اتجاهات

الجمعة:23/9/2011
رشا مجدي: مشاهدينا الكرام مساء الخير وأهلا بكم مع حلقة جديدة من إتجاهات .. في البداية نعتزر عن التأخير بعض الشيئ لظروف خارجة عن إرادة الجميع لكن نحمد الله أننا معكم الآن علي الهواء مباشرةً .. نتحدث الليلة عن قضية أمن قومي .. نتحدث عن التعليم والتي إستطعنا أن نحولها الي قضية هم قومي .. التعليم مشكلة كل بيت .. مصدر هم وقلق لكل أسرة وسبب رئيسي للحال اللي وصلنا إليه من تراجع في المكان والمكانة .. سنوات وسنوات وسنوات والحديث لم ينقطع في عهد كل الحكومات والوزراء وزراء التعليم السابقين عن الإصلاع والتطوير للتعليم الذي لم يتحقق مؤتمرات عقدت مليارات أهدرت هيئات إستحدثت لجان عقدت الجلسات وتقاضي الأعضاء الآلاف والنتيجه لم ينجح أحد لكن أن يبدأ عام دراسي جديد بإضرات بعض معلمي المدارس عن العمل تحت شعار عام دراسي بلا مدرس ديه كارسة .. المعلم هو حجز الزاويه في العملية التعليمية .. قد يكون المدرسون فيه شيئ من الظلم فيما يتعلق برواتبهم حالةم زي حال ناس كتيره موجودة في الدولة .. الدولة وعدت بأنها سوف تعطيهم الحقوق من خلال الكادر المعلمون أوهمونا بأنهم يؤدون واجبهم كنا نتمني أن تكون الإحتجاجات مثلاً علي سوء العمليه التعليمية علي إنتشار الدروس الخصوصية مش بس علي البحث عن مطالب فئويه – كمان إختيار الوقت أن يتم إختيار الوقت والظرف المناسب للتعبير عن الإحتجاج السلمي المعترف به مش إنتهاز بداية العام الدراسي لتفجير مثل تلك القضايا .. مشاهدينا الكرام معنا المسؤول الأول عن التعليم في مصر بعد ثورة 25 يناير في حوار نتمني أن يكون كله صراحة حول كافة القضايا والمشاكل التعليمية المطروحه .. سوف يكون معنا معالي الدكتورأحمد جمال الدين موسي وزير التربية والتعليم ولكن بعد الفاصل
فاصل
علي الشاشه "التعليم بعد الثوره بناء وطن ومطالب معلم "
مدرس : إحنا عايزين حقنا يرجع لنا .. عايز مرتبي يبقي من مدرستي مش مرتبي آخذه من الناس بره هو ده اللي إحنا بندور عليه عايزين كرامه مش عايزين وإحنا قاعدين جوه المدرسة نلاقي ولي أمر جاي يتخانق معانا – بندافع عن حقوقنا وجاي لنا تهديدات إن إحنا لو عملنا إضراب حناخد جزا ثلاثة أيام
مدرس آخر : أنا مدرس بقالي 25 سنة مرتبي يا سيادة الوزير ما وصلش 1000جنيه لحاد النهارده وجاي تقول لي مافيش مجموعه ومافيش درس طيب أنا أعيش منين الكلاف اللي في الجرائد 200% وكادر وكل ده كله اللي بيدفع ثمنه المدرس ما فيش أئ حقوق للمعلم في مصر
مدرسة :المعلم مهان ماديا ومهان معنويا ومهان في مصرومهان صحيا فين بقى المعلم اللي حيدخل يشتغل في الفصل المعلم عشان يدخل يشتغل في الفصل لازم يبقي واكل كويس ولابس كويس الهدمه بتاعته أقل حاجة إن لبسه يبقي لبس محترم واكل كويس يقدر يشرح في الفصل أنا ما أجبش معلم عنده أنيميا ويدخل يتكلم مع الطلبه حيدخل يتكلم مع الطلبه يقول لهم إيه إذا كان هو مش لاقي ياكل هو ولا ولاده إيه ألف جنيه حيعملوا إيه للمعلم وبعد كده جايين يقولوا إحنا حسنا أحوال المعلم مادياً ,, فين مادياً !!!
معلم : عايزين حياه كريمه للمعلم.. حياه يقدر المعلم بواسطتها يقدر يعيش بوسطة يعني شيئ من الكرامه يقدر يعلم في الفصل براحته جداً ليه لإن ما علهوش أي ضغوط يبقي كل توجيهه وتوجهه داخل الحصه بتاعته مش شرح فقط .
رجل : أمناء معامل العلوم دول مهضومين خالص أنا واحد منهم أمناء معامل العلوم أولا بيتعاملوا في كل حاجة فنيين بنعمل زيينا زي المدرس الحمدي " الحالة المالية بنتعامل إداري" رغم إن فيه منشورات إن إحنا نتعامل زي المدرس الفني فبلا شك إحنا طبعا أمناء معامل المفروض ناخد بدل مخاطر عشان الحماض وعشان المعامل والكلام ده كله ما فيش أي حاجة زي كده خالص + إن إحنا بنتعامل في الحالة المالية نفس النظام المرتب الكامل كله وعلي الدرجة الثانيه 500 جنيه وكسور حيعيشوا مين 500 جنيه وكسور معالي الوزير حيمشي بيهم هل فيه أي مسؤول حيمشي بال 500 جنيه .
