الغريب

تعميد
أصحابك ح يرضوا عنك جداً..
إذا عرفت توزع نفسك عليهم..
بالتساوي.
لكن لو إديت واحد فيهم حتة زيادة
تبقي كده بتفرق ما بينهم..
أو بتوقعهم ف بعض.
إوعي تفتكر إن ممكن تحتفظ بأي جزء ليك
لأن دي تُعتبر أنانية ملهاش أي معني.
وبما إنك طبعاً مش ه تعرف تكون عادل
ف قدامك حل واحد
ثبت نفسك ع الصليب.. وسيب كل صاحب ياخد نايبه
في الآخر ح يفضل معاك 3 حاجات
هموم..
عرق..
دموع.
أول ما تخرج من القهوة..
دس عرقك ف جيب الأسفلت
اللي بقاله أكتر من 25 سنة
بيمدك بالغربة..
من غير أي مقابل.
قبل ما تطلع علي الكورنيش..
لازم تتأكد إن وحدتك متزررة كويس.
هناك..
ف حضن الإله العجوز..
دايماً بتصحي الهموم
وتتقدم الدموع كقرابين ل حابي العظيم
يمكن يفيض بالأمل/ الحب.
المرة دي حاول تقنع وحدتك..
تنزل في العجوز تتعمد
أول ما تنزل سيبها متغطية بالليل واجري
الحق حبيبتك..
اللي مفضلش ليها منك
غير قصيدة..
مش ليها
انتماء
كل وطن طلبت حق اللجوء الإنساني لحضنه
منحني فترة إقامة محددة
حتي جسمي القديم
بدأ ينبهني - هو كمان - إن إقامتي فيه..
علي وشك الإنهاء
- باختصار -
أنا كل سنة باحاول ألاقي أي شيء أنتمي له
لكن بعد 26 محاولة فاشلة
قررت إن العالم ده.........
ما ينتميش ليا.
تصعيبة
تصعب عليا نفسي..
لما أتسول الحشيش.. البيرة
واللحظات الحميمية
لما البس وش التلميذ..
قدام أساتذة خيش وقش
لما أستكين في مسوح أخوة..
بيدعيها ناس هُمَّ تضاريس غُربتي
لما تبتسم عيوني..
وقلبي مش حاسس بفرح
لما أشوف دماغ ما باحترمش صاحبها..
مع مُوزَّة باحترم دماغها
لما آخد حق قعدتي ع القهوة..
من أصحاب أصغر مني أو من إخواتي البنات
لما أمارس رجولتي مع شوية رغاوي
لما تلطشني كفوف الداخلية..
لأني ماشي ف الشارع
لما اقضي عتولتي كتابة..
مش فرفشة.
مذكرات
ح تكتب إيه في مذكراتك؟
سبيت الدين كام مرة
قبل ما تتاوب وتدور علي سيجارة..
ف جيوب أصحابك.
ولا عن إقامتك المُحددة جوه هدومك الدبلانة.
بتفكر تكتب..
عن رحلة البحث عن الثورة
في البارات والجُزُر القُطنية.
اسمع كلامي:
اكتب أحسن عن حفلة عيد ميلادك
اللي كل أصحابك نسيوها
وانت..
كسلت تروحها.
ملل
الموت أكتر من ألف مرة في يوم واحد
أمر مُمِل جداً
تفضل روحك طالعة.. نازلة
طالعة.. نازلة
لغاية ما تموت من كتر التعب
أو ترفض إنت دخولها..
من كتر الملل.
اجري أحسن علي سِتّك
خليها تحكي لك عن الراجل اللي قطع شرايينه
ودلق كل الخير من جواه..
عشان يعرف يعيش
بس لما رجع يدور عليه
كان أطفال الشوارع..
شموا اللي يخليهم راضيين
وعمال البلدية..
لموا اللي يمنعهم من الإضراب.
من سيربح ال..............
الوطن مش حفنة تراب
ولا أي فيلم أو غنوة أو حتي مسلسل
حاول يقول لي يعني إيه وطن..
من غير ما يفهم جنابُه..
أي حاجة عن حقوق المواطنة.
الجُندي المجهول..
معقولة مات عشان شوية تراب
أو عشان يضمن لأولاده يوم أجازة في السنة
- بمناسبة عيد الاستقلال -
مات مجهول..
لجل ما يرفع الساسة العَلَم
ولا..
لجل ما ينزل الفلاح بالفاس؟
(فتاة أمريكية تلقي حتفها
تحت عجلات جرافة.. إسرائيلية
دفاعاً عن منزل أسرة.. فلسطينية)
أ/ الوطن فكرة.
ب/ الوطن ترسيمة حدود عملها ناس مش منه.
ج/ الوطن عِرق خشب مسوس شايل عَلَم بهتان.
د/ الوطن آلة والمواطن تِرس.
لو محتار قوي..
أنا ممكن أحذف لك وطنين..
أو تستعين ب الشعب.
من ديوان «الغريب»
صدر عن دار نشر «ميريت»