فيديو| أهالي حاجر المحاميد بالأقصر: «بنشرب ونغسل ونتوضى من الترع»

في الوقت الذي أعلنت فيه شركة المياه والصرف الصحي بالأقصر، أمس السبت، استعداداتها للعيد بتشغيل جميع محطاتها بمراكز المحافظة، بالإضافة إلى عمل إمدادات أخرى لتفادي مشكلة انقطاع المياه في المناطق المرتفعة، لا يزال أهالي بعض القرى يعانون من انقطاع المياه.
أهالي قرية حاجر المحاميد بأرمنت، قالوا إن المياه التي أعلنت الشركة عنها لم تصلهم بعد، وإنهم لا يعرفون كيف يتصرفون لا سيما مع حلول عيد الأضحى المبارك.
يقول أحمد عبد الكريم، أحد أهالي القرية ل«التحرير»، إن المياه تأتي في الساعة الحادية عشر مساء خلال اليوم، وتنقطع بعد ساعة من وصولها، لافتا إلى معاناتهم من نقص المياه في فصل الصيف.
وتضيف زوجته "الميه بتجينا الساعة 11 أو 12، ولما بتيجي يا دوب نقدر نملأ منها كام جركن، والهدوم بتاعتنا بنجيبلها من الترعة علشان نغسلها، وأنا بسيب الحنفية مفتوحة يمكن تيجي فجأة ولكن مش بنلاقيها، والناس اللي عندها مواتير ممكن بتجيلها شوية لكن إحنا لا معانا تمن ما تور ولا قادرين نجيب".
ويقول محمود الحداد "اشتكينا كتير وبرضوا مفيش ميه عندنا علشان مكان عالي، حتى الجوامع مفيهاش وبنحط براميل فيها".
ويوضح النجار جاد بقوله "لما نصلي بنروح نتوضى من الترعة، ومفيش واحد مسئول جاي يسأل فينا، هنعمل إيه لا زرع ولا بهايم لقيينلها ميه وقريب هنعمل آبار ارتوازية.. بنجيب الميه الملوثة من الترعة وبنغليها على النار و بنشرب منها".
فيما تشير إحدى السيدات المسنات إلى عدم قدرتها على الذهاب إلى الترعة ونقل المياه إلى منزلها، على خلاف الشباب والصغار الذين يستطيعون فعل ذلك، مطالبة بتوفير المياه من أجل التخفيف عنها.
وتضيف مجموعة من الأهالي "مش عارفين نستحمى بسبب انقطاع المياه، ومفيش غير الهوا اللي مشغل العداد، ويوم 28 في الشهر بيحاسبونا على الاستهلاك".