أغانٍ قديمة «لَنّْج»!..

ضمن أوراقى القديمة التى ورثتها عن جدى الشيخ خليل معوض عثرت على كتاب يضم مجموعة أغانٍ عمرها يزيد على المائة عام لأكتشف بعد قراءتها أنها من نفس موديل ما تقدمه هذه الأيام روبى وبوسى سمير ومروى والست هدى «آه يا ناري» وهدى «حا أركب الحنطور» وهلم جرا «يعنى إيه يا بتوع المجمع اللغوى هلم جرا دى»؟!.. المهم وجدت فى هذه النوعية ألفاظ ومفردات الأغانى القديمة نفسها إذا ما قارنتها بألفاظ ومفردات أغانى هذه الأيام لا فرق وهو ما يثبت أن الأغنية لم تتطور أو ترتقى بمعانيها وإنما مكانك قف وأتدلع!.. نفس الألفاظ المايعة ومفردات المذلة والهوان «دا ما هوش كتير أبداً عاللى فؤادى يريدها.. تعبى وذلى وتضحيتى لأجل أسعده» و«بمبى بمبى بمبى يا واد.. قرب جنبى حبه يا واد.. يا هاجرنى طيفك شاغلني.. وإزاى شاغلنى يا هاجرنى».. مفردات وألفاظ لاتزال مستخدمة وهو ما يثبت كما أسلفنا صدق نظرية الأرض كروية وأيضاً الأغنية كذلك تدور وتلف وتعود بنا للخلف دُر إلى الوراء لتؤكد لنا أن ما يقدم حالياً مشابه تماماً لما كانت تغنيه فاطمة سرى، ونعمات المليجى وفتحية محمود، ومنيرة المهدية، وزكى أفندى مراد، والد المطربة ليلى مراد.. وبعضها من تأليف بديع خيرى ومحمد عبدالمنعم «أبوبثينة» وحسين المانسترلى و«الشيخ» يونس القاضي، مؤلف نشيد بلادى بلادي، والذى عمل فترة من الزمن مديراً عاماً للرقابة على الأغنيات ويا للعجب يونس القاضى مؤلف «بلادى بلادى» هو ذاته مؤلف للأغنية الأبيحة إياها «إرخى الستارة اللى ف ريحنا».. أحسن جيرانا تجرحنا»!.. والأهم خذ العينة التى هى بينة كما يقولون من أغانى زمان لتقارن بينها وبين ما يقدم الآن.

ما كانش والله دا العشم

إشمعنى لما عشقتك تهجر.. وتظهر بغددة

التقل صنعة يا جدع.. وإلا دا من ضمن الدلع

لو كان يومين كان يتبلع.. لكن دا طول عمرك كده

تمشى تطوح فى العصا.. بطل يا سيدى البصبصة

ما دام بقيت لك مخلصة.. دا مين يلاقى العز ده

يا ما قلت لى ليه الصدود.. ومت حسرة ع الخدود

وبعد ما الحبيب يجود.. تهجر وتظهر بغددة

ما كانش والله دا العشم.. أندم ما ينفعش الندم

قلبى معاك داب وأنظلم.. سيبك بقى م العند ده

إن كنت تصفى لى أصفى لك.. وإن كنت حتزيد هجرانك

دا حب غيرى يحلالك.. مكتوب على الغلب ده

بمبي.. بمبي

بمبي.. بمبي.. بمبى يا واد.. قرب جنبى حبه يا واد

يا هجرنى طيفك شاغلني.. وإزاى شاغلنى يا هاجرني

ولما أصالحك تخاصمني.. ولما أخاصمك تصالحني

علشان بأحبك تهجرني.. وإزاى بتهجر ما تزورني

حقك عليَّ وأعذرني.. برضك فى حبك تعذرني

ده شيء غريب

ده شيء غريب يا خويا منك.. أمرك عجيب فضنا منك

ده شيء غريب إزاى تهجر.. ومين بقى يقدر يصبر

ده حبه والله ما كان ع البال.. طبعك كده واللا دا دلال

اسمع بقى وكيد العزال..

درس فى الحب

خد درس منى يا واد فى الحب والبيلباه

إن رحت يوم تصطاد اصطاد غزال تهواه

إن شفته ماشى تقول دمك كازوزة يا سوسو

والقلب بات مشغول وإزاى ياروحى أدوسه

وإن كشرت ولا جتش أعرف ما بتحبكش

ما يفيدش فيها النتش وأبعد دى بتخربش

وإن شفتها تجاريك وسحرتها بنظرة

فى الدرجة دى أديك عشرة على عشرة

خليك جدع ولعه فى الحب يا عزيزي

أطلع بك القلعة وأقول دا تلميذى

ديالوج المظلومين زملا وإخوان

هو: دا ماهوش كتير أبداً عاللى فؤادى يريدها

تعبى وذلى وتضحيتى لأجل أسعده

ونهار ما أشوف إن أيها شر يهددها

والحالة تحوج لضياع الروح أفقدها

هى: مين آسى زيى واتألم

والظلم دا يا سلام سلم

بيربى جداً ويعلم ويخلى الآخرس يتكلم

هو: أنا دقت من قبلك ألوان

وياما شكيت ذل وعدوان

جرحى وجرحك صعب صحيح

والمظلومين صعب صحيح

والمظلومين زملا وإخوان

أحبك بس يا خسارة

أحبك بس يا خسارة ناقص لك لسه زمارة

تلعب بها فى الحارة

دقيقة لو تلاغينى أحسن بقلبى دا مولع

كلامك حلو يروينى لكن عيبك بتتدلع

ساعات ألقاك معذبنى ساعات ألقاك مهنيني

بأحبك بس يا خسارة

أصهين ليه تشكيلى وتوصف كتر أشجانك

تعيط لى وتبكى لى يحن القلب لجنابك

يا دوبك بس تلقانى هويتك دوغرى تنساني

باحبك بس يا خسارة

يوماتى تيجى وتكيل فى قلبك لأ صحيح عيل

باحبك بس يا خسارة عايز لك لسة زمارة

أنا حرة

لسه بره والأدان قرب يدن

عيشة مرة شيء يغيظ جداً جداً

ليلة واحدة معايا لم تباتها فى عمرك

هو أنا يا ضنايا جارية طايعة لأمرك

لأ يا سيدى لأ.. بدك الحق؟!..

يفتح الله معاك أيوه أنا حرة

■■■

هيييه أيام وأغانى يا جدى الشيخ خليل الله لا يرجعها!..