المرشحون لرئاسة الجمهورية " مولد وصاحبه غايب "

بذمتكم شفتم مهزلة أو مسخرة انتخابات رئاسة الجمهورية أو مولد رئاسة الجمهورية الذي ينطبق عليه أغنية المطرب الشعبي الكبير أحمد عدوية التي تقول «زحمة يا دنيا زحمة زحمة ولاعدش رحمة مولد وصاحبه غايب» وذلك للاشارة إلي ان المتقدمين للترشيح لرئاسة الجمهورية كان عددهم خمسمائة مواطن في خمسة أيام بس رشحوا نفسهم لمنصب رئيس الجمهورية في مصر.
إذا كان المرشحون خمسمائة في خمسة أيام معني ذلك أنه خلال شهر الترشيح سيكون هناك أكثر من ألفين أو ثلاثة آلاف مصري يريدون الترشيح لمنصب رئيس جمهورية مصر العربية، إيه الحكاية إيه اللي بيحصل ده كل الشعب عايز يبقي رئيس جمهورية طيب أمال فين الشعب اللي حيتحكم.
ومولد أو مورستان الترشيح لرئاسة الجمهورية ينطبق عليه المشهد العبقري للفنان العبقري الراحل توفيق الدقن في نهاية فيلم «الشيطان يعظ» وكان المشهد هو مشهد ختام ونهاية الفيلم عندها كان توفيق الدقن يجلس ويسمع أغنية «ودع هواك وانساه وإنساني عمر اللي فات ماحيرجع تاني» في الراديو ودخل عليه النجم الكوميدي الكبير سعيد صالح في شكل معلم ويلبس لبس معلمين وقال سعيد صالح للنجم العبقري الراحل توفيق الدقن، أنا جامد قوي وعايز أتعلم منك الفتونة يا معلم علشان عايز اشتغل فتوة، فرد توفيق الدقن علي الفنان سعيد صالح «هوه إيه الحكاية الناس كلها عايزه تشتغل فتوات أمال مين الناس اللي حتنضرب لمه كل الناس عايزه تشتغل فتوات» ودلوقتي الشعب المصري كله عايز يبقي رئيس جمهورية عليه العوض ومنه العوض في الثورة المصرية والشعب المصري أنا ما بقولش الكلام ده من عندي ده أنا كنت مكسوف وأصحابي بيكلموني من فرنسا وإيطاليا وبيقولوا لي ان صحافة فرنسا وإيطاليا وكل صحف العالم بيستهزءوا وبيسخروا من الشعب المصري ومن المرشحين المصريين اللي تقدموا للترشيح لمنصب رئاسة الجمهورية واللي كان عددهم خمسمائة مرشح في خمسة أيام، والله العظيم أنا صعبان علي الشعب المصري والثورة المصرية اللي ركبها وسرقها المجلس العسكري والاخوان والسلفيين الثلاثة متهمين بسرقة الثورة من الشعب ودلوقتي بيبهدلوا في الشعب المصري ولكي الله يا مصر ويا شعب مصر «من إهانة الأمريكان بتوع قضية التمويل الاجنبي ، والشعب المصري اتهري .