أولتراس أهلاوي.. للداخلية :"مش هتعرفوا تكسرونا ولو نزلنا الشارع هتندموا "

أصدرت مجموعة "أولتراس أهلاوي" عبر صفحتها الرسمية علي موقع التواصل الإجتماعي" فيس بوك "بيانا شديد اللهجة تؤكد فيه أن قضية مطار القاهرة واحتجاز 25 فر من أعضاءها ما هي الا قضية سياسية ولا يوجد أي دليل ضد المتهمين وأنها ستسلك كل الطرق القانونية لإخراج اعضاء الجروب المحتجزين علي خلفية احداث مطار القاهرة .
وختم البيان بدعوة اعضاء الجروب وجماهير الاهلي للإحتشاء يوم الاربعاء القادم امام بوابه النادي الاهلي بالجزيرة
وجاء البيان كالتالي :
من يوم 13 اكتوبر واحنا بنحاول نعرف فين القضية
الحقيقة ان مفيش قضية .. مفيش ادلة اتهام .. مفيش تسجيلات اتفرغت من كاميرات المراقبة .. و حرز الاتهام مجموعة من الاحزمة !!
دولة القانون والعدل اللى بتتكلموا عليها ليل ونهار يا ريت تبلوها وتشربوا مايتها لان لا فى قانون ولا فى عدل
اى قانون اللى يخليك تحبس شباب 15 يوم من غير اى دليل لمجرد وجود مذكرة تحريات لو فى طفل قراها مش هيقدر يوصف كاتبها الا بالغباء
والاغرب تجديد الاحتجاز 15 يوم لنفس الاسباب !!
القضية كلها سياسية .. القصة كلها محاولة كسر الجروب ودة مش هيحصل حتى فى احلامكم
اولتراس اهلاوى قوتها مش فى قياداتها .. المجموعة قوتها فى اعضائها .. قوتها فى ايمانهم بفكرة عمرها ما هتموت بموت 74 ولا هتتحبس بحبس 25
اولتراس اهلاوى عمرها ما هتكون على هوى اى نظام لانها كانت وهتفضل بعيدة عن اى استقطاب سياسى .. ومن بعد قضية شهداء مجزرة بورسعيد والمجموعة فى مكانها الطبيعى داخل الاستاد .. واذا كان للمجموعة موقف هيكون مع الحق فى الدفاع عن الحرية اللى مش على هوى الكثيرين
طوال الفترة الماضية والمجموعة بتحاول بشتى الطرق اتباع الطرق القانونية للافراج عن اعضائها المحتجزين .. من تقديم تظلم ضد قرار الاحتجاز 15 يوم ومن ثم تجديد الاحتجاز مرة اخرى حتى الاستئناف الذى تم رفضة مؤخرا دون اى سند او سبب قانونى
الاولتراس مكانها المدرجات واذا كنتوا بتحاولوا تجروها للشارع تأكدوا انها هتسبب صداع مزمن ليكم مش هتكونوا قادرين على تحملة
سنسلك الطرق القانونية حتى اخر نفس واذا كان الظلم قانون سوف نضعة تحت اقدامنا
وعلية تقرر تجمع المجموعة وجمهور الاهلى والمتضامنين مع القضية يوم الاربعاء القادم 6 نوفمبر امام النادى الاهلى بالجزيرة الساعة 12 ظهرا للتحرك بمسيرة اخرى