى اللوجو بتاعهم وهكذا يعنى .
د/عبد المنعم سعيد:التعبيرات ديه زى ال 3 أسود الانجليز والديك الفرنسى والأجهزة اليابانية والماكينات الألمانية هل ديه تعبيرات صحفية ولا كلها إشاره الى لوجو صامبا الحاجات اللى زى كده .
ك/عصام عبد المنعم:مختلفه بعضها تعبيرات صحفية التانجو والصامبا وبعضها راجع الى الشعاراللى بيتخذه وبعضها زى الفراعنة مثلا ناحية تاريخية وثقافية الدول الأفريقية بقى ليها الثقافه بتاعتها الثقافه الأفريقية هى الغابه والحيوانات تلاقى الأفيال بتلاقى النسور وبتلاقى الأسود .
د/عبد المنعم سعيد:الأسود الكاميرون أظن ؟
ك/عصام عبد المنعم:الكاميرون الأسود التى لا تُقهر آه وأسود الصحراء اللى هم المغاربة – أسود الأطلسى قصدى فالحاجات مختلفة فيه بعض الحاجات بيطلقها الصحفيين وبعضها بتبقى لهذه الأسباب .
د/عبد المنعم سعيد:كابتن عصام هل ترى إن إحنا كان يجب إن إحنا نكون هناك يعنى فيه بعض المعلقين قالوا إنه بطل أفريقيا مش موجود وإن ده أثَّر ولا ما فيش حاجة إسمها فى الرياضه يجب اللى حصل حصل ؟
ك/عصام عبد المنعم:والله إحنا هارد لك الحظ سيئ كثير جدا من المعلقين الأجانب ومن الخبراء الأجانب والمدربين يعنى مستغربين جدا إن مصرمش موجودة شافوا مصرمن خلال نهايات كاس الأمم الأفريقية 3 متتاليه هى البطل .. مصر تصنيفها ال 11 على العالم فى ترتيب الفيفا وفيه فرق تأهلت ترتيبها ال 80 – الجزائراللى حلت محل مصرترتيبها ال 30 عالميا فمنطقيا مصركان لازم تتأهل وفيه ناس زعلانين وديه حقيقة إحنا مش بنبالغ فيها يمكن أنا قرأت إمبارح زميل صحفى سعودى ناصرصالح الحمادى كتب فى الحياة مقال بعنوان غياب المصريين – قال فيه إنه يعنى يزعل اللى يزعل ويغضب من يغضب ويرضى من يرضى المصريين لو راحوا هم أفضل من نصف الفرق على الأقل اللى موجودة هناك وكانوا هيمثلوا العرب أفضل من ما كل العرب اللى مثلوها فى النسخه السابقى يعنى لانه الفريق المصرى الحالى فريق لا يقل عن الفرق الكبيرة اللى زى هولندا وزى ألمانيا وزى البرازيل كتب الكلام ده بحياديه وبمهنية مطلقه .
د/عبد المنعم سعيد:أنا مش عايز أحبط وجهة النظر ديه يعنى طبعا بالفخر الوطنى والقومى الواحد يميل ليها لكن فيه ملاحظة أيضا تتقال إنه إن إحنا بنصب خضا يعنى أو ما نلاقى العالم ودا بيظهر فى كتير مثلا وسط ما إحنا أبطال أفريقيا والكلام دا إتغلبنا من فرنسا مش عارف 5-6 إنه بنيجى نرجع من بطوله معينه نتغلب أظن كان أيام الجوهرى إتغلبنا مش عارف من اليونان – عندنا خضه لغاية ما نأخذ عليها يعنى زى مثلا النادى الأهلى لما راح كاس العالم للانديه أول مرة طلع من الأول كده على طول تانى مرة أظن أو ثالث مرة لما أخذ أظن كان الثالث أو حقق مكانه جيده جدا – فعندنا نوع من الخضه كاف فيه إحتمال هنروح ونتخض بقى نلاقى فرنسا والبرازيل ؟
ك/عصام عبد المنعم:لأ هو الناس بتقول كده ليه وإحنا بنقول كده ليه لان إحنا عندنا تصادف فى هذا الوقت فريق مش دايما بيبقى عندك نفس الكوالتى بتاعة اللعيبه صادف فى هذا التوقيت إن إحنا عندنا هذه المجموعة اللى هى قادرة على إنها فى بطولة العالم للقارات كسبت إيطاليا وعملت 3-2 مع البرازيل .
