نهلة عزو تكتب: ليت الحرمان يعود يوما

هى الحضارات القديمة ليه كلها قديمة؟؟يعنى حضاراتنا كلها بنقراها فى كتب التاريخ وانجازاتنا كلها فى الماضى ليه انجازاتنا دى مش متصلة بحاضرنا؟؟مع ان فى امم تانية حضارتها لسه شغالة لحد دلوقتى..يمكن عشان مش محتاجين حاجة وعندنا كل حاجة فإية اللى هيخلينا نبنى حضارة ونتعب روحنا ماحنا عايشين اكل شربين نايمين ومبسوطين
الناس زمان هما اللى كانوا غلابية ياعينى ماعندهمش اى حاجة خالص الفراغ بقى والفضى هما اللى خلاهم يعملوا حضارة..كانوا حافيين ولما رجليهم وجعتهم وحسوا بصعوبة واحتياج لعلاج المشكلة فكروا فى حاجة يلبسوها فى رجليهم ،كانوا بيلفوها بقماش ولما لاقوه بيدوب بسرعة عملوا القبقاب الخشب ولما لاقوا ان الخشب متعب عملوه من الجلود
وشوية بشوية الموضوع اطور لحد ما وصل للشكل اللى موجود عليه حاليا..وياحرام كانوا بيناموا من المغرب عشان ماكنش عندهم نور ولما الضلمة جننتهم وتعبتهم فكروا فى حاجة تنور الضلمة دى ،الاول كانوا بيولعوا خشب وبعدين اخترعوا الشمع ولمبة الجاز وهكذا لحد مالدنيا بقت منورة صبح وليل
وقيس بقى على كده كله حاجة فى اللبس والبيوت والاكل والادوات اللى بيستخدموها فى الزراعة والصناعة و و و..كانوا كل ما يتعبوا وتقرصهم الحاجة يشغلوا دماغهم ويفكروا ازاى يسدوا الحاجة دى..وعشان كده عملوا حضارة انما احنا دلوقتى الحاجة قبل مانحس اساسا باحتياج ليها بنلاقيها فى وشنا ، مدلعين اخر دلع العالم كله شغال عندنا واحنا بنشترى تعبهم عالجاهز مع انى اوقات بحس انى تيس معاه فلوس..بس خراب يا دنيا عمار يادماغى
ربنا يخليهم لينا وياسيدى ما يقولوا علينا عالم تالت ومتخلف زعلان ليه مش انت اللى لما تلاقيهم عملوا اى اختراع تجرى وتشتريه وتغرق اسواقنا بيه لحد ما بقينا تيوس وتنحين ليهم حق يتحكموا فينا
امشى كده فى بيتك واتفرج هتلاقى التليفزيون يابانى الريسيفر المانى السجاجيد تركى ملايات السرير صينى الموبايل فرنسى حتى القميص و البنطلون اللى سترينك مش صنع بلدك..انت باشا كل العالم دى تحت امرك وخدمينك بفلوسك بقى وبكرامتك برده اصل كرامتك هتيجى منين وانت مش عارف تأكل روحك!! اللاوبشن ده تقريبا مش نازلنا اساسا ..العصفور ولا بلاش العصفور اى حيوان فى الدنيا بيسيب ابنه الصغير يقع ويتعور عشان يتعلم ويعتمد على نفسه لو هو عامله كل حاجة هيبقى زينا كده ...قصدى هيبقى بلط
المشاكل والصعوبات هى سر سعادة البشر..الاحساس بالاحتياج والنقص هو اللى اقام الحضارات كلها
الحوجة والحاجة هى ام الاختراع..بس الحاجة عندنا عقيمة مش بتخلف او احنا اللى عقمناها اصلها هتخلف ليه بعد ماخلناها تشتغل مربية لعيال غيرها الحاجة الامريكية والاوروبية والصينية والهندية وكل الحاجات يخلفوا ويجبوا لحاجاتنا عيالهم تربيهم هما يتقدموا ويعلى شأنهم وحاجتنا اعدة زى خيبيتها مالهاش عيل واحد تتسند عليها وتقوى بيه
كنا مفكرين ان تلبية كل الاحتياجات رفاهية بس طلع ذل بس كفايا بقى خلينى احس بالحرمان لشئ يمكن اقدر امحى اسم بلدى من قائمة الدول المتخلفة بلاش تستورد كل حاجة واى حاجة عمال على بطال كفايا ماتبسطهاش كتر من كده