ألتراس أهلاوى يُندد بحبس أعضائه فى مسيرة الأربعاء

أعلن ألتراس أهلاوى، الخروج فى مسيرة الأربعاء القادم تبدأ من أمام مقر النادى بالجزيرة؛ تنديدًا بحبس 25 من أعضاء الجروب، على خلفية أحداث مطار القاهرة والاشتباك مع الأمن الشهر الماضى.
وقالت الرابطة عبر صفحتها الرسمية بموقع التواصل الاجتماعى (فيس بوك): "
من يوم 13 أكتوبر واحنا بنحاول نعرف فين القضية
الحقيقة إن مفيش قضية .. مفيش أدلة اتهام .. مفيش تسجيلات اتفرغت من كاميرات المراقبة .. وحرز الاتهام مجموعة من الأحزمة !!
دولة القانون والعدل اللى بتتكلموا عليها ليل ونهار يا ريت تبلوها وتشربوا مايتها لأن لا فى قانون ولا فى عدل
أى قانون اللى يخليك تحبس شباب 15 يوم من غير أى دليل لمجرد وجود مذكرة تحريات لو فى طفل قراها مش هيقدر يوصف كاتبها إلا بالغباء
والأغرب تجديد الاحتجاز 15 يوم لنفس الأسباب !!
القضية كلها سياسية .. القصة كلها محاولة كسر الجروب ودة مش هيحصل حتى فى احلامكم
أولتراس اهلاوى قوتها مش فى قياداتها .. المجموعة قوتها فى أعضائها .. قوتها فى إيمانهم بفكرة عمرها ما هتموت بموت 74 ولا هتتحبس بحبس 25
أولتراس اهلاوى عمرها ما هتكون على هوى أى نظام لأنها كانت وهتفضل بعيدة عن أى استقطاب سياسى .. ومن بعد قضية شهداء مجزرة بورسعيد والمجموعة فى مكانها الطبيعى داخل الاستاد .. وإذا كان للمجموعة موقف هيكون مع الحق فى الدفاع عن الحرية اللى مش على هوى الكثيرين
طوال الفترة الماضية والمجموعة بتحاول بشتى الطرق اتباع الطرق القانونية للإفراج عن أعضائها المحتجزين .. من تقديم تظلم ضد قرار الاحتجاز 15 يوم ومن ثم تجديد الاحتجاز مرة أخرى حتى الاستئناف الذى تم رفضة مؤخرًا دون أى سند أو سبب قانونى
الأولتراس مكانها المدرجات وإذا كنتوا بتحاولوا تجروها للشارع تأكدوا أنها هتسبب صداع مزمن ليكم مش هتكونوا قادرين على تحملة
سنسلك الطرق القانونية حتى آخر نفس وإذا كان الظلم قانون سوف نضعة تحت أقدامنا
وعلية تقرر تجمع المجموعة وجمهور الأهلى والمتضامنين مع القضية يوم الأربعاء القادم 6 نوفمبر أمام النادى الأهلى بالجزيرة الساعة 12 ظهرًا للتحرك بمسيرة أخرى .."