د/عبد المنعم سعيد:4-3
ك/عصام عبد المنعم:4-3 قصدى فرق جول فى مباراة هايله جدا فإحنا تصادف إن إحنا موجوهذا الجيل من اللعيبه اللى كان يجب إنه يأخذ دوره لكن هارد لك إن إحنا ما وصلناش ما إحنا إذا كنا بنتكلم على تصنيف روسيا ما إتهليتش وروسيا العاشر وروسيا قبلينا فى ترتيب الفيفا بمركز وفيه فرق أقل منها كثيرسلوفاكيا إتأهِّلت وسلوفينيا وحاجات كده .
د/عبد المنعم سعيد:هنرجع لموضوع سلوفينيا وكاس العالم مرة أخرى بعد ما هسألك سؤال يعنى فقد نهى ليبر هيظل السؤال دا كبيرلانه أعتقد بالنسبة للجيل دا من اللاعبين وربما جيلنا ديه كانت أقرب مرة نبقى إحنا قريبين من النهائيات ونتكلم فيها بعد الفاصل نلتقى بعد فاصل قصير .
فاصل " تقرير "
كثيرا ما إستغل قادة الدول مناسبة كأس العالم لكرة القدم لأهداف سياسية تتعلق بتثبيت حكمهم أو الترويج له إذ إستغل موسيلينى كاس العالم عام 1934 لإثبات جدارته بحكم إيطاليا ولأهمية كأس العالم له أرسل لفريقه فى دورة عام 1938 وقبل المباراة النهائية لإيطاليا مع المجر تحذيرا لللاعبين قائلا لهم إما الفوز أو الموت .
كما كان كأس العالم عام 1970 مؤثرا للغاية فى تثبيت الحكم العسكرى الذى إستولى على السلطة فى البرازيل عام1964 ونفس الأمرتكرر مع منديال 1978 الذى أضفى الشرعية على الحكم العسكرى فى الأرجنتين . كما إعتبر النظام الإيرانى فوز فريقه على المنتخب الأمريكى فى منديال عام 1998 رسالةً مبادها أن إيران ستظل صامدةً ولديها القدرة على هزيمة الولايات المتحدة ، أما الفوز ببطولة كأس العالم فقد إستخدمته بعض الدول مسكنا لشعوبها من هزائم سياسية أو عسكرية سابقة مثلما فعل حكام الأرجنتين الذين صوروا فوزهم على إنجلترا فى منديال 1986 بإعتباره تعويضا عن الهزيمة العسكرية لبلادهم على يد إنجلترا فى حرب الفوكلاند إضافةً الى ذلك فقد تسببت مباراة فى تصفية كأس العالم بأنجلترا عام 1966 فى تأجج صراع كبير بين دولتى هيندورس وسلفادور كما شهد منديال ألمانيا 2006 إتخاذ الحكومة الألمانيه موقفا حاسما ضد العنصرية وكراهية الأجانب على خلفية تزايد التهديدات للمشجعين السود ثم تعرض مواطن ألمانى من أصل أثيوبى للضرب المبرح أدخله فى غيبوبه وأعلن وزير الداخليه الألمانى أن ألمانيا ستستخدم كل الوسائل القانونية الممكنة لمنع إستغلال كأس العالم لأغراض سياسية كما شاهد هذا المونديال فى ألمانيا واقعةً سياسية غريبة لاتنسى عندما رفع لاعبان من منتخب غانا علم إسرائيل التى لم تكن مشاركة فى كأس العالم بل كانت تشن حربا على لبنان آن ذاك .
فاصل
د/عبد المنعم سعيد:كأس العالم فى كرة القدم وضيفنا كابتن عصام عبد المنعم .. كابتن عصام كنا بنتكلم إيه القضية الأساسية اللى خلتنا ما نذهبش الى جنوب أفريقيا ؟
ك/عصام عبد المنعم:الإستهانة بالمباراة الأولى مع زامبيا فى القاهرة ديه اللى خسرنا فيها نقطتين وما كنش يجب إن إحنا نخسرهم ومش محسوبين إن إنت تخسرعلى ملعبك من فريق أساسا لن يترشح .
