يلا نطفي حريقة...

للأسف ده مش عنوان مقال... ومش مقال بمناسبة الحرايق اللى شغالة فى مصر بقالها أسبوع... دا أسلوب حياة... عند كتير أوي مننا وأنا من أكترهم ودا بسبب إننا اتعودنا على كده..
إحنا بنطفي حرايق.. بس مابنبقاش عاملين حسابنا إنها ممكن تحصل أو في خطة بتقول لما نطفي الحريقة هنطفيها إزاي..
خلينا ناخد شوية أمثلة..
إحنا بنصحي الصبح متوقعين أي حاجة ممكن تحصل.. على المستوى الشخصي ممكن شخص يتعب مثلا.. فبنبتدي نكلم أي دكتور نعرفه ونشوف ممكن نودي الشخص دا فين.. مافيش نظام الشخص اللى بيتعب إنه يتعالج من غير مايكون معانا رقم حد، وفى الحالة دي الدقيقة بتفرق فى الحياة.. ودا فى بلاد كتير مش اللى موجود.. أي حد بيتعب فى أي بلد بيبقي فيه نظام لإنقاذه أو علاجه.. بس العلاج هنا بأسلوب "يلا نطفي حريقة".. فاللى بيتعب أو بيتعبله حد مرة واتنين بيفقد الثقة فى حاجات كتير واحدة واحدة وبيتحول لشخص عايز يهاجر.
على مستوى الشغل.. معظم الناس بتشتغل لما تتزنق.. اللى هو الدنيا ماشية وتمام وكده لما نتزنق نبقى نعمل.. من غير خطة أو تحليل للمخاطر.. فمرة واحدة بيبقي معاد التسليم بكرا أو امبارح وإحنا ماخلصناش فبنجري نعمل أي حاجة بسرعة علشان نلحق، فالشغل بيبقي متكروت والهدف بيبقى إننا نخلص مش إننا نعمل حاجة كويسة.. فبيتحول الشغل لتطفية حرايق وتلاقي الشغال متوتر دايمًا.. فبيتوتر، ويفضل قلقان علطول، وبيتحول واحدة واحدة لشخص كاره للشغل.. فالحريقة بتبقي أكبر وعادة بيسيب الشغل خالص.. وغالبًا بيحاول يهاجر برضه.. لو عرف..
نروح للتعليم.. إحنا معظمنا مابيحبش التعليم أصلا.. فبيفضل يحاول ينجح بالفهلوة والأي كلام.. ويمشي نفسه كده من غير ما يتعلم.. فممكن بتخرج من المدرسة وهو مابيعرفش يقرا أو يكتب أو يتخرج من الجامعة مش فاهم هو اتعلم إيه.. وبعدين ييجي يشتغل فيكتشف إنه محتاج يتعلم، فيرجع يحاول يتعلم تاني ويحاول يطفي الحريقة.. فممكن ينتهي الحال بمهندس إنه شغال مبيعات علشان هو أصلا ماتعلمش حاجة من هندسة.. فيحس واحدة واحدة إنه مش ناجح ويقرر يهاجر برضه.. لو عرف.
طيب إحنا بنعمل كده ليه؟ ليه مابنعملش حساب الحاجة بعد شوية.. ليه لازم تحصل مصيبة علشان نحس إن فيه مشكلة؟ ليه علاج المصيبة عندنا ساعات بيبقي أصعب من المصيبة نفسها؟ الشخص كل ما بيكبر وبيتحمل مسؤولية بيبتدي يقدر الحاجات البسيطة فى الحياة زي الصحة والأكل والتعليم والأمان أكتر بكتير من الرفاهية.. وتطفية الحرايق، فالأساسيات كارثة علشان الحريقة لحد مانطفيها بتبقي ولعت فحاجات كتير ساعات ماينفعش تتعمل تاني..
هو إحنا ليه بنعمل كده فى الحاجات الكبيرة والصغيرة؟.. ليه دايمًا الشركات ال"multinational" بتكبر وتفتح فى بلاد وتشغل المصريين وتخرجهم بره مصر؟
ليه مابنعرفش الزحمة فين ومابنعرفش هنوصل إمتي ومابنعرفش هنخلص إمتى؟
ليه الحاجة ممكن تقف على شخص رغم إن المفروض أن الضروريات تخلص من غير أشخاص؟
ليه هنعيش نطفي حرايق؟
إحنا كده أكيد في مرة هنموت فى حريقة.