فاصل
رشا مجدي: معالي الوزير كل سنة وحضرتك طيب بمناسبة بدء العام الدراسي الجديه لكن العام الدراسي السنة ديه بادي بموضوع مش سهل موضوع شائك زي ما شوفنا في التقرير الحالة التعليميه في المدارس لا تطمئن .. هناك مدارس نفذ المعلمون تهديدهم بالإضراب زي ما شوفنا مثلا فيه في محافظة السويس تقريباً ما كنش فيه مدارس مفتوحة حتعمل إيه – حتعمل إيه مع بداية العام الدراسي بهذه المشكلة السعبه
د/ أحمد جمال الدين موسي : كل سنة وحضرتك طيبه وكل المصريين بخير وسعاده وأنا سعيد جداً إن العام الدراسي بدأ رغم الظروف الصعبه بدأ في معظم مدارسنا والإحصائيات اللي جاءت لنا من الساده المحافظين ومن الساده مديري المديريات علي مستوي الجمهوريه بتبين إن النسبة المدارس اللي كان فيها إضراب ولو جزئي ومن بعض المعلمين أو الكلي حسب الأحوال إمبارح كان 6, % إنهارده 2,6% يدل علي إن الغالبيه العظمي من مدارسنا الدراسه بدأت فيها بشكل طيب .. في الواقع عام دراسي جديد معناها عوده الي المدرسة فأنا النهارده كنت مع السيد محافظ القاهره بنزور مدرستين في حدائق القبه وفي مصر الجديدة وفي الواقع أنا قلت للزملاء اللي كانوا معانا والمعلمين والصحفيين إنه العوده للمدرسة لها بهجه غير عاديه كل سنة وأنا أبقي حزين جداً لو معلم حرم نفسه من بهجه العوده للمدرسة أو تلميذ إتحرم من إنه يعود للمدرسة بسعاده وأنا كأستاذ جامعه ومعلم بأدخل المحاضرات الجامعة من غير طلبه مالهاش قيمة المكان قفر لكن لما يبدأ العام الدراسي والطلبه بتوعك موجودين تبدأ الحياه فنفس الشيئ في المدارس الحياه لا تبدأ إلا بالعوده وبوجود تلامذه مع إساتذتهم بالتأكيد الموقف صعب صعب إي يبقي فيه دعوه ودعوه يُستجاب لها بقدر ما من المعلمين ما كنتش أتمني حقيقي إن يكون ده الوسيله للحصول علي حقوقنا كمعلمين فيه وسائل أخري نقدر نستخدمها وإستخدمناها في الماضي ونستخدمها في المستقبل لكن الإضراب عن التدريس ديه مسأله في رأيي إسلوب مش معتاد في العالم كله
رشا مجدي: حضرتك فتحت العصيان المدني ؟
د/ أحمد جمال الدين موسي : لأ يا فندم أنا مش عايز أبالغ في المسائل إطلاقاً أنا عايز أقول إن هو فيه ربما قدر من المعلومات غير الدقيقه ربما فيه نوع من التوجيه الضغط الكثيف
رشا مجدي: يعني مازلت مدي لهم العزر
د/ أحمد جمال الدين موسي : الضغط الكثيف من وسائل الإعلام في هذا الموضوع شجع البعض علي هذا الإتجاه لكن أتمني إن شاء الله بكره بعده الناس تبدأ تعود الي طبيعتها كمعلمين – أنا مش حكاية أدي العزي حكاية أنا مُقدِّر بعض المطالب من حق المعلمين لكن تتم ربما بعضها في المدي المتوسط وبعضها في المدي الطويل وفيه جزء كبير جدا من مطالبهم حاولنا نحققوا في ال6 شهور اللي فاتوا وممكن نعدد هذه الأمور وأعتقد المعلمين الواعيين عارفين إن إحنا بنبذل جهد في هذا الأمر لكن مش ممكن نحقق كل المطالب في يوم واحد
رشا مجدي: حضرتك كان لك تصريح بتصف فيه معظم مطالب المعلمين بأنها مشروعه وتحقيقها معقول لكن في مطالب أخير غير معقوله زي إيه مثلاً
د/ أحمد جمال الدين موسي : حأقول لحضرتك البعض في لحظه من اللحظات طالب بإن إحنا نثبت كل الناس في نفس اللحظه من أول يوم جيت الوزارة قلت لهم يا جماعه مش في نفس اللحظه ما أقدر الأن وفورا وحالا المسألة صعبه جداً مع التعامل مع دوله ومع إجراءات بيروقراطيه فأخذنا الخطوات تدريجياً طلعنا قرار 75 من وزير التعليم وبعد كده عرضنا القرار علي مجلس الوزراء وبعد كده أخذنا موافقه حاليا أكثر من 80 – 85 % نم تثبيتهم من قبل الساده المحافظين والجهاز المركزي للتنظيم والإداره والمالية إذن فكرة الآن وحالاً وفوراً مسألة صعبه جداً في إجراءات حكوميه البعض منهم اللي عمل زعماء اللي بيدعوا للحاجات ديه قالوا إنه عايزين حد أدني 3 آلاف للمعلم
رشا مجدي: 3 آلاف جنيه
د/ أحمد جمال الدين موسي : أو حتي 1200 لما بعضهم تواضع شوية 1200 جنيه أنا رأيي المعلم يستحق أكثر من كده لكن كيف نحقق هذا الأمر في ظل أوضاعنا المالية المسألة مش سهله لإن إحنا في الواقع زي ما قلت قبل كده إحنا عندنا عجز كبير في الميزانيه وإن وزارة المالية عندها صعوبه في الوقت الراهن في الشهور – في الشهر الحالي إنها تدبر هذا الأمر لكن في المستقبل من حقنا إن إحنا نطالب بهذا الأمر وان إحنا نسعي إليه وفيه إجراءات حناخدها في هذا المجال ، فيه بقي معلومات مغلوطه إن المعلمين هم الوحيدين في الدولة اللي ما أخذوش ال 200 % دا كلام غير حقيقي ال 200% مش إضافه للمرتب ديه عباره عن رفع الحد الأدني للأجور القانون بيقول إن الشخص في الدولة الموظف أياً ما كان معلم أو غير معلم اللي إجمالي حوافزه ومكافآته وبدلاته أقل من 200% نرفعها لتصبح 200% من الأجر الأساسي .. إحنا في الكادر معظم المعلمين فوق ال200 % كان فئه واحده اللي هي المعلم المساعد 160% فقدرنا نرفع كله ووصلنا الي إن المعلم المساعد اللي هو أقل واحد 235% وأعلي واحد اللي هو كبير المعلمين 335% وفي النصف يتراوح الأمر بين الفئتين دول فأنا عايز أقول في النهايه إن المشكلة في 200%
رشا مجدي: دا غير الكادر غير حدوتة الكادر
د/ أحمد جمال الدين موسي : لأ الكادر يا فندم هو عباره عن نظام جديد للمعلمين يمكن فيه لبس كبير جداً بالنسبه للكادر