د/عبد المنعم سعيد:دا كان إستهتارولا كان يعنى عدم تركيز ؟
ك/عصام عبد المنعم:لأ كان عدم إحترام للمنافس وبالتالى كان حصل برضه بعض الإسترخاء فى التفكير وفى التنفيذ وفى إختياراللاعبين حتى بالنسبة للجهازالفنى وبالنسبة للاعبين ما كنوش مديين الجدية الكافية والإحترام الكافى للمنافس وكإن الفوزمضمون فراح نقطتين هم دول اللى تعبونا جدا فى الآخر وإحنا بنصفى بقى مع المنافس .
د/عبد المنعم سعيد:إنت بتقول دائما تكتب ويمكن قلت فى الإستراحة إن دا كان الجيل المرشح إنه يعمل الحكاية ديه وإنه الجيل دا ما بيتكررش هل الجيل دا نتائج سيستم نتيجة منظومة عندنا وبالتالى بنطلع غيرها يعنى وإنه اللى جابوا أبوتريكا يجيب جدوأو يجيب غيره من اللاعبين وبالتالى تقدر نقول نستعد من الان لجولة أخرى يعنى ؟
ك/عصام عبد المنعم:لأ هو برضه مش عايزين نظلم نفلسنا فى العالم كله بييجى جيل بيبقى فيه نجوم ومواهب يعنى فرنسا إفتقدت بقى زين الدين زيدان ما فيش القاطرة اللى هى تجر ما فيش اللاعب اللى هو الملهم للفريق يعنى الأرجنتين دلوقت مرشحة لان عندها مسيى وفيه أكثر من واحد بس هو ده اللاعب المُلهم فى كاكا فى البرازيل يعنى فى كل فرقه من الفرق المرشحة .
د/عبد المنعم سعيد: فيها حد ؟
ك/عصام عبد المنعم:آه فى كلوزا فى ألمانيا يعنى فيه حد .
د/عبد المنعم سعيد: شايل روح الفريق معها ؟
ك/عصام عبد المنعم:آه وبالتالى .
د/عبد المنعم سعيد:معنى كده إن فيه عنصر بشرى فى الموضوع الموهبة اللى هى مازالت مهمه يعنى تقول طرق التدريب إتغيرت اللياقه البدنيه إتغيرت التكنولوجيا إتغيرت لكن عنصر الموهبة البشرية مسألة يعنى ديه من عطاء الله .
ك/عصام عبد المنعم:آه لانه حضرتك فى الجانب ده بتعتبر الكورة فن من الفنون يعنى أحد الفنون .
د/عبد المنعم سعيد: ما فيش تدريب فى الدنيا يخلى واحد موسيقى كويس آه ؟
ك/عصام عبد المنعم:هيبقى .. هيبقى
د/عبد المنعم سعيد: هيبقى ميكانيكى يعنى ههههه.
ك/عصام عبد المنعم:آه هيبقى واحد بيدق فى المزيكا يعنى لكن هو إنه يألف مقطوعة موسيقية تعيش حاجة زى كده .
د/عبد المنعم سعيد: تعيش طبعا يكتب مقطوعة .
ك/عصام عبد المنعم:آه يعنى ما فيش فالكورة بالشكل ده برضه بيبقى فيه وقت بيبقى فيه مجموعة مواهب بتتجمَّع وبتعمل تيم كويس .
د/عبد المنعم سعيد: كابتن بيقولوا خروج فرنسا الدول الكبرى راجع أساسا إنه بقى عندنا نظام دولى الان نقدر نقول نظام دولى للكرة مرة جدا يعنى كل لعيب بيلعب فى نادى وخاصةً بقة الأثمان عالية جدا والنادى ده عليه يخش بطولة دورى ويخض بطولة كاس وبعدين يخش كاس قارية وبعدين يخش كأس القارات وعنده كأس العالم يعنى من الناحية البدنية البحتة إبتدت تبقى المسألة شبه مستحيلة بالنسبة للَّعِّيب الى أى حد المنظومة الان بقت مقله .
ك/عصام عبد المنعم:دية أثرت على العالم له يعنى أوربا .
