نتيجة الثانوية العامة بدون تدخلات الحزب الوطنى

السنة دى غير كل سنة، النتائج حقيقية، مش مرفوعة زى أيام الحزب الوطنى، لما كانوا بيأمرونا واحنا بنصحح الثانوية العامة، إننا نزود الطالب درجتين ثلاثة على غلاف ورقة الاجابة، من غير مانبص جواها، وكانوا بيفهمونا إن ده بيحافظ على أموال البلد، لأن الطالب اللى بيعيد السنة بيكلف البلد كتير».

كان د. على الألفى، وكيل وزارة التربية والتعليم للتعليم الاساسى، يعلق على نسب النجاح فى امتحانات الشهادة الاعدادية، التى تعقد على مستوى المحافظات، والتى ستجرى الادارة مقارنة بينها، وبين نتائج العام «عشان نعرف إحنا فين ونركز على نقط الضعف»كما يقول الالفى.

كانت نسب النجاح فى الشهادة الاعدادية قد وصلت إلى 63% فى البحيرة، و61% فى مطروح، و62% فى الجيزة وكفر الشيخ، و70% فى القاهرة، بعد أن كانت فى الفصل الدراسى الاول 60% أيضا، بينما وصلت إلى 92% فى الوادى الجديد.

فيما لم تعلن بعض المحافظات نتائجها بعد، كل كنترول ليه حالته الخاصة، أحيانا بيكون عدد المصححين قليل، أو أى ظروف تانية» كما يؤكد الالفى.

الادارة المركزية للتعليم الاساسى، أرسلت تعليمات لنظار المدارس الابتدائية والاعدادية، للبدء فى تنظيم برامج علاجية للراسبين خلال فترة الصيف، ليمكنهم النجاح فى امتحانات الدور الثانى.

«فيه مدرسين بيكونوا عايزين يخلصوا المنهج، من غير الطالب مايكون بيعرف يقرا ويكتب، عشان كده هانعمل اختبارات قومية فى القراءة والكتابة فى الصفين الثالث والخامس، عشان نعالج مشاكل الطلاب دول، مش هانستنى لما يسقطوا سنتين ورا بعض فى سنة سادسة، عشان يدخلوا الاعدادى المهنى»، كما يقول وكيل الوزارة.

الوزارة كانت قد أعلنت عن أنها ستلغى مدارس الاعدادى المهنى، التى تبلغ 269 مدرسة وكانت تستقبل راسبى الابتدائية، لتحول إلى مدارس تجريبية، مع زيادة الطلب على المدارس التجريبية.

لكن د. على الالفى يؤكد «تراجعنا عن إلغاء هذه المدارس، لأنها موجودة فى قانون التعليم 139، لكن الطالب هايدخلها بميوله مش بمجموعه، خاصة ان سنة سادسة مابقيتش شهادة، وهانطور فيها عشان مستواها يكون أفضل».