رشا مجدي: يعني حأقول لحضرتك حاجة الكادر مثلا أنا عندي هنا مثلاً المعلمين بيقولوا إن هم إتخدعوا في موضوع الكادر إن كان فيه وعد بزيادة المرتب 100% كانت الزيادة 25% فقط
د/ أحمد جمال الدين موسي : حأقول لحضرتك بس كلمة كادر نفسها واضح إن فيها لبس كبير جداً إيه هو الكادر هوعباره عن قانون بينظم الأوضاع الوظيفيه للمعلمين مختلف عن القانون العام لبقية موظفي الدولة إحنا عندنا قانون 47 دا بينظم كل أحوال موظفي الدولة اللي كان المعلمين فيه زمان ثم إنتقلوا من 2007 الي القانون الجديد اللي هو القانون 155 بينظم أمورهم إذن مش ممكن نجمع بين الإثنين من الناحيه القانونيه يعني أي حد القانون يقول لك ما أقدرش أكون موظف وأنا علي وضعين في وقت واحد أنا دخلت وضع جديد - المعلمين حاسين ببعض الظلم ومعاهم حق في ديه وأنا قلت أكثر من مره ما كنتش أعرف الحكايه ديه لإن لما رجعت الوزارة المعلمين حييوني وبعدين سألوني في هذا الأمر لإن كان لهم أقدميات في ظل القانون 47 لما إتنقلوا للقانون 155 فقدوا هذه الأقدميات النهارده وأنا كنت في المدرسة أحد المعلمين قال لي أنا معلم أول بقالي أكثر من 10 سنين قلت له إزاي بقالك أكثر من 10 سنين قال لي أنا قعدت لما كنت علي الدرجة الثانيه وفضلت فيها لي أقدميه فيها حوالي 7-8-9 سنين ولما رجعت دلوقت بقي 3 سنين أنا مظلوم في الترقيات وفاضل لي 5 سنين علي المعاش معاه حق قلت له إنت قدمت عشان الترقيه قال لي ل ما قدمتش لإن في الإداره التعليميه قالوا لي إن ما لكش حق إنت ما كملتش 5 سنين دا خطأ جسيم إحنا قلنا العكس حنضم الأقدميات السابقى فالمعلم من حقه يقدم وأول فئه يعني أكثر من 10 سنين فإحنا بنحاول نوصل المعلومات الإداره التعليميه تحاول تفهِّم المعلمين إن دا حقهم النهارده فنحاول نرد لهم هذا الحق المسلوب .. مسألة إن إحنا زدنا 25% أو 75 % مش 200% هنا فيه لبس كبير موجود إحنا في الواقع لما لقينا إن المعلمين بتوعنا حيبقوا معظمهم مش مستفدين من ال200% لأنهم وزارة المالية حسبت لهم اللي بيخدوه وجهاز الجدول إحنا طرحناه علي الصحافه من وزارة المالية حافز إثابه كذا بدل كذا جمعتهم فلقينا زي ما قلت لحضرتك 160% للمعلم المساعد تصل الي أعلم من ذلك لبقية المعلمين فأنا عرضت الأمن من أول يوم من قبل ما حد يفوق خالص من أيام الدكتور سمير رضوان في وزارة المالية قلت لهم إن إحنا يا جماعه لا يمكن نقبل هذا حنا كده حنساوي الناس كلها بالمعلمين – المعلمين كانوا سبقوا الناس في إطار الكادر في إطار قانون 155 المساواه فيها نوع من العدل لكن ضرر للمعلمين في نفس الوقت وإتفقنا إن إحنا في الأول حاولنا نطلع مكافأة الإمتحان اللي هي 5% في الأجر الأساسي بره الحساب للأسف النتيجة تمت في إدارة المالية ما قدرناش نصل لهذا الهدف وعندهم مبرراتهم وأسبابهم اللي إحنا حتي الآن ما قلتش إن أنا مقتنع بها لكن في كل حال سمعتها تفهمتها فالبديل اللي إحنا طرحناه واللي وصلنا به مع وزارة المالية إن إحنا نعوض المعلمين فنعوضهم إزاي إن إحنا رئيس الوزراء يطلع حافز جديد يضاف لحوافز المعلمين يبدأ بنسبة 75% للمعلم المساعد اللي هو أكثر الناس ضرراً في الوضع الجديد وبعد كده 50% للمعلم وبعد كده 25% الفئات الثانيه – الفئات الثانيه كلها إستفادة في الحقيقة ما كنتش حتاخد حاجة حتي لو كنا شلنا مكافأة الإمتحان لإنها زي ما بأقول لحضرتك بعضهم وصل 335 % وعندهم 310% فإحنا حاليا في وضع ليس مثالياً لكن أفضل مما كان لو تركنا الأمر علي حالة
رشا مجدي: دكتور أحمد من حديث حضرتك أنا أستشعرت أنك متفهِّم وقريب من المعلمين وقريب من مشاكلهم يعني الإضراب اللي عملوه كان قبل العام الدراسي اللي هو كان تقريبا من إسبوعين ليه ما كنش فيه حوار بينكوا وبينهم تفهمهم الوضع كده وأنا بأحاول أعمل كده ووصلت لكده يعني ليه ما حصلش هذا الحوار
د/ أحمد جمال الدين موسي : الحوار تم يافندم مبكراً جداً قبل كده بمراحل لما جم بعض السادة المعلمين بيتظاهروا قدام الوزارة قلنا لهم من أول لحظه هاتوا مجموعه نناقشها ونوضح لها المسألة أخذوا 4-5 ساعات والآخر إختاروا مجموعه منهم معظمهم من نقابة العمال المستقلة اللي هي النقابة العمالية الخاصة بالمعلمين اللي طالعه في إطار قانون العمل نفسه وليس في إطار النقابات المهنية وقعدت معاهم وهم الناس دول اللي بيقودوا الحركة الإحتياجية حالياً وشرحت لهم وكلهم كانوا مقتنعين إحنا عملنا جهد كبير جداً وقالوا ساعتها ياريت تبلغوا الناس ديه بشكل أكبر للمواطنين من خلال وسائل الإعلام قلنا لهم حنحاول إن شاء اللي بعد كده جم إتجاهات أخري سياسيه مختلفه روابط المعلمين معلموا الإخوان وغيرهم وطلبوا يقابلونا قابلناهم وشرحنا لهم نفس الأمر فإحنا لم نمتنع إطلاقاً عن الحوار هدفنا إنه يصل الحقيقة لمعظم معلمينا في كل الجمهوريه للأسف ما بتوصلش الحقيقة لإن فيه
رشا مجدي: فيه حد بيحركهم يعني فيه حد بيقوم الموضوع كل ما يهدي أو كل ما تصل لنقطة تفاهم
د/ أحمد جمال الدين موسي : فيه مجموعة طبعا بتنشط علي كده الأهم من كده إنه للأسف من خلال وسائل الإعلام ما قدرناش نوصل هذه المعلومات فإضطرينا نطلع كتيب يتضمن تفاصيل هذه الأموروتم توزيعه أرجو يكون وصل لمعظم معلمينا يشرح إيه اللي عملناه إحنا عاوزين اللي عملناه خطوه في سبيل حصول المعلمين علي حقوق أنا أراها إنها من حقهم لكن حتحتاج المسألة وقت وحتحتاج قدر من التفهُّم