د/عبد المنعم سعيد: فيه بيقولو كاس العالم هنا المرة ديه فى جنوب أفريقيا أقل من المرات اللى فاتت ؟
ك/عصام عبد المنعم:لغاية دلوقت – لغاية دلوقت من ناحية متعة الأهداف ودية البرنامج المزدحم وعدد المباريات مضروبا فى عدد الكيلومترات اللى بيجرى بيها اللاعب دلوقت – كان زمان اللاعب لما يجرى 5 كيلو فى الماتش يبقى عمل إنجاز دلوقت اللى بيجرى 13 بيبقى مقصر على مدى المباراة .. هذا الإرهاق خلانا دلوقت وإحنا فى كاس العالم فى النهائيات الفرق اللى متوسط أعمارها صغير هى اللى مكمله وماشيه كويس حتى بالنسبة للأفارقه كلهم كان فيه نيجيريا وكان كوندفوار وغانا والجزائر وجنوب أفريقيا الفرقة اللى فاضلة لغاية دلوقت غانا لان هم دا منتخب الشباب اللى كان عندنا وهم متوسط أعمال صغيرة – الفرق اللى كلها مرشحة البرازيل – البرازيل مدرب دنجا ما جبش رمالدينيو ما جبش رونالدو ما جبش اللعيبة الكبار جاب برضه متوسط أعمارصغير كذلك فى الأرجنتين .
د/عبد المنعم سعيد:يعنى هل ديه كانت مقصودة فى الأرجنتين وكده إن هم يختاروا متوسط سن صغير عشان عارفين .
ك/عصام عبد المنعم:لأ هو ديه فلسفة المدرب لكن طبعا من المؤكد إنه هو عارف إنه محتاج لياقه بدنية لتنفيذ الخطة بتاعته وأنا لابد إن أنا هواجه فرق بتعتمد على اللياقه أنا عندى الفن بس وهو عنده اللياقة لو أنا كمان عندى الفن يبقى ديفينت لى أنا هتفوق عليه فده تفسير مش كان مقصود اللى فضل هم الناس اللى عندهم لياقة بدنية أعلى ومتوسط سن أصغر .
د/عبد المنعم سعيد:كابتن عصام هل كان فيه سياسه يعنى غير إختيارجنوب أفريقيا بإعتبارها جزء من أفريقيا ومنديلا وغيره لكن كان فيه بعض إتهامات مثلا لبعض الفرق بالعنصرية إنه جزء من هزيمة فرنسا إن اللعيبة بينهم وبين بعض كان فيها نوع من العنصرية ؟
ك/عصام عبد المنعم:لأ هو أثير بالنسبة لفرنسا إنه كان بعض اللاعبين اللى لهم نفوذ داخل الفريق ضغطوا على المدرب لكى لا يستدعى للمنتخب لاعبين مميزين من أصول عربيه يعنى فيه لاعبين من أصول عربيه كتير موجودين فى الدورى الفرنسى وواعدين
د/عبد المنعم سعيد: ودول ما خدهمش لان ..........
ك/عصام عبد المنعم:نتيجة ضغوط المجموعة اللى هى المسيطرة وكانت مسيطرة على المدرب دومونيك من أصول أفريقية أصلا يعنى لان المنتخب الفرنسى المنتخب الفرنسى 90% من أصول أفريقية ويمكن ده برضه بعض الناس بتعزز عدم الانضباط الى كده يعنى على إنه الفرق الفرنسية اللى كانت معظمها من أصول مش أفريقية ما كنتش ممكن أبدا يحصل منها اللى حصل فى المونديال الأخير ودا تفسير عنصرى برضه
د/عبد المنعم سعيد: تفسير عنصرى هههه - عنصرى ليه ؟
ك/عصام عبد المنعم:عشان هم سود يعنى .
د/عبد المنعم سعيد:آه .. آه - لو إحنا أخذنا السياسة تانى إنه فيه علاقة ما بين حجم البلد وفرقها يعنى مثلاعندنا البرازيل بلد كبيرة سكانيا ومساحةً والأرجنتين بلد كبيرة وألمانيا بلد كبيرة إيه اللى يفسر ..بمعنى كده القدرة عندك الناس اللى هم فى شريحة الشباب كبيرة والشريحة ديه تقدرتطلع منها مواهب متعددة لكن فيه بعض الظواهر لدول صغيره يعنى سلوفينيا ديه 2 مليون إيه اللى وصَّلها إيه للمسافه اللى وصلت لها فى كاس العالم يعنى بالمناسبه فيه الناحيه الإقتصاديه فيه دول متميزه سنغافورا سلوفينيا برضه إنما فى الرياضة ؟
ك/عصام عبد المنعم:الدول فى أوربا اللى إنقسمت يعنى يوغسلافيا إنقسمت 3 والا مش 3 برضه ؟
د/عبد المنعم سعيد:أكثر
ك/عصام عبد المنعم:أكثرفيه صربيا والجبل الإسود .
