صَبرِك...لأحمد برهان

صبرِك على العبد اللي داب
ماهو أصله تاب
أوِّل ما شاف ضحكتك
و شق جوَّا الحلم
سكة بألف باب
حالف يروح و يصير
أصل الغلابة كتير
عشمه ف ربه كبير
قد السما و البحر
ماتصدقيش ابن الوزير
اللي عماكي بمهر
اللي ارتسم من بين صفوف جيشه
ضحية حرب
و قطّر الدمعة
و مثِّل اللوعة
و سهّر م البنات ياما
ف سبيل الدرب
درب الهوى اللي التوى
بين إيده تسلاية
اللي انحنى و انتنى
للباشا ف مرايه
و العيب ماهوش عيبه
العيب على اللي جابوه
و اللي بدلع ربوه
قافش كاشات من ابوه
اللي ماهوش ماله
دا مال أمه
و هوّ مال أمه
بالعشق و المعشقة
و شوق اللي مات شوقه
لمّا كنتي مشنقة
لمّا كنتي نسمه طايرة
بتناديه
أنا واحد م اللي حبّينِك
طالع عينين أهاليه
بيكتب كل يوم فيكي
قصايد شِعر
بتخلّيه
يدوب أكتر من الأوّل
و يتفتفت و يتحوّل
مع كل كلمة بتقوليها تُراب
يا ريتهم ييجو ياخدوني
على بلادِك يضمّوني
دبحِت عينيكي اللي جابوني
رموني ف حضن نار و عذاب
.....
بُصي بعينيكي اتشجّعي
صبرك عليّا و اسمعي
خليكي سكني ف رحلتي
ع الحلوة و المُرّة
تحلى بشهد الحب
لو غاب العسل مرّة
و افتكري لمّا تبردي
تِدَّفي في حضني
و امّا تضلِّم سمانا
تثوري يا قمرة
يا لقمة عيش
تصبرني على المشاوير
و ماتزهقيش م اللآه
لو جيت ف يوم قولتها
و انا مش هاقولها كتير
أنا أصل أبويا
قاللي من دا كتير
إن البُكى و الآه والحسرة
مش لينا
عاشت أهالينا
ع الفقر لمّا استوو
و الجيّ بإيدينا
مستنّي إيه ؟!
إكسبو !
و ماتعمليش فيّا
زيّ امّا عملت "..."
مشيت ف وسط الطريق
و سابتني وحداني
و بعذُرها ... محبتنيش
رسمت طريق تاني
ما كنتش فيه
و انا مقدر و متكدّر
على اللي انا فيه
لكن مسامح و سامح
بالرضا زينه
مين اللي قال يا بشر
العشق بإيدينا ؟!
....
رسالة حب ف إزازه
ف عرض البحر
صبرك هوى
يسكنها حتى تعوم
صبرك جدع يملاها
تقدر توصلك
صبرك نفد
حسرة على الموهوم
.....................