رشا مجدي: برضة هسأل حضرتك إن المعلمين المضربين عن العمل لهم تقريبا 14 مطلب من أول مطلب بنلاقيه إقالة وزير التربية والتعليم طالما أنا حاسة إن وزيرالتربية والتعليم اللي قاعد قدامي متفهم لكل المشاكل مقتنع محتاج بس بعض الوقت حتي يصل بالمعلم الي مستوي يرضي عنه الجميع ليه طالبين إقالتك
د/ أحمد جمال الدين موسي : شوفي حأقول لحضرتك تاريخي مع التربية والتعليم نوع من التفهم الكامل
رشا مجدي: أنا بأتكلم علي وزير من 2004
د/ أحمد جمال الدين موسي : نوع من التفهم الكامل ونوع من الإرتباط الروحي ما بين المعلمين فكرة الكادر نفسها هي فكرة هي فكرة نقل المعلمين من وضع قانوني زي أي موظف في الدولة الي وضع مميز وأنا قلت المعلم زي أستاذ الجامعة يجب يعامل نفس المعاملة فالشخص اللي يعمل كده شخص مرتبط معنويا ونفسيا بالمعلمين اللي حصل ان القانون لما إتحط – إتحط بطريقه أنا رأيي ما كنتش مثالية لو أنا كنت موجود مؤكد الأمر كان حيبقي مختلف شوية وده نحاول نعالجه في الفترة القادمه البعض اللي بطالب بإقالتي زي ما حضرتك بتقولي هو من حقه وأنا متفهم هذا ديمقراطياً من حق كل إنسان يقول اللي هو عايزة وأنا أتقبل هذا والإقاله لا تزعجني علي الإطلاق وقلت الكلام ده أكثر من مره في وسائل الإعلام بالعكس أنا بأدي واجب وطني بقدر الإمكان بأجتهد فيه لكن إن أنا أسيب هذا العمل حأكون في غاية السعاده زي ما سبته قبل كده زي ما كنت قبل كده لما سبته كنت في غاية السعاده بس إتظلمت ما كنش ده شعوري كان شعوري إن أنا أديت واجبي فترة معينه إنتهي التكليف وأنا رجعت لحياة أخري بأجد متعة فيها فده لا يقلقني لكن أنا أعتقد هم بيركزوا علي هذا الأمر لسببين ربما دا إجتهاد منِّي أو شيئ لما كانوا بيبعتوا مطالبهم من غير قيادة الوزير ما كنش حد بينشر حاجة وصفحة داخلية وبعض الصحف تنشر وبعض الصحف ما تنشرش لما كتبوا إقالة الوزير أول طلب بقي صفحه أولي في معظم الجرائد فده طبعا بالنسبه لهم مهم جداً إنه يصل للإعلام من خلال كلمه كبيرة إقامة وزير التربية والتعليم ربما يكون دا سبب – السبب الثاني إن هذه المجموعة تري إن العلاقه الطيبة بيني وبين جموع المعلمين لا تخدم مصالحها الإنتخابية أو النقابية أو السياسية هم بيهمهم ما يكنش واحد بالشكل ده في الوزارة دا تفسيري ربما يكون تفسير خاطئ لكن أتوقع التركيز من قبل هذه الفئة القليلة علي هذا المطلب اللي ما لوش صله لمطالب المعلمين لإن في كل الأحوال هل الوزير قصر في مطالب المعلمين نقدر نحسبها إيه التقصير اللي حصل منه وبالتالي نقول إنه قصَّرأو لم يقصِّر
رشا مجدي: معالي الوزيرعايزة صراحة منك في السؤال ده ؟
د/ أحمد جمال الدين موسي : أكثر من كده ههههه
رشا مجدي: آه أكثر من كده نظام الكادر اللي قعدنا نهلل له بقالنا شوية ده هل بتعتبر إنه فشل ؟
د/ أحمد جمال الدين موسي : لأ إطلاقاً أنا حاسس فيه مزايا كبيرة جداً للمعلمين البعض مش مدركها لكن فيه طبعا تطبيق سيئ
رشا مجدي: تطبيق نظام الكادر كان سيئاً
د/ أحمد جمال الدين موسي :الصياغة نفسها برضة فيها عيوب لكن التطبيق هو أخطر ما في الامر إنه حرم المعلمين من أكبر مزايا فيها الي حد كبير مش كلهم حأديكي مثل إحنا عندنا الموظف في الدولة لو كان التربية والتعليم فضلوا علي قانون 47 كام واحد من المعلمين حيصل الي درجة وكيل وزارة أو مدير عام
رشا مجدي: كتير
د/ أحمد جمال الدين موسي : مش كتيرلو فضلنا علي النظام القديم
رشا مجدي: ليه آه أنا إفتكرت 47
د/ أحمد جمال الدين موسي : كل مديرية – اللي هو 47 – كل مديرية حيبقي فيها واحد وكيل وزارة كل مديريه حيبيق فيه 2-3-4 مديرين عموم النهارده كل معلم حتي لو داخل فصل بتباشيره معلم إبتدائي إعدادي سنوي حيصل لدرجة وكيل وزارة اللي هي درجة كبير معلمين إذن هنا نقله كبيرة جداً زي أستاذ الجامعة كل أستاذ جامعه بدرجة وكيل وزارة كل مستشار بدرجة وكيل وزارة الصغير حتي اللي لسه معاه مستشار فعايزة أقول نفس الشيئ للمعلم ديه ميزة كبيرة جداً خدناها للمعلمين أصبحوا بيعاملوا ومن حق كل واحد فيهم حتي لو بقي في الفصل إنه يصل الي أعلي درجة في الدولة المرالثاني أيضاً إن مدة الترقيه ما بين درجة و درجة في إطار القانون 155 قانون الكادر 5 سنين في القانون 47 تصل الي 7-8-9 -10 رسوب وظيفي المفروض ما فيش رسوب وظيفي في إطار القانون 155 ديه مزايا لم نشعر بها كمعلمين بشكل كافي لسبب بسيط جداً هوإنه للأسف أهدرت الأقدميات فالناس حست إنها إتأخرت وده حنعالجه ولذلك أنا بأقول إن إحنا نركز الفترة اللي جايه أرجو المعلمين نساعد بعض إن إحنا نركز علي مهمه أنا أخذتها علي عاتقي هو مهمة صعبة لغاية إننا نرقي 600 ألف واحد من هنا لآخر السنة نحسن نظامه فيه ناس بقالهم أكثر من 10 سنين و8 سنين و7 سنين و6 سنين و5 سنين يستحقوا الترقيه إذا تم هذا الكلام مش بس حيحقق تحسن للمعلمين معنوي للمعلمين إنه ترقي لدرجة أعلي ستحقها لكن كل زيادة معناها 25% زيادة أيضاً في دخله مش 6 جنيه زي ما البعض بيكتب مش فاهمين المسألة هنا 25% من الدخل للدرجة الأعلي حياخذه مقابل الترقية وده أنا مش محتاج موافقة وزارة المالية فيها لإن دا بقوة القانون متي أصدر وزير التربية والتعليم قرار بالترقية المعلم حيستفيد من هذا الأمر فإحنا دا مهمتنا الحقيقية اللي إحنا يجب نبذل فيها جهد لو بندورعلي صالح المعلمين كما يجب