د/عبد المنعم سعيد: والبوسنة وكرواتيا وسلوفينيا ومكدونيا
ك/عصام عبد المنعم:آه وحتى الإتحاد السوفييتى نفسه لما إنقسم على عشان ما تتشتتش المسائل يعنى لعِّيبة الكورة من تشيكلوزلوفاكيا ويوغوسلافيا كانت بلد متقدمة جدا فى كرة القدم وبلد مصدرة .. أشهربلد عندها مدربين كورة فى العالم كانت يوغسلافيا - الكرويين راحوا فى حته بتوع الجمباز راحوا هنا بتوع الباسكت راحو هنا دول السلوفينيا وريثه تشكسلوفاكيا فى كرة القدم وبالتالى يعنى هى بيقولوا عليها تشيكسلوفاكيا إحنا بنقول شكسلوفاكيا حتى ما بنقولش شكوسلوفاكيا بيننا وبين بعض يعنى
د/عبد المنعم سعيد:دا الإسم اللى إتعودنا عليه
ك/عصام عبد المنعم:آه اللى إتعدونا عليه ولعيبة الكرة كلهم ما راحوش تشيك راحوا سلوفاكيا
د/عبد المنعم سعيد: أيوه لان ربما التشجيع هناك أكثرهههه؟
ك/عصام عبد المنعم:ما أعرفش التقسيمه جاءت كده فكلهم راحوا فى المنطقة ديه فالدول الصغيرة ديه وريثه دول كبرى فى اللعب .
د/عبد المنعم سعيد:كابتن عصام فيه دولتين كبارجدا فى العالم وهم حاليا يعنى من الناحية الإقتصادية وكده طالعين جدا اللى هم الهند والصين – الهند والصين يعنى واحدة فيها مليار ودلوقت 100 مليون اللى هى الهند وواحده فيها مليارو400 مليون الإثنين مع بعض تقريبا يعنى أحسبها من ستة ونصف يعنى الدولتين دول ما لهمش مجال فى كرة القدم خالص يعنى إذا قِيل على إن الصين ما إحتكتش .. يعنى إحتكت بالانجليزفى هونكونج إنما ككتلة كبيرة ما حصلش إنما الهنود اتعلموا الكروكيت وبعض الراكبى أوحاجة إنما ما إتعلموش أبدا كرة القدم هل فيه تفسير للحكاية ديه ؟ ما بنلاقيهمش فى كاس العالم بنلاقيهم طبعا فى كل حاجة فى التكنولوجى وكده .
ك/عصام عبد المنعم:آه طبعا وفى الفلوس .. الهنود ثقافتهم وتكوينهم الجسمانى تكوينهم التشريحى ما إدهمش مهاره فى كرة القدم دا تفسير خاص بى الصين هى إبتدت تاخد بالها من كرة القدم بس الصين كانت مهتمه بالجيمز قوى
د/عبد المنعم سعيد: مهتمين بالجيميناستكس والحاجات ؟
ك/عصام عبد المنعم:والسباحة والغطس وكل اللعبات ديه فبالتالى هم بيناطحوا الأمريكان والروس اللى هم كانوا بيتنافسوا على جدول الميداليات الألعاب الأولمبيه دلوقت الصين بتخش فى وسطيهم وبتبقى الثانى أحيانا فهم يعنى على مستوى الرياضه ككل كرة القدم بالنسبه لهم متأخر فى التخطيط إنما هم حاطينها فى إعتبارهم برضه .
د/عبد المنعم سعيد: هيخشوا زى كوريا وزى اليابان .
ك/عصام عبد المنعم:زى اليابان وكوريا وكلام من ده هيخشوا فى نفس الحكايه وهيبقى فيه برضه برنامج زمنى وهيوصلوا فيه .
