دوامه مدارس ...بلا نهايه

فيه مدارس بقى كل همها تجمع فلوس دون النظر للعمليه التعليميه وبالكتير مركزين فى مرحله كج وبعد كده ربنا ما يوريك على النزول بالمستوى وكأنك نازل ببرشوت ويمكن تقع فجأه.. الواحد مش عارف يعمل ايه وانا مش بتكلم عن مدارس حكوميه لان الايام دى مفيش حد بيشكر فى مستوى المدارس الحكوميه وده لان حتى المدرس ممكن مايكونش متواجد بالحصه وبيكون الاعتماد اساسى على الدروس الخصوصيه لكن المفروض الخاصه مع كل المصاريف اللى بتدفع تكون ممتازه ومنحتاجش لدروس لكن للاسف مش كل الخاصه الا بقى لو كنا بنتكلم على المدارس اللى بمصروفات خياليه بالنسبه للمواطن المصرى اللى عايز يرفع من مستوى اولاده ويقول انا مدخل خاصه وده طبعا فى حدود الامكانيات المتاحه وحتى فى الخاصه دى انت مضطر بعد كده انك تقويه بالدروس وتركز معاه فى كل حاجه والاب يدفع والام تعانى من المذاكره مع الطفل وتحضير الاكل واللبس والتنظيف ومشاكله فى المدرسه وحياته كلها وطفلها التانى اللى عايز نفس العنايه واللى بتبتدى معاه رحله البحث عن المدرسه المناسبه اللى مضطره تختار احسن الوحشين هتعمل ايه!! وفيه ناس يقولو الخاص العربى اسهل وكله محصل بعضه وغيرهم يشكروا فى اللغات ويقولو هى دى المستقبل وبجد خلاص الواحد بقى فى حيره ومش عارف يعمل ايه ويلاقيها منين ولا منين الموضوع بقى دوامه يبداها الاهل اول مايفكروا فى بدايه مرحله التعليم وبجد نفسنا اولادنا يحبوا دراستهم ومدارسهم ويحصلوا على التعليم اللى يليق باحفاد الفراعنه....