رشا مجدي: معالي الوزيرما فيش مجانية حقيقية في التعليم خلينا واضحين هي مجرد مسمي إن هناك مجانية واللي تبقي منها يتآكل والشعار اللي إحنا كنا ماشيين بيه التعليم كالماء والهواء ما بقاش موجود الكلام ده
د/ أحمد جمال الدين موسي : أنا حأقول لحضرتك إنت بتتكلمي علي الدروس الخصوصية ربما مش كده
رشا مجدي: أيو أنا عايزة أدخل للمدخل ده
د/ أحمد جمال الدين موسي : ده سؤال حضرتك .. أنا عايزأقول ده مش صح ما فيش مجانية للتعليم – التعليم في مصرمازال حتي الآن علي الأقل من ناحية الرسوم مجاني أو شبه مجاني لمعظم الناس لإن المدارس بتاخد 30 جنيه 40 جنيه مبلغ طبعا لسه ما زودناش ولا مليم حاجة للمساعده في تطوير المدرسة داخليا لإن كلها رسوم لصالح المدرسة نفسها تبقي داخل المدرسة
رشا مجدي: بس في المقابل بيدفعوا قد إيد للدروس الخصوصية
د/ أحمد جمال الدين موسي : الدروس الخصوصية ظاهره سلبية جداً مش في كل مراحل التعليم بنفس الكثافة ومش في كل مدارسنا بنفس الكثافة لكن إحنا إزَّاي نقضي علي الدروس الخصوصية أنا رأيي إن إحنا لازم نعمل حاجات كتيرة جداً الكلام ده قلناه قبل كده وبأحاول إن إحنا نشتغل فيه لكن المسألة مش حتتم برضة في وقت قصيرعايزة جهد أكبرأول مشكلة نظام التعليم نفسه لو نظام التعليم بيركز علي التلقيم والحفظ والإمتحان التحريري بالتأكيد حيكون عندنا بإستمرار ميل إن حد يحفظ التلميذ المعلومات ويدخل الإمتحان
رشا مجدي: طريقة التلقين اللي إحنا ماشيين بيها آه
د/ أحمد جمال الدين موسي : إحنا السنة دية غيرنا بشكل مميز جداً نظام التقويم الشامل اللي بيطبق في المرحلة الابتدائية والمرحلة الاعدادية وأصبح بيعتمد أكثر علي تكوين المهارات يعني علي سبيل المثال قلنا كل سنة حيبقي فيه أربع أنشطة موجودة الطالب حياخد 2 إجباري و2 إختياري في المرحلة الابتدائية قلنا التربية الفنيه والتربية الرياضيه إجباري وبعدين في المرحلة الاعدادية قلنا التربية الفنية والحاسب الآلي إجباري
رشا مجدي: المدارس فيها كمبيوترات يا فندم
د/ أحمد جمال الدين موسي : فيها كمبيوترات مش كلها تأخذ القدر لكن فيها حسب المدارس برضة النهارده كنت
رشا مجدي: شغَّاله ؟
د/ أحمد جمال الدين موسي : برضة النهارده كنت في المدرسة وسألت السؤال اللي سألتيه لما شوفت كمبيوتر قلت لهم ده شغَّال ولا مش شغَّال نفس السؤال اللي حضرتك سألتيه .. فأنا عايز أقول في النهايه الطالب بعد كده عنده 8 أنشطة يختار منها 2 أنشطة جديدة ما كنتش موجودة في مدارسنا يعني عايزين مثال البعض بيقول إن بعض مدارسنا مافيش فيها مكان لممارسة الأنشطة – وارد إن بعض المدارس ما فيش فيها فقلنا حتي خدمة المجتمع يعتبر رشاق وده موجود في الخارج الهوم سيرفز بتاع نشاط مهم جدا الطالب يتعلم يخدم مدرسته يخدم الحي يخدم القريه اللي هو موجود فيها ويجازي وهذه الدرجات اللي يأخذها علي الأنشطة تبقي ضمن المجموع فأنا في الحقيقة أصريت رغم إن كان فيه مقاومة في الوزارة من بعض الناس في حكاية دخول المجموع قلت لهم لابد إن إحنا نغير مفاهيمنا المدرسة مش لتلقين الطلبة المعلومات
رشا مجدي: دا حيطبق السنة ديه
د/ أحمد جمال الدين موسي : السنة ديه يا فندم طلع قرار وزاري ووصل المدارس وحنبدأ ندرب المعلمين بشكل كثيف الفترة اللي جاية إن شاء الله عليه .. الأمر الثاني إن كان فيه حاجة إسمها ملف الإنجاز دا كان عامل مشكلة في نظام التقييم الشامل لإنه عبء كبير جداً علي المدرس خاصةً إذا كان عنده عدد كبير من التلامذة في الفصل وعبء علي ولي الأمر لإنه بيضطر يساعد إبنه فإحنا قلنا الكلام ده مش ضروري فشلنا لغينا ملف الإنجاز وقلنا مكانه يبقي فيه تقييم يتم تقييم الأنشطة كما مش هيتم من قبل المدرس حيتم من لجنه ثلاثيه عشان نضمن الحيده في إعطاء الدرجات ومايبقاش المدرس متحكم فيها كل التحكم الأنشطة تشمل المسرح تشمر الإذاعه المدرسيه الصحافه المدرسيه تشمل البحوث في المكتبه يعني أنا مش متذكر كل العشر أنشطة لكن نقله كبيرة جداً
رشا مجدي: بس حضرتك نسيناها ما بقتش موجودة في المدارس
د/ أحمد جمال الدين موسي : ما هو ده عايزين نرجعها – نرجعها ونضع في زهن التلميذ وفي زهن ولي الأمر وزهن المدرس إن ده إن ده جزء من عملية التعلم - التعلم مش بس أعرف معلومات – المعلومات النهارده موجودة حضرتك عارفة كويس إن من خلال الإنترنت تصلي لأي معلومة في ثانية واحدة علي العالم إذن إن أنا أحصل علي كم من المعلومات أحفظه وآخر السنة أكتبه في كراسة الإجابة ما لوش قيمة القيمة الحقيقية إن أنا أتعلم مهارات إن أنا أفكر كويس إن أنا أحلل كويس إن أنا أنتقد إن أنا أعبرعن نفسي بشجاعة إن أنا أمارس نشاط مفيد فده اللي إحنا بنحاول نعمله في هذا النظام الجديد أرجو إن شاء الله إنه في التطبيق يكون علي نفس المستوي الصياغة وده عايزجهد سواء معلمين أو إدارات تعليمية أو موجهين أو حتي وزارة التربية والتعليم وده أنا أعتقد يكون نقلة كبيرة جداً الميزة فيه إنه حيقلل من أهمية الدروس الخصوصية في هذا المجال
