فى وصفي أمية

معرفش افك الخط
بتوه لوحديا
لكنى فى حبك
موتى مالوش ديا
دا الدم ليكي ترف
مبقولش تضحية
ماانا اصلى يامايا
عشقانة مصرية
و العشق دا غيه
واسمك فى قلبي
حروف
منقوش بحنية
إكليلك العاشق
شايلاه على جيدي
والحنة من ارضك
ملونة ايدي
والخال على خدي
بيبان فى تنهيدي
خلخالى فى الخطوة
تتهادي عنده قلوب
وانا اصلى عشقانة
صوته
فى غنى المحبوب
اميل يجلجلى
وحبيبي يغزلى
على صوته اغنية
بسمعها محفوظة
بصوت المراكبية
اعدي الاقيهم
سكتوا وقالوا الله
الله على عيونها
دي جميلة من يومها
مكحلة جفونها
ملامحها خمرية
ضحكتها حرية
يارب بالقدرة
تحفظها وتصونها
دي البنت مصرية