حياتنا حياة مالهاش طعم و لونها غامق يا ترى ليه مع أننا كلنا شايفين نفسنا طيبين و ملائكة ناقصنا بس الجناحين يا سلام بس العيب فين طبعا فى الناس هما الوحشين الى مابتمرش فيهم انا شخصيا طول الوقت شايفة نفسى مظلومة و محدش فاهمنى و عايشة فى الوقت الغلط طيب و بعدين هنحل المشكلة ديه ازاى و احنا كلنا ملائكة و متضايقيين من الناس الوحشين الحل سهل اوى اولا نعترف ان احنا بنى ادميين بنغلط المهم نعرف غلطنا فين و نصلحة تانى حاجة الناس مش وحشيين احنا الى سلبيين حد ضايقنى اواجهه و افهمة و يشرحلى وجهة نظره مش جايز احنا الى غلطانين و لو احنا على حق و الطرف التانى مصر على موقفة و بايعنا يبقى بالسلامة كلنا بنتمسك بالبيبعونا ليه مش فاهمة مع ان كتير لو كملنا معاهم ممكن يكرهونا فى نفسنا و فى الدنيا و لا ايه .عندنا بقى مشكلة كبيرة و هى لو حد قالى حبى نفسك مايعجبنيش الكلام مع اننا كلنا بنحب نفسنا بس كلنا مش بنعترف بده بنعتبره عيب و هقنعكوا احنا بنتعلم و بناكل و بنتفسح و بنشتغل مع اننا تعبانين من الشغل ليه و بنلبس و نلف مصر على بنطلون و نسافر نصيف و بنخطب و نتجوز ونخلف ليه علشان بنحب الجيران و لا علشان نسعد نفسنا لآننا بنحبها ديه الحاجات المشروعة الى بنعملها علشان نفسنا و فى ناس بتعمل حاجات غير مشروعة تغضب ربنا الى بيشرب و يصاحب و يضحك على بنات الناس الجديد ان بعض البنات دلوقتى بيتصرفوا بنفس الطريقة و بقوا يضحكوا على ولاد الناس بيعملوا كدة ليه علشان يبقوا مبسوطين و علشان بيحبوا نفسهم خلاص صدقتوا انكوا بتحبوا نفسكوا طيب كدة كله بيحاول يسعد نفسه المفروض يكون كله تمام للأسف مفيش حاجة تمام لأننا بنحب نفسنا غلط .و الصح مش معناه اننا منعملش حاجة غلط و خلاص الصح ان احنا نعمل حاجات صح مش لينا لوحدنا و لا لاهلنا و اصحابنا و دمتم الموضوع أكبر من كده بكتير محتاج كلام كتير و افعال أكتر تبدأ بالحياة بره الذات وان كل واحد يعرف ان ربنا خلقه ليعبده وليساعد فى اعمار الارض بمساعدة نفسه وغيره وبلده والبشرية كلها لو امكن اعتبر حياتك شجره والشجره ممكن تفيد كل اللى يعدى من جنبها مره بضلها ومره بثمرها ومره بجمالها وثابتها واصرارها ولو اهتميت بيها اوى ممكن تعيش حتى بعد ما تموت وتفضل تفيد الكل وانت هتكون اول اللى هيستفيدوا بانك تسعد بفتح التاء وتسعد بضم التاء وثق وقتها ان ربنا هيرزقك تشوف حياتك والحياة كلها بالوانها الجميله من غير غمقان و للحديث بقيه فاطمة