رشا مجدي: ما أنا بأقول لحضرتك لإن الحالة الأمنية طبعا مخوفة الأهالي كتير شوية عندهم تخوف إن الولاد يروحوا المدرسة في نفس الوقت مع إضراب بعض المعلمين وبداية العام الدراسي بالشكل دا فالناس قالت لك إيه لأ السنة ديه حنديها دروس خصوصية بقى يعني حيبقي الرواج أكثر يعني
د/ أحمد جمال الدين موسي : دا مش حل يافندم لإن أنا لو عندي
رشا مجدي: أنا بأقول لك تخوف الأهالي ما هو ده اللي حاصل
د/ أحمد جمال الدين موسي : أنا كولي أمر لو عندي إبني أو بنتي في سن التعلم وحرمته من المدرسة وإديته لمدرس يحفظه حاجات مالهاش قيمة إبني مش حيتعلم حاجة إبني في لقاؤه مع أقرانه في المدرسة مع التلامذة اللي من سنة مع الخبره اللي حياخدها مع التعامل مع المعلمين مع اللقاء داخل الفصل مع الأنشطة اللي حيمارسها هو ده التعلم إنما حفظ المعلومه لا يمثل شيئ ولا يضيف لإبني شيئ اللي عايز أقوله كمان في نظام التقويم الشامل الجديد إنه الدرجة مش كلها إمتحان تحريري في نهاية الفصل الدراسي الدرجة عليها 50% في المادة العلمية يعني اللغة العربية أو الإنجليزية أو الحساب أو العلوم يبقي 50% علي آخر الفصل الدراسي 20% علي منتصف الفصل الميت ترم وعندنا بعد كده 30 درجة موزعه الحضور والإنصراف والسلوك
رشا مجدي: زي النظام الأميركاً
د/ أحمد جمال الدين موسي : زي النظام الأجنبي بالظبط وجزء تاني علي المناقشات وجزء تاني علي البحوث إذن الهدف كله نحن نغير مفهومنا للتعليم من تلقين حفظ الي ممارسة حقيقية للتعلم النشط خلال المدرسة دا في إعتقادي في هذين المرحلتين الابتدائية والاعدادية حيقلل الحاجة للدروس الخصوصية بشكل واضح جداً تبقي بقى مشكلة المرحلة الثانوية وديه مشكلة ثانية المرحلة الثانوية محتاجه تطويركبير جداً وإحنا بدأنا يمكن نتكلم فيه بعد شوية لو حضرتك حبيتي
رشا مجدي: طبعا حنيجي عليها يعني
د/ أحمد جمال الدين موسي : عن مدرسة المتفوقين ودورها في إنها تعطي لنا نموذج
رشا مجدي: حضرتك أفتتحت النهارده أول مدرسة للمتفوقين
د/ أحمد جمال الدين موسي : أفتتحناها إمبارح يا فندم
رشا مجدي: إمبارح مع محافظ القاهرة كان مع حضرتك
د/ أحمد جمال الدين موسي : لأ إمبارح – محافظة القاهرة النهارده في المدرسة – مدارس ثانيه لكن
رشا مجدي: هي المدرسة للمتفوقين في العلوم والتكنولوجيا من سن كان تقريبا ؟
د/ أحمد جمال الدين موسي : المرحلة الثانوية إحنا السنة دية عملنا إيه المدرسة ديه موجودة بدأت تظهر في الخارج في أمريكا بالذات ولها دور كبير جداً في تطوير التعليم هناك وقلنا مصرلابد إنها تمشي مع العالم في نفس المستوي حتي العدد القليل للمدارس في البداية وأمريكا حتي عدد قليل وبعد كده تبدأ تنتشر تدريجياً إزاي ناخد الطلاب المتفوقين قلنا لازم يكون معيار موضوعي فإيه المعيار الموضوعي إن إحنا نختار الطلبه بناءاً علي تفوقهم في المرحلة الاعدادية فقلنا علي مستوي المحافظات كلها علي مستوي الجمهورية الطالب اللي من 98 % بأكثر من حقهم يتقدموا الي هذه المدرسة
رشا مجدي: في ثالثة إعدادي ؟
د/ أحمد جمال الدين موسي : في الشهادة الاعدادية وأعلنا الكلام ده علي موقع الوزارة وفي بعض الصحف وبعدين فوجئنا الحقيقة من 2000 تلميذ علي مستوي الجمهوريه قدم تقريبا 1200 ودخل الإمتحان 1008 تم دخول ال1008 الإمتحان مشكل من 3 أقسام قسم متعلق بمعرفتهم وقدرتهم في العلوم آخر في الرياضيات والثالث في إمتحان الزكاء الأي كيو ونتيجة الأمر ده تم ترتيب الطالب من 1 حتي 1000 وأول 150 أعلاهم أصبحوا الدفعه الأولي من هذه المدرسة – المدرسة مجهزة علي أحدث تجهيز في العالم من ناحية تكنولوجيا المعلومات كل طالب معاه اللاب توب أو الحاسب بتاعه كل مفصل مجهز بالسبورة الذكية التفاعلية بأجهزة الكمبيوتر – معامل علي أحدث ما يكون ونعتقد هذا النوع من المدارس أهم شيئ فيه المعامل ولذلك عندنا 12 معمل منفصل عن المدرسة جنب المدرسة في موقعها في القرية الكونية أو الجهة الكونية فيه معامل إن شاء الله جهزت وأخري تجهز بعضها حاجات في الفلك بعضها الإنسان الآلي ؤ عاجت في الإنسان الآلي
رشا مجدي: بس هي عايزة مستوي معين في الطلبه
د/ أحمد جمال الدين موسي : الطلبه الأذكيه خدناهم دا معيار موضوعي لكن الطلبه حتي المخترعين بس كان فيه حالة صغيره في التليفزيون قال إن هو متميز جداً وعمل براءة إختراع في أكاديمية البحث العلمي وجاب 92 % مش 98 فقلنا لو كان الكلام ده صح نستثنيه وفعلا لقيناه صح وإستثنيناه ودخل من ضمن التلامذة دول فإحنا بنرحب بالمخترعين اللي عندهم القدرة ديه – المدرسة حتشتغل بالتعاون مع الجامعة ما ينفعش مدرسة تشتغل لوحدها لإن نظام التعلم مختلف قائم علي حل المشاكل علي عمل مشروعات وإحنا عندنا إتفاقيه مع الدكتور زويل مع الجامعة الأمريكيه مع الجامعة البريطانيه مع الجامعة الألمانيه مع أكاديمية البحث العلمي مع جامعة القاهره هدفنا إن إحنا فعلاً نخلي هذه المدرسة نموذج يحتذي فيه بقية مدارسنا وننشرهذا النوع من المدار س تدريجياً إن شاء الله السنة اللي جايه فيه مدرسة للبنات في زهراء المعادي وفي إسكندرية أرجو بعدها في الصعيد وفي بحري وهكذا تنتشر إن شاء الله
رشا مجدي: معالي الوزير هذا الكلام حيجرنا إنه التعاون ما بين وزارة التربية والتعليم والتعليم العالي وهذا النظام الجديد يمكن ولادنا في الثانوية العامة في صراع أزلي طول الوقت بسبب إن كل وزيربييجي بسياستة بيجي بنظامه وبيحصل تغيير وتبديل كل شوية
