أنا الشاب اللي مات

وبقى رفات
واللي أتسحل رغم السكات
أنا الشاب اللي مات لأجل الحياة
واللي هتف رغم الألم شعارات
واللي سكن قلب الليل وفي الضلمة بات
أنا العاشق وأنا المظلوم وأنا الجاحد للممات
خرجت يوم أهتف بلا منصات
قتلوا فيا كل الأمل حتى الفتات
أنا اللعيب وأنا اللاعب وأنا الطعنات
دبحوني في دوري وقدموا الاعتذارات :(
وقتلوني وسط حشود وقالوا عميل وميليشيات
أنا اللي تعب صوتي من الهتافات
كل حاجة ماتت إلا الصرخات
أنا الملفوف في العلم ..وجنازة وصراخ بنات
أنا اللي أمي دمعت وأبويا طافح المرارات
أنا اللي أخويا أتظلم ومخدش حقه من البهوات
وابن عمي ده اللي صرخ واعتصم مرات
باحث ولادكتور وقتلوا فيه الأمنيات
أنا المعارض اللي رافض يسلم ليهم الرايات
أنا اللي حب البلد رسم جوايا مدارات
وأنا اللي أسم مصر اتحفر جوايا نحات
وأنا الشاب اللي كان ع الحدود وفجأة مات
وأنا اللي واقف ضد نفسي في كل المرايات
ماهو أنا بردوا اللي مثل كل المسلسلات
أنا هو أنا دوري لا أنتهى ولافات :(
أمي في كل حالة عنيها للدمع بحور زخات
وأنا موجة الغضب اللي علت كل الشتات
أنا اللي كتبوا أسمي بالخرطوش وغرفة العمليات
وأنا اللي عروني وسحلوني وخلوا مني ع دفعات
وأنا اللي كل يوم بأتكتب ويغيروا الحروف ويا اللمحات
أنا الشهيد مهما كان ومهما اختلفت الروايات
أنا الشاب اللي طلع يوم ونادى بالحريات
أنا الزهر اللي كان مفتح ولما سقوه السم مات
أنا الجريح وأنا النزيف وأنا السليم وأنا الأنات
أنا اللي أتغرب وهوساكنك وشاف الويل سرعات
وأنا الميادين اللي فيكي وحبة الرمل والمدقات
حالف ما أسيب فيكي ولاشبر مليان أهات
حالف لأكون العلم وأكون نسرك في الظلمات
وأصرخ في وش اللي ظلم واللي شايفك ممتلكات
ماهو أنتي ولاميراثهم ولا مملكة للأخوة والأخوات
وأرجع وأقول أنا الشاب اللي مات
أنا المتظاهر .. ظابط الشرطة وظابط الجيش مات:(
أنا الشاب اللي مات وبقى رفات
واللي أتسحل رغم السكات
أنا الشاب اللي مات لأجل الحياة