قصيده شهيد مصري

دقوا الدفوف و افرحوا بعروسه الأوطان
يدارى من حسنها الورد فى الأغصان
يوم الزفاف اتجمعوا كتير من الشبان
و مصرنا متزينه بالطرحة و الفستان
اتجمعوا أهل الوطن و حددوا الأزمان
كتبوا كروت الفرح بدمهم يا زمان
ماتوا عشان يرسموا البسمه بالألوان
يوم الزفاف اتعزم كتير من الشجعان
كان التاريخ فى يناير والمكان فى ميدان
صورة شهيد الوطن محطوطه عالفستان
بيقول يامه امسحى دمعك دا انا الكسبان
جات الرصاصه فى قلبى من الغدر و الطغيان
أنا يامه مش زعلان دا أنا أشجع الشجعان
يلا بزفافك افرحى و من قلبى أنا فرحان
وحشونى اخواتى و أهلى فى الميدان
أنا مت علشانهم و عشانك انتى كمان
زفونى على الجنه ملايكه الرحمن
سلمت بأيدايه على الملايكه كمان
قابلت شهدائنا اللى سابونا زمان
حاربوا فى أكتوبر وحرروا الأوطان
صاحبى واحد منهم تخيلى كان مننا زعلان
رواكى من دمه و دمه علينا هان
بس خلاص يامه دلوقتى بقى فرحان
قالى انه كان حاسس و فينا كان عشمان
اطمنى يامه ما عادش فيه أحزان
دا انا هنا مكرم وعمرى ما ابقى مهان
تصورى يامه بقيت من الأعيان
أنا عندى بيت فى الجنه و أرض ملك كمان
عمرى ما كنت اتمنى العيشه ديه زمان
أمانه السلام يامه للأهل و الاخوان
أنا هنا قاعد للنصر مستنى
ماسك علم مصرى
لسه عليه دمى
فرحان و متهنى
و هربت من همى
عايز أشوف ابنى فرحان وبيغنى
عايز أشوف اخويا أيامه مش زيي
يعيش على أرضه بكرامه المصري
يحقق الأحلام و كل ما اتمنى
أنا معاه بروحى
أنا معاه بقلبى
امضاء شهيد مصري