الالتراس يدق طبول الحرب : دولة القانون "بلوها واشربوا مايتها" .. وقضية المطار سياسية

أصدرت رابطة "أولتراس أهلاوى" بيان شديد اللهجة بخصوص إستمرار حبس بعض أعضائها على ذمة أحداث مطار القاهرة التى وقعت منتصف الشهر الماضى.

وأوضحت الرابطة فى بيانها عبر صفحتها على موقع التواصل الإجتماعى "فيس بوك" أن أوراق القضية لا توجد بها أدلة تدين المجموعة وأن الموضوع برمته هدفه سياسى وذلك من أجل تحطيم "الأولتراس" وذلك على حد زعمهم.

"الأولتراس" جدد تأكيده على أنه بعيد كل بعد عن الفصائل السياسية وأنه لا ينتمى لأى طرف داخل معترك السياسة فى مصر.

وهدد "الأولتراس" فى البيان بأنهم مستعدين للمواجهة فى الشارع إذا أستدعى الامر ذلك.

وكانت النيابة قررت إستمرار حبس أعضاء الرابطة الذين قبض عليهم فى أحداث مطار القاهرة والتى وقعت أثناء إستقبال "الأولتراس" بعثة فريق الاهلى لكرة اليد العائدة من المغرب.

وفيما يلى بيان الرابطة:

من يوم 13 اكتوبر واحنا بنحاول نعرف فين القضية

الحقيقة ان مفيش قضية .. مفيش ادلة اتهام .. مفيش تسجيلات اتفرغت من كاميرات المراقبة .. و حرز الاتهام مجموعة من الاحزمة !!

دولة القانون والعدل اللى بتتكلموا عليها ليل ونهار يا ريت تبلوها وتشربوا مايتها لان لا فى قانون ولا فى عدل

اى قانون اللى يخليك تحبس شباب 15 يوم من غير اى دليل لمجرد وجود مذكرة تحريات لو فى طفل قراها مش هيقدر يوصف كاتبها الا بالغباء

والاغرب تجديد الاحتجاز 15 يوم لنفس الاسباب !!

القضية كلها سياسية .. القصة كلها محاولة كسر الجروب ودة مش هيحصل حتى فى احلامكم

اولتراس اهلاوى قوتها مش فى قياداتها .. المجموعة قوتها فى اعضائها .. قوتها فى ايمانهم بفكرة عمرها ما هتموت بموت 74 ولا هتتحبس بحبس 25

اولتراس اهلاوى عمرها ما هتكون على هوى اى نظام لانها كانت وهتفضل بعيدة عن اى استقطاب سياسى .. ومن بعد قضية شهداء مجزرة بورسعيد والمجموعة فى مكانها الطبيعى داخل الاستاد .. واذا كان للمجموعة موقف هيكون مع الحق فى الدفاع عن الحرية اللى مش على هوى الكثيرين

طوال الفترة الماضية والمجموعة بتحاول بشتى الطرق اتباع الطرق القانونية للافراج عن اعضائها المحتجزين .. من تقديم تظلم ضد قرار الاحتجاز 15 يوم ومن ثم تجديد الاحتجاز مرة اخرى حتى الاستئناف الذى تم رفضة مؤخرا دون اى سند او سبب قانونى

الاولتراس مكانها المدرجات واذا كنتوا بتحاولوا تجروها للشارع تأكدوا انها هتسبب صداع مزمن ليكم مش هتكونوا قادرين على تحملة

سنسلك الطرق القانونية حتى اخر نفس واذا كان الظلم قانون سوف نضعة تحت اقدامنا

وعلية تقرر تجمع المجموعة وجمهور الاهلى والمتضامنين مع القضية يوم الاربعاء القادم 6 نوفمبر امام النادى الاهلى بالجزيرة الساعة 12 ظهرا للتحرك بمسيرة اخرى .