من كل بستان.. «الكلاب»

الكِلاب.. تسكت.. وتِنْبَح
الكلاب.. تِقْفِل.. وتِفْتَح
الكلاب.. تمنَع.. وتِسْمح
والكلاب.. تخسر.. وتربح
نَبْحَها فى الليل غريب
صمتها.. دايمًا مُريب
ع البيبان واقفة مِنَاوْبَة
بِشْمَة.. لا تشبع مِتَاوبة
لو أكَلْت اللقمة.. تِنبح
لو رميت اللقمة.. تنبح.
لمّا تِتَّاوِب ما بِتداريش نِيابها.
لما نُسكت تِبْقَى هادية
لمّا نتكلم تِعبَّرْ فى وضوح
عن اكتئابها!!
علِّمِتْنَا لاكتئاب..
الكلاب..!!
■ ■ ■
طالعة نازلة كالمَاكوك
بسّ يزعجها أدان الفجْر..
وصياح الديوك.
عارفة سكة المناطق الجديدة
والحوانيت الجديدة.
تشرب القهوة وهِيَّه
قاعدة بِتْفَلِّى الجريدة
تعرف العُمله إذا قلقانه والاّ
مُطمئنة.
ماتقابلهاش..
غير على ابواب النوادى والبيوت
فى الصُّور تظهر وتوضح..
كل ما شْبْعنا غِياب..
الكلاب..!!
■ ■ ■
لمّا بِتْعدِّى.. نوسَّع
لو نناقِشْها تِسَرْسَع
الكلاب تنبح ولكن..
مش بتسمَع!!
أى كلمة لو نُقولها
تِتْنِفِض.. ترفَع ديولها.
قد ما تضيق الحياة قُدّام عيونَّنا
قدّ ما قُدَّامها تِوْسَعْ!!
لما بتشوفنا تِبَصْبَصْ.
فى الحوانيت الرخيصة تحتقرنا
لمّا نسأل ع اللّى أرخص!!
من غير ما تِفْحَص
ليها نظرة.. لا تَخِيبْ.
نَبْحَها.. دايمًا غريب.
صمتها.. قاسى مريب.
كل ما اتناصِحْنا بنلاقيها أنْصَح.
كل ما نُسكُتْ نلاقى سكوتها أفصح.
فى العراك تِعرف تحارب
فى البُرَصْ تِعْرَف تِضارب
تمشى فى الأسواق بِتِتْمايل
وتغلب أى شارب.
لو تموت عارفة ضريحك.
لو وقِفْتِ لْها.. تزيحك.
ألله غالب..
الله واخِد.. الله جايب.
واللِّى جاىْ هوَّه اللى أنْقَح.
مَوِّتوا حلم الأحبّة والصحاب..
الكلاب..!!
■ ■ ■
لو تُعضَّك إوعى تِحدفْها بطوبة
القوانين للعقوبة
والكلاب امّ الخصوبة..
ليها أطفال عُمْىِ بُكره يفتَّحوا..
وينبحُوا
من غير صعوبة
يخرجوا طوفان يحِرُّوا برد طوبة
واحنا ما فى اليدّ حاجة
سُذَجَا.. آخِر سذاجة
ما اكتشفناش انها نباح وِعَضّ
كان بَقَى لْنا قصور
ومال ياما وأرض.
بَسّ لو كان علّمونا كُرْه بعض
كان زمانَّا بنِنْجحوا
كان زماننا بنسكتوا وبننبَحُوا
وبنقفلوا.. وبنفتحوا..
زى الكلاب!!