التقيل جاى ورا معتمر أمين

بتسألنى هيحصل إيه يوم 30-6؟ والله علمى علمك. لكن شوف، العيال بتوع تمرد عملوا عمايل فى البلد! يعنى جرجروا الشعب كله فى ناحية وجماعة الإخوان فى ناحية. وانت سيد العارفين، مافيش جماعة تغلب شعب. والإخوان شربوا المقلب، وقالك إحنا نازلين يوم 28. طب مستعجلين على إيه؟ التقيل جاى ورا. يعنى لو الإخوان نزلوا يوم 28، هيفضلوا قاعدين فى الشارع لحد يوم 30؟ ولو قعدوا ليوم 30، مش برضو هيتعبوا؟ ومش برضو الناس هتشوف حجمهم؟ ومش كمان الإخوان هتشعر بالقلق من طول الانتظار وهمّ أساسًا مش عارفين إيه اللى جاى عليهم!
يعنى اللى حصل فى دمنهور من كام يوم، والإسكندرية من يومين، ومع المثقفين فى الزمالك، بيوضح أن 30-6 مش هيكون نزهة! حتى عند المثقفين الكريم شانتى شوفنا الأمن المركزى وشوية دم. دا لو كان عند المهاجمين دم! فما بالك بالاتحادية هيحصل عنده إيه! وعلى فكرة كل المظاهرات لحد دلوقتى حمادة ومظاهرات 30-6 وما بعدها حمادة تانى. أنا متوقع أن الشعب هيعمل نقلة نوعية فى الصراع السياسى الدائر فى البلد. لو الشعب حضر عند الاتحادية بمليونية، يبقى إحنا دخلنا فى واقع سياسى جديد ونشء حالة بتأهل المعارضة بأن تطلب وبالشرعية عمل انتخابات رئاسية مبكرة.
مرسى والإخوان مش هيكون عندهم مخرج ومع هذا الناس دى على قلبها مراوح وما بتحسش زيّنا كده بالإحراج والكلام الإنسانى دا. بيعتبروا الحجات دى سيس. وأنا شايف موضوع احتمال سفر مرسى لخارج البلاد عملية فى منتهى الذكاء. ليه بقى؟ لأنه مش موجود فى الاتحادية، وكأنه بيقول للناس إنتو رايحين تعملوا إيه؟ دا أنا حتى بره القصر.. مسكين هو وعشيرته، فاكرين الناس رايحة تقعد كام ساعة ومروّحة. لكن على مين يا سيد العارفين!
طيب تعالوا نقول سيناريو إيه اللى هيحصل من بعد يوم 30. شوف يا إكسلانس. عندك شوية حلول مافيش غيرها. وفى الأغلب اللى هيحصل هيكون حاجة تانية. لكن عمومًا أول حل أن مرسى يوافق على انتخابات رئاسية مبكرة، وينزل على إرادة الشعب. وساعتها الناس هترقص من الفرحة ونبدأ بقى معركة تانية اسمها «ترشح مين». إوعى تكون فاكر أن مرشحًا واحدًا وطنيًّا نازل ضد مرسى. أنا شخصيًّا شايف أن فيه على الأقل 3 مرشحين جادين لو فيه انتخابات رئاسية مبكرة، دا غير مرسى طبعًا. الاحتمال التانى أن مرسى مايعملش حاجة هو وعشيرته ويقولوا نسيبهم لحد ما يروحوا. مشكلة السيناريو دا أن مافيش اعتبار لتصعيد الشارع. يعنى ممكن الأحداث تتطور لحد ما مقرات الحرية والعدالة كلها تولع بما فيها مقر الجماعة فى المقطم. وبعدين تلاقى الدنيا قلبت ضلمة فى الاتحادية، ومش بعيد تلاقى اقتحام للاتحادية وناس طالعة من جوه بمكتب مرسى وكده. والجنان ممكن يكمل وتلاقى ناس طالعة على ماسبيرو وبتعلن تنحية مرسى. من الآخر كده، لو الشعب حضر عند الاتحادية يبقى كل شىء وارد وممكن.
هل بقى الجيش هيدخل؟ طبعًا لا. طب لحد أمتى؟ لحد ما الدم يزيد جامد. الجيش ما يقدرش يدخل بدرى لأنه مش عايز صدام مع الإخوان والجماعات وكمان قلقان من الناس بتوع يسقط حكم العسكر. والناس دى مابتظهرش بدرى! عمومًا، كل ما الدم يزيد فى الشارع كل ما الجيش ينزل بسرعة. يعنى فى يناير السنة دى، مات 53 واحد بالرصاص فى بورسعيد، فالجيش نزل. شوفوا بقى الحساب كام علشان ينزل فى مصر كلها.
قبل ما نكمل المقال تعالوا نتفق على حاجة. الهدف من حملة تمرد هو الإسراع بالانتخابات الرئاسية. وأنا مرة كتبت أن أحد الأشياء اللى بتجعلنى أصوت ضد الدستور أن موضوع الانتخابات الرئاسية غير مذكور فيه. وبالتالى، نجاح حركة تمرد يساوى فعليًّا كسرًا للدستور، لأن نجاح تمرد معناه أن هناك انتخابات رئاسية مبكرة وهو الأمر الذى لم يعالجه الدستور الجديد، طب تعالوا نتخيّل أن 30-6 نجحت وأن الإخوان رضخت لإرادة الشعب اللى بيمنح الشرعية. البلد هتمشى إزى؟
تشكل لجنة من ثلاثة أفراد، وزير الدفاع، ورئيس المحكمة الدستورية العليا، وممثل شعبى متفق عليه «البرادعى مثلًا» وعلى اللجنة مباشرة مهام تسيير الدولة وإجراء انتخابات رئاسية مبكرة خلال 90 يومًا من تاريخ عمل اللجنة. بس نعمل إيه لو مرسى اتقدّم تانى؟ طبعًا أهلًا بيه، ولو الشعب منحه الثقة يبقى د.ثروت عكاشة عنده حق. وعمومًا دا موضوع تانى. أما لا قدر الله لو «تمرد» لم تصل إلى غايتها من التبكير بالانتخابات الرئاسية، فهيحصل حاجتين. أول حاجة إحنا آسفين يا صلاح. وبالمناسبة دى أحب أهدى زملائى النشطاء مقطعًا شهيرًا للممثل القدير إستفان روستى «نشنت يا فالح». ولو الكلام مش مفهوم، نفسر ونقول إن الهجوم المضاد علينا هيكون عنيف وحملة اعتقالات بقى وبهدله وكلام من دا، مش هوصيكم بالحلاوة. الأمر التانى أن تمرد بتزيد من حالة التراكم اللازمة للتغير. يعنى إيه؟ يعنى مافيش تغيّر بأسلوب الضربة القاضية لكن بالتراكم الذى يؤدّى إلى الانفجار. 30-6 محطة فى الطريق للمستقبل.
مرسى لو لم يسقط ب30-6 فهو سيسقط بسبب سوء إدارته البلاد. بقى فيه رئيس البلد طالعة تشيله يقولك «التضحية بدمائنا من أجل المياه».. طب أهو إثيوبيا أعلنت تخفيض حصة مصر يا بعيد!! نهضة عليك انت وعشيرتك!