وعشنا فى عصر الفاجومى محمود عبد الرازق جمعة

هاقول للعيال اللى طالعين جُدادْ
ماعِشْناش حِدادْ
لَمَّا مات الفاجومى
ويوم مُوتُه كان بس شِعر وطرب وحكاياتْ
وَلاَ دُقنا طعم المماتْ
■ ■ ■
هاقول للعيال اللى طالعين جُدادْ
عن الراحل الناحل...
اللى على إيدين قصايدُه
عرفنا مع ال«لأّ» قِيمْة العنادْ
وأدركنا معنى غباء الحيادْ
■ ■ ■
هاقول للعيال اللى طالعين جُدادْ
عن الراجل البايع الدنيا
من يوم ما شافها
عن الشاعر الواعر
اللى أذلّ الحكومة وْوِقِف فُوق كِتَافْها
عن الجندى من غير سلاح
غير لسانه اللى مدفع قصايد أمل
كُلّ ثاير هتفها
■ ■ ■
هاقول للعيال اللى طالعين جُدادْ
عملنا «حاجات معجزة»
حفرنا طريق الحياة العمومى
وعلّمنا أهل السياسة السياسة
وكسّرنا أنياب كلاب الحراسة
وْخلعنا مبارك ومرسى
وعشنا فى عصر الفاجومى