د/ أحمد جمال الدين موسي : أنا أقول لك العكس أنا رأيي الشخصي عكس الكلام ده نظام الثانوية العامة عتيق جداً النهارده بقاله أكثر من20 سنة ولازم يتغير وعدم تغييره مشكلة كبيرة جداً في مصر لإن إحنا نظامنا مختلف عن الدول الأخري حتي الدول العربية اللي جنبنا يعني عكس الكلام اللي حضرتك بتقوليه لإن إحنا نظامنا بقاله 20 سنة والنظام ده ما ينفعش ما يصحش يقعد 20 سنة كان لازم يتطور من زمان العالم كلت تطور حوالينا المطلوب حالياً هو تطوير هذا النظام وليس إبقاؤه يعني تسجيله 20 سنة
رشا مجدي: لأ تطويره بس يبقي سياسة أوإستيراتيجية تنتهجها وزارة التربية والتعليم مش بوزيرجيه فعمل السياسة ديه ووزير ثاني حييجي حيعمل سياسة ثانيه دا اللي أقصده
د/ أحمد جمال الدين موسي : ديه من ضمن الأقوال الشائعة الحقيقية يعني أنا بأتكلم عن نظام الثانوية العامة ما إتغيرش إطلاقاً علي مدي 20 سنة وفيه 4 وزراء إتغيروا أو 5وزراء اتغيروا طيب ياريت كان إتغيرأنا كنت أتمني إنه يكون تطورمن يومها بدل ما إحنا واقعين حالياً في إعتقادي النظام ده نظام عتيق وغير مقبول لإنه بيركزعلي نفس القيم اللي فيها دروس خصوصية إن الطالب بيعرف معرومات وفي الآخر السنة يمتحن الثانوية العامة ويسمع هذه المعلومات فدخلين في مأزق في عنق زجاجه فأنا متصور إن ده حيبقي مهم جداً إن إحنا نطورالأمر اللي يحل مشكلة الدروس الخصوصية وأنا بأقول الكلام ده من أكثر من 7-8 سنين بدأ يهتم بالتعليم قبل الجامعي وأكتب فيه إن لابد إن إحنا ننشيئ جامعات تكنولوجيه عدد الجامعات في مصر غير كافي وفيه عنق زجاجه عندنا السنة ديه كان حوالي 400 ألف طالب في ثالثة ثانوي عايزين يخشوا الجامعة الأماكن في الجامعة قليله خصوصاً كليات القمة اللي الناس عايزاها كلها فإحنا لابد إن إحنا ننشيئ كليات تكنولوجية تركز علي تكوين مهارات يحتاجها سوق العمل في مصر
رشا مجدي: بمناسبة سوق العمل التعليم الفني ديه مشكلة من المشاكل الصعبه جداً في وزارة التربية والتعليم يعني لا هو تطور ولا هو بيخرج ناس ممكن نقول إن سوق العمل بيحتاجهم ولا هو المستوي اللي موجود يسمح إنه حتي نقول عليه مثلاً إنه فني شاطر
د/ أحمد جمال الدين موسي : أنا متفق معاكي إن التعليم الفني مشكلة حقيقية بالنسبة لنا لإن فيه 2 مليون تلميذ والمهارات بتاعتهم أقل مما يجب والمدارس ظروفها صعبة بعضها مجهز وبعضها تجهيزه أقل وبعضها معلمين متدربين كويس وبعضهم تدريبهم أقل وبالتالي مهاراتهم فعلاً لا تتناسب مع إحتياجات سوق العمل كما يجب .. العدد كبير ثلثين الطلبة في المرحلة الثانوية حقيقي تقريبا في التعليم الفني والثلث بس بيروح ثانوي عام بس كده الثانوي العام إذا كان الثانوي العام هم الثلث فما بالك بالثلثين الموجودين في التعليم الفني عشان كده كلفت رئيس قطاع التعليم الفني وهو أستاذ في هندسة إنه يعمل إستيراتيجية نفكر فيها مع بعض مع المجتمع إزَّاي نطورهذا التعليم بشكل واضح خلال الفترة القادمة وقلت لهم ما تكفيش إستيراتيجية نظرية إحنا مش من الناس بتوع نظريات عايزين برنامج تنفيذي كأنك في شركة بالظبط ومطالب ببرنامج تنفيذي فأنا حأعمل برنامج تنفيذي مشكلة التمويل محتاجين عدة مليارات قدرنا ندبر يمكن حوالي 2 مليار دلوقت من المساعدات الدوليه ومن وزيرالدولة وإن شاء الله حنناقشها مع رجال الصناعة مع أساتذة من الجامعات خلال الإسبوعين اللي جايين دا تخطيطنا بعد الزحمة اللي كنا فيها حنفوق إن شاء إن إحنا نناقش لازم نطور التعليم الفني فيه تجارب كويسه في التعليم الفني بس محدوده زي التعليم المذدوج لكن مازلنا عددهم الطلبه اللي بيخشوا التعليم المزدوج قليل بالنسبة للكتلة الرئيسيه إحنا عندنا مشكلة ثانيه أنا فوجئت بيها أنا حأكون صريح معاكي عندنا حاجة إسمها فصول الخدمات .. إيه فصول الخدمات ديه ؟.. إنت عارفة حضرتك السنة اللي فاتت كان فيه ظهر فيديو كليب كده إن فيه طلبة بتغش في حاجة وبتاع فقلنا نتحري إيه الطلبة اللي بتغش كان بعد الثانوية العامة فتبين دول طلبه فيه حاجة إسمها فصول خدمات إيه فصول الخدمات قال لك الإتحاد الإشتراكي زمان أنشأ فصول ليلية الطالب يروح فيها وديه لا هي تعليم فني ولا هي بره التعليم الفني فيه إشراف ضعيف للوزارة عليها فعندنا مشكلة متعلقة بآلاف طلبة لا بيخدوا تعليم ولا بيتعلموا حاجة
رشا مجدي: مجرد إنه بياخد شهادة وخلاص
د/ أحمد جمال الدين موسي : وضعهم القانوني حتي غير سليم وأنا بأستعجب فإحنا دلوقت بنحاول نحل هذه المشكلة عندي مشكلة – عندي مشكلة حقيقية هم تعليم تجاري لو رجعناهم تاني حنزود عدد التلامذة في التعليم التجاري
رشا مجدي: هو التجاري أكثرهم صعوبة يعني أكثر من الصناعي والزراعي أعتقد
د/ أحمد جمال الدين موسي : صعوبة من ناحية الوضع السيئ
رشا مجدي: الوضع السيئ يعني التجاري أكثرهم صعوبة
د/ أحمد جمال الدين موسي : ودول أصعب كمان فصول الخدمات التدريس الرقابة الإداره موضوع سيئ جداً ولازم نحله ولذلك بنفكر الإسبوع ده بشكل جدي إزَّاي نحل هذه المشكلة هل نحولهم الي مدارس تجارية هل نبقيهم كما هم مع إنه تعليم سيئ جداً ما أقدرش أتحمل ضميري ما يستحملش إن أنا أستحملهم طيب حنعمل إيه بيدفعوا مصاريف هل حيدفعوا ويستمروا ديه مسائل بندرسها هذا الإسبوع