د/عبد المنعم سعيد:إنما الهند ما عندهاش ؟
ك/عصام عبد المنعم:الهند لأ بيلعوا الهوكى والكريكيت إنما هى الرياضه مش جزء من ثقافة الشعب الهندى يعنى الرياضه على إطلاقها .
د/عبد المنعم سعيد: كابتن عصام أنا عايز أختم البرنامج بالسؤال على المستقبل الدورة الجاية فى البرازيل هنا بقى فيه أكثر شعوب العالم حبا لكرة القدم طبعا مبكر إن أنا أقول لك إيه إحتمال .. إيه تصورك إيه بعد 4 سنين من دلوقت إيه اللى هيكون فى الماتش ؟
ك/عصام عبد المنعم:بالنسبه لمصر أنا إعتقد إن دا لابد إنه ما أعرفش طبعا إتحاد الكورة دلوقت فى حالة إرتباك شويه إنما لابد إن يكون عندنا مشروع وطنى طالما إن إحنا قد كده بنفرح بكرة القدم وقد كده زعلانين دلوقت إن مصر مش موجودة فى المونديال يبقى لابد إن ييقى فيه عندنا هذا المشروع لانه يعنى يبقى فيه زى إتفاقية بيننا كلنا رجال الأعمال يساهموا الدولة تساهم الاندية .
د/عبد المنعم سعيد:لجنة قومية للوصول الى كأس العالم زى الوصول الى القمر كده .
ك/عصام عبد المنعم:شيئ من هذا القَبِيل .. آه آه الى إن إحنا نوصل لكاس العالم ونبقى كويسين فى كاس العالم أعتقد إن دا حاجة ممكن نتفق عليها إنما إن إحنا نستنى لغاية التصفيات اللى جاية وبعدين نبتدى نتكلم لأ إذا ما إتكلمناش هنيجى فى التصفيات اللى جاية هنبقى برضه فى نفس الموقف .
د/عبد المنعم سعيد:البرازيل لو فازت دلوقت هتفوزالمرة الجاية كمان هههه .
ك/عصام عبد المنعم:البرازيل لما إتعملت كاس العالم عندها ما فازتش على فكره سنه 50
د/عبد المنعم سعيد: قبل كده .
ك/عصام عبد المنعم:آه لكن البرازيل هى المرشحة الدائمة لان هى الفريق الوحيد اللى منذ أخترع كاس العالم هى بتتأهل ولم تتخلف ولا مرة .. ما فيش حد عمل الحكاية ديه البرازيليين – كاس العالم يعنى البرازيل فيه .
د/عبد المنعم سعيد:كابتن عصام متشكرين جدا على وجوده معانا فى البرنامج وإن شاء الله نشوفك فى كاس العالم اللى جاى أو قبل كده
ك/عصام عبد المنعم:إن شاء الله .
د/عبد المنعم سعيد: شكرا حزيلا فى نهاية هذه الحلقة من برنامج وراء الأحداث قمنا بسياحة هائلة بين عالم السياسة وعالم الرياضة وأعتقد إنه كثيرمن الأمورربما التى لا تُناقش عادةً فى الحديث عن مباريات كأس العالم تمت مناقشاتها لكن كان هناك خيط رفيع موجود فى هذه الحلقة هولا يمكن تجنبه وهو علاقة مصرية رغم إن مصرليست موجودة فى كاس العالم لكن واضح أنه هناك قدركبير من الشوق الى أن تكون مصرموجودة فى هذه المناسبة الدولية الهامة التى من الواضع بشكل متزايد إنها فرصة ليست فقط لإظهار مهارة لاعبين وقدراتهم على الفوزوإنما أيضا لإظهار إسم دولة وإظهار ثقافتها وترديد نشيدها الوطنى على مستوى العالم وربما أيضا عرض خلفيات كثيرة عنها لانه بتعين شعوب العالم كله على التعرف على بلد ما مشارك وعلى خلفيته الثقافية والتاريخية والإقتصادية والوجود فى كاس العالم هوأكبر من أن يكون وجودا فى مباريات لكرة القدم هى فرصة عادةً زمنية تاريخية تتكرر كل 4 سنوات - ك عصام عبد المنعم أنهى حديثه بإنه علينا أن نستعد من الان للمرة القادمة فلنستعد من الان للمرة القادمة والى هنا هذه الحلقة ونلتقى فى حلقة قادمة بإذن الله .