مداعبات ومشاغبات إنباوية

- نادى الزمالك : نحترم فيكم الثبات على المبدأ مركز تانى يعنى مركز تانى دورى كاس مفيش هزار هو التانى ...
- جماهير الزمالك : بتهيألى دلوقتى مش بس جنبكم اللى بيوجعكم من انبى !!!
- إتحاد الكرة : والله إنتم طلعتم أهلاوية ومفيش فى قلوبكم رحمة مش كنتم توزعوا حتى ولو كاس صغير كدا على كل لعيب زمالكاوى وهو ماشى بعد الماتش يروح بيه، إخس عليكم ...
- أحمد حسن : ألف ألف مبروك عليك الفانلة البيضة دلوقتى أقدر أهنيك على إنك هتلعب دور أشرف مروان !!
- ميدو : بصراحة رجوعك وشه حلو كل مرة على الأهلوية لازم مجلس إدارة الأهلى هو اللى يدفعلك قيمة تعاقدك مع الزمالك .
- محمود فتح الله : حق الله وعدله إنك لازم تطالب بمستحقات البطولة دى من إنبى والعالم كله شاهد !!
- رزاق : رزق الزمالك بقى من وسع على وشك يا جميل .
- أيمن يونس : نقدر ظروفك النفسية معلش بس لازم تجمد اكتر من كدا دا ياراجل دا اللى جاى أسود من كدا صحتك يا كابتن ونحيىّ فيك حيادك الإعلامى الزمالكاوى المعتاد !!!
- التوأم : تصدقوا اللى ييجى عليكوا عمره ما يكسب ابداً وكمان إنتم ربنا كرمكم مش محتاجين تكشفوا راسكم وتدعوا!!
- مختار مختار : أثبت بالفعل أنك مدرب أهلاوى فعلاً أدب وأخلاق وفنيات عالية يتعلم منك المعلمين !!
- محمود معروف : طبعاً لو كان جوزيه اللى خسر الكاس كنت قولت عليه دا حرامى غسيل ولا بلاش موضوع حرامى دى ممكن تعيد ذكريات وحشة عندك !!
- المئوية الحزينة : للأسف مفيش بطولة المرة دى وللأسف أكتر مش هيكون فى أى بطولات طوال ال 100 سنة اللى جاية ، إحتفلى مع نفسك بس بشويش أحسن حد يسمعك !!
- زمالكاوى قبل المباراة : رايحين نجيب الكاس وإنبى هيداس !!
- زمالكاوى بعد المباراة : لا توأم نافع ولا شحاتة شافع هتفضل يا زمالك واقع ..
أخيراً ..أحب أن أنوه بأننى كتبت مقالة هنا فى موقعنا الجميل إسمها رسائل شائكة وذلك بعد مباراة إنبى مع النادى الأهلى وقمت بالتهكم والسخرية على لاعبى الأهلى وجوزيه ، وكتبت فى آخر المقالة أننى أعتذرعن فحوى المقال ولغته العامية الدارجة لأنها كانت خارجة من قلب حزين ملىء بالأسى على حال الفريق ،
ولكن لم يتقبل المعظم المقالة وإتهمونى بالزملكة !! وتحدونى بأن أكتب مقالات بنفس النمط والكيفية عن الزمالك حال تعرضه لأية هزيمة أو إقصاء من البطولة ،
وأنا لا أكتب رداً عليهم فقط ، ولكن لكى أبعث رسالة لجميع مشجعى كرة القدم فى مصر وهى أنك من حقك أن تشجع وتنتمى وتتعصب لناديك ،
ولكن التنادر والقفشات المتبادلة بين المتنافسين هى بهارات التشجيع ويجب تقبلها، ولكن أبداً لا يجب أن يكون هناك تجاوز أو سب ، لأن الحياة ليست كرة قدم أو نادى فقط بل هى هدف للإنسان ممن خلقه الله تبارك فى علاه ،
وأتمنى أن نرى بطولة دورى نارية كما نتوقع جميعاً لإثراء الكرة المصرية وتحقيق حلم المونديال الذى نتمناه جميعاً كمصريين .