رشا مجدي: أنا فاضلي ثلاث دقائق وعايزة أسأل أسئله كثيره هو بس الوقت ما علهش أنا عارفة الظروف كانت مش سمحه مثلاً حضرتك قلت إن حضرتك مش حتسمح لممارسة السياسة داخل مداس الوزارة
د/ أحمد جمال الدين موسي : لأ بمعني إن المعلمين لهم دور تربوي مهم جداً التلامذة عندنا في سن صغير اللي عند ثالثه ثانوي لسه التلامذة في سن لم يصل فيها تكوين قناعته فأنا أعتقد إنه غير ملائم في أي مجتمع في الدنيا إن المعلم اللي عنده قناعته الخاصة وإتجاهاته السيئة الخاصة يفرضها علي تلامذته ده قصدي
رشا مجدي: طيب وزير التربية والتعليم كان بينه وبين معلمي الإخوان تنسيق ما وظهرهذا بوضوح من خلال إنتخابات نقابة المهن التعليمية
د/ أحمد جمال الدين موسي : هذا كلام فارغ وزيرالتربية والتعليم يمثل الدولة ولا يمثل أحد علي الإطلاق وأنا لا تنسيق مع أي طرف أياً كان ولا أسمح لنفسي ولا عمري أنا عارف دوري أنا رجل أمثل دولة مصرية وبحافظ علي هذا الأمر الإنتخابات النقابه لا صلة لي بها وأنا قلت من أول لحظة جيت فيها الوزارة إن أنا رأيي كرجل ديمقراطي مؤمن بالديمقراطيه إن الجهة الإدارية اللي هي التربية والتعليم لا تتدخل في النقابة وأخذت علي نفسي هذا العهد حتي بتوع النقابة المستقله جم قالوا لي "أنا ماليش صلة بالنقابات تمام " المعلمين ينتخبوا من يشاؤون وأنا ارحب بحريتهم في الإنتخاب وبعد كده النقابة لما تكتمل يبقي فيه نوع من الحواربيننا وبين بعض لكن لم يحدث علي الإطلاق أي تنسيق لإن مش مضطر أنسق مع أحد يعني إيه أنسق مع أحد وأنا مالي ومال النقابة لكن لم يحدث علي الإطلاق أي تنسيق لإن مش مضطر أنسق مع أحد يعني إيه أنسق مع أحد وأنا مالي ومال النقابة يعني لم يحدث في لحظة من اللحظات إحنا تدخلنا في عمل النقابه وأتحدي واحد يقول إن إحنا أدينا أي حاجة توجيه لقاء متعلق بالنقابة دا مبدئي أخذته من أول لحظة وإحترمته ومازلت أحترمه إنه لا دخل للوزارة علي الإطلاق مما يجري في النقابة
رشا مجدي: طيب تفسر لي بإيه يا معالي الوزير يعني تعالي نربط الأحداث ببعضها كدهوه بعد ما إتكلمتوا مع المعلمين هناك من يشعل الفتيل مره أخري هناك من يطالب بإقالة وزير التربية والتعليم هناك من يصدر الشائعات بأن وزير التربية والتعليم بينسق مع معلمين الإخوان هل هناك من يحرك ما ضد تيار مُعيَّن أو ضدك يعني فسر لي كل التركيبات ديه
د/ أحمد جمال الدين موسي : أنا مؤمن بإن الحقيقة حتفرض نفسها وأنا طول عمري من أنصار الصدق والحقيقة مع الآخرين والشفافيه المطلقه فأنا ما أفعله واضح للعيان ولذلك أسعد بإن حد يواجهني بعكس هذا الكلام ولذلك إحنا بنواجه بحجم كبير جداً من الأقاويل غير الدقيقة يعني مثلا أنا سمعت في بعض البرامج اليومين اللي فاتوا يقول لك المستشارين بتوع الوزير وزارة التربية والتعليم لا يوجد فيها مستشار واحد الوزارة الوحيدة في مصرما فيش فيها مستشار ما فيش واحد فوق السن في وزارة التربية والتعليم يقول لك بعض مساعدي الوزير بياخدوا مبالغ خرافيه دا كلام فارغ لإن أنا يوم ما جيت قررت إن مساعدي الوزير إذا كانوا بيأخذوا فلوسهم من بند معين لا يجوز لهم تقاضي أي مبالغ أخري وبعضهم خسر أكثر من نصف دخله اللي كان موجود السنة اللي فاتت أنا أجبرت الحسابات في التربية والتعليم أن لا تعطي مليم واحد من أي مكافأه إمتحان أو غيره لمن يحصل علي مرتبه من جهه أخري المسائل لابد إن إحنا نتكلم في ظل الحقائق وليس في ظل الأقاويل وأنا مش بتاع أقاويل أنا راجل خط مستقيم فكل الأقاويل التي تُقال مزعجة والشيئ المزعج أكثر إن ساعات تقولي حديث يحرف الحديث يعني أنا بيؤلمني جدا حأدي لك مثل بسيط قلته إمبارك أول إمبارح للصحفيين إن فيه 8 صحفيين طلبوا يعملوا لقاء معايا قبل بدء العام الدراسي فقلت مش حأقدر أقابل كل واحد علي حدي ما فيش وقت ال 8 يجو مع بعض
رشا مجدي: مؤتمر زي مؤتمر.....؟
د/ أحمد جمال الدين موسي : قعدنا مع بعض كده علي ترابيزة وهم معاهم أجهزة تسجيل وإحنا معانا أجهاز تسجيل بتاع وزارة التربية والتعليم بتاع الإعلام بتاعنا وخلص الحديث الأربع أحاديث المنسوبة لي اللي نشرت في الصحف مختلفة إختلاف كلي كلٍ منها عن الآخر مع إننا قاعدين في نفس الجلسه والكل بيسجل بعضهم فبرك الحديث فبرك الأسئلة وفبرك الإجابات بعضهم إحترم اللي تم بشكل أكبر فأنا عايز أقول في النهايه إن إحنا يعني مثلا حد يقول لك إن الوزير قال إن المعلمين المشاركين في الإضراب غير وطنيين دا كلام فارغ ما حصلش ولا يمكن أقول حاجة زي كده مش طبيعتي كل المعلمين بلا إستثناء وطنيين فده للأسف أنا قلت بس الوطنيه تقتضي المعلمين إنهم ما يشاركوش في الإضراب في البدايه فهو فسَّر المسألة وقالها بطريقة مختلفة وأنا لإن رجل قانون أستاذ قانون دقيق جداً في عباراتي وسأحاسب علي أقوالي ولي علي ما يُنشر عن لساني لإن معظمه أو عدد – جزء كبير منه لا يعبر عن حقيقة الأمر
رشا مجدي: معالي الوزير أنا عندي أسئله كتيرة جداً وملفات كثيرة جداً فأنا بأستسمحك إن إحنا حنكمل بكره إن شاء الله من خلال لقائنا الموضوعات ديه لإن ميعاد نشرة 9 فأنا بأشكرك شكراً جزيلاً ونترككم الآن مع نشرة التاسعه
د/ أحمد جمال الدين موسي